പോസ്റ്റല് ബാലറ്റ് വിവാദവുമായി ബന്ധപ്പെട്ട് ഉണ്ടായ സംഭവ വിവാദങ്ങള് ക്രൈംബ്രാഞ്ച് അന്വേഷിക്കും. കേസ് രജിസ്റ്റര് ചെയ്ത് അന്വേഷണം നടത്താന് സംസ്ഥാന പൊലീസ് മേധാവി നിര്ദ്ദേശം നല്കി
പോസ്റ്റല് ബാലറ്റ് വിവാദവുമായി ബന്ധപ്പെട്ട് ഉണ്ടായ സംഭവ വിവാദങ്ങള് ക്രൈംബ്രാഞ്ച് അന്വേഷിക്കും. കേസ് രജിസ്റ്റര് ചെയ്ത് അന്വേഷണം നടത്താന് സംസ്ഥാന പൊലീസ് മേധാവി ലോകനാഥ് ബെഹ്റ െ്രെകം ബ്രാഞ്ച് മേധാവിക്ക് നിര്ദ്ദേശം നല്കി. കേസ് രജിസ്റ്റര് ചെയ്ത് എഫ്.ഐ.ആര് ലഭ്യമാക്കിയ ശേഷം സംഭവത്തില് ഉള്പ്പെട്ട പൊലീസ് ഉദ്യോഗസ്ഥര്ക്കെതിരെ ശിക്ഷണ നടപടികള് കൈക്കൊള്ളും. പൊലീസ് ഉദ്യോഗസ്ഥര് ഉള്പ്പെട്ട പോസ്റ്റല് ബാലറ്റ് വിവാദവുമായി ബന്ധപ്പെട്ട പൊതുവായ കാര്യങ്ങള് അന്വേഷിക്കുന്നതിന് പ്രത്യേകമായി െ്രെകം ബ്രാഞ്ച് അന്വേഷണം നടത്താനും സംസ്ഥാന പൊലീസ് മേധാവി ഉത്തരവിട്ടു. വിവാദവുമായി ബന്ധപ്പെട്ട് ഇന്റലിജന്സ് വിഭാഗം തയ്യാറാക്കിയ റിപ്പോര്ട്ട് ശുപാര്ശ സഹിതം സംസ്ഥാന പൊലീസ് മേധാവി ചീഫ് ഇലക്ടറല് ഓഫീസര്ക്ക് സമര്പ്പിച്ചിരുന്നു. ഈ റിപ്പോര്ട്ട് അദ്ദേഹം അംഗീകരിച്ച പശ്ചാത്തലത്തിലാണ് തീരുമാനം.
പൊലീസുകാരുടെ തപാല് ബാലറ്റുകളിലെ ക്രമക്കേടിനെക്കുറിച്ച് നിയമസഭാമണ്ഡലം തിരിച്ച് അന്വേഷിക്കാന് മുഖ്യതെരഞ്ഞെടുപ്പ് ഓഫീസര്ക്ക് ഡി.ജി.പി നിര്ദേശം നല്കിയതിന് പിന്നാലെയാണ് ക്രൈംബ്രാഞ്ച് അന്വേഷണത്തിന് ഉത്തരവിട്ടത്. കൂടുതല് മണ്ഡലങ്ങളില് പൊലീസ് ബാലറ്റുകളില് ക്രമക്കേട് നടന്നെന്ന വിലയിരുത്തലിനെ തുടര്ന്നാണ് വിപുലമായ അന്വേഷണത്തിന് ഡി.ജി.പി ലോക്നാഥ് ബെഹ്റ മുഖ്യതെരഞ്ഞെടുപ്പ് ഓഫീസര് ടിക്കാറാം മീണയ്ക്ക് ശുപാര്ശ നല്കിയത്. പൊലീസ് അസോസിയേഷന് വേണ്ടി തിരുവനന്തപുരം വട്ടപ്പാറ പോസ്റ്റ് ഓഫീസില് പൊലിസുകാരുടെ പോസ്റ്റല് ബാലറ്റുകള് കൂട്ടത്തോടെ വന്നതില് ഒരു പൊലീസുകാരനെയും പോസ്റ്റല് വോട്ടുകള് ശേഖരിക്കുന്നതിന് വാട്സാപ്പ് ഗ്രൂപ്പില് സന്ദേശമയച്ച മറ്റൊരു പൊലീസുകാരനെയും സസ്പെന്ഡ് ചെയ്യാനും ഡി.ജി.പി മുഖ്യ തെരഞ്ഞെടുപ്പ് ഓഫീസര്ക്ക് ശുപാര്ശ ചെയ്തു.
കള്ളവോട്ടിന് വഴിയൊരുക്കുന്ന തരത്തില് വോട്ട് ചെയ്യുന്നതിന് മുന്പും ശേഷവും ബാലറ്റുകള് ശേഖരിക്കാന് ഇടപെടലുണ്ടായെന്ന്് ഇന്റലിജന്സ് മേധാവി ഡി.ജി.പിക്ക് റിപ്പോര്ട്ട് നല്കിയിരുന്നു. ഇടത് അനുകൂല പൊലിസ് അസോസിയേഷന് നേതാക്കള് പൊലീസുകാരെ ഭീഷണിപ്പെടുത്തി ബാലറ്റുകള് കൈവശമാക്കുകയും ഒരേ വിലാസത്തില് നൂറുകണക്കിന് ബാലറ്റുകള് തപാല് മാര്ഗമെത്തിക്കുകയും ചെയ്തുവെന്നാണ് കണ്ടെത്തല്. ആറ്റിങ്ങല്, കൊല്ലം, ആലത്തൂര്, വടകര, കണ്ണൂര്, കാസര്കോട് മണ്ഡലങ്ങളിലാണ് ക്രമക്കേടുകളേറെയും നടന്നത്.
ബാലറ്റുകള് നല്കണമെന്ന് ആവശ്യപ്പെട്ട് തിരുവനന്തപുരത്തെ പൊലീസുകാരുടെ വാട്സ്ആപ് ഗ്രൂപ്പില് ശബ്ദസന്ദേശം അയച്ച പൊലീസ് അസോസിയേഷന് സജീവപ്രവര്ത്തകനായ ശ്രീപദ്മനാഭസ്വാമി ക്ഷേത്രത്തിലെ കമാന്ഡോ, ഇന്ത്യാ റിസര്വ് ബറ്റാലിയനിലെ ഹവില്ദാര് എന്നിവരെയാണ് സസ്പെന്റ് ചെയ്യാന് ശിപാര്ശ ചെയ്തിരിക്കുന്നത്. ഇവര്ക്കെതിരെ മാത്രം നടപടി സ്വീകരിച്ച് ക്രമക്കേട് ഒതുക്കിത്തീര്ക്കാനും ശ്രമം നടക്കുന്നതായി ആക്ഷേപമുണ്ട്.
ഇടതു സര്വീസ് സംഘടനാ നേതാക്കളും പൊലീസ് അസോസിയേഷന് നേതാക്കളും പോസ്റ്റല് ബാലറ്റ് അനുവദിച്ച ലിസ്റ്റുകള് കൈവശപ്പെടുത്തി വോട്ടു ചെയ്തതും അല്ലാത്തതുമായ പോസ്റ്റല് ബാലറ്റുകള് കൂട്ടത്തോടെ ശേഖരിക്കുകയാണെന്നും അതിനാല് വിശദമായ അന്വേഷണം നടത്തണമെന്ന് ആവശ്യപ്പെട്ട് ആറ്റിങ്ങല് യു.ഡി.എഫ് സ്ഥാനാര്ത്ഥി അടൂര് പ്രകാശ് മുഖ്യ തെരഞ്ഞെടുപ്പ് ആഫീസര്ക്കും ജില്ലാ കലക്ടര്ക്കും പരാതി നല്കിയിട്ടുണ്ട്. പോസ്റ്റല് ബാലറ്റ് അനുവദിച്ചവരുടെ പേരും മേല്വിലാസവും അടങ്ങിയ ലിസ്റ്റ് അനുവദിക്കരുതെന്ന് ചട്ടത്തില് പ്രതിപാദിച്ചിട്ടില്ല. അതിനാല് മുഖ്യ തെരഞ്ഞെടുപ്പ് ഓഫീസര് തന്റെ വിവേചനാധികാരം ഉപയോഗിച്ച് സുതാര്യത ഉറപ്പുവരുത്തുന്നതിനായി ലിസ്റ്റ് അനുവദിക്കുന്നതിനുള്ള നിര്ദ്ദേശം വരണാധികാരിക്ക് നല്കണമെന്നും കൂടാതെ ഇടതു സര്വ്വീസ് സംഘടനാ നേതാക്കള്ക്കും പൊലീസ് അസോസിയേഷന് നേതാക്കള്ക്കും ഈ ലിസ്റ്റ് ചോര്ന്ന് ലഭിച്ചതാണെങ്കില് അതേകുറിച്ച് വിശദമായ അന്വേഷണം നടത്തണമെന്നും അടൂര് പ്രകാശ് ആവശ്യപ്പെട്ടിരുന്നു.
പൊലീസ് അസോസിയേഷന് നേതാക്കന്മാര് കൂട്ടത്തോടെ പോസ്റ്റല് വോട്ടുകള് സമാഹരിച്ചതായി ആദ്യമേ ആക്ഷേപം ഉയര്ന്നിരുന്നു. ഇതേച്ചൊല്ലി അസോസിയേഷന്റെ സംസ്ഥാന കമ്മിറ്റി ഓഫീസില് നോതാക്കളും മറ്റ് ചിലരും തമ്മില് സംഘട്ടനം നടന്നതായി മുന് അസോസിയേഷന് ഭാരവാഹി ചാനല് ചര്ച്ചയില് വെളിപ്പെടുത്തിയിരുന്നു. യു.ഡി.എഫിന് അനുകൂലമായി വോട്ട് ചെയ്യുമെന്ന് ഉറപ്പുള്ളവരുടെ ബാലറ്റുകള് കൈപ്പറ്റാതെ മടക്കി അയയ്ക്കുകയും മുക്കുകയും ചെയ്തെന്നാണ് ആരോപണം.
കഴിഞ്ഞ തെരഞ്ഞെടുപ്പ് വരെ തപാല് ബാലറ്റ് പൊലീസുകാരുടെ വീട്ടിലേക്ക് അയയ്ക്കുന്നതായിരുന്നു പതിവ്. ഇത്തവണ അതില് ബോധപൂര്വ്വം മാറ്റംവരുത്തി. ജോലി ചെയ്യുന്ന യൂണിറ്റിന്റെ വിലാസം അപേക്ഷയില് രേഖപ്പെടുത്തിയാല് മതിയെന്നാക്കി. പൊലീസ് അസോസിയേഷന് ഇടപെട്ടാണ് ഇത്തരമൊരു നിലപാടെടുത്തത്. അതുകൊണ്ട് പൊലീസുകാരില് മിക്കവരും യൂണിറ്റിന്റെ വിലാസമാണ് നല്കിയത്. ആ വിലാസത്തിലെത്തിയ ബാലറ്റുകള് അസോസിയേഷന് നേതാക്കളാണ് കൈപ്പറ്റിയത്.
https://www.facebook.com/Malayalivartha
