ഗജരാജന്‍ തെച്ചിക്കോട്ടുകാവ് രാമചന്ദ്രന്റെ വിലക്കിനെച്ചൊല്ലി ആനയുടമകള്‍ ഇടഞ്ഞിരിക്കുകയാണ്. ആനയുടമകളുമായി തിരുവനന്തപുരത്തു നടന്ന മന്ത്രിതലചര്‍ച്ചയിലും തീരുമാനമായില്ല. രാമചന്ദ്രനെ വിലക്കിയതില്‍ പ്രതിഷേധിച്ച്, തൃശൂര്‍ പൂരത്തിനുള്‍പ്പെടെ ആനകളെ വിട്ടുനല്‍കില്ലെന്ന് ഉടമകളുടെ സംഘടന തീരുമാനിച്ചതോടെയാണു മന്ത്രി വി.എസ്. സുനില്‍കുമാര്‍ മുന്‍കയ്യെടുത്ത്, ദേവസ്വംമന്ത്രി കടകംപള്ളി സുരേന്ദ്രന്റെ സാന്നിധ്യത്തില്‍ അടിയന്തരയോഗം ചേര്‍ന്നത്.

തൃശൂരില്‍ സംഭവം ഇങ്ങനെ പുരോഗമിക്കുമ്പോള്‍ കൊല്ലത്ത് നിന്നും വേറിട്ട കാഴ്ചയാണ് വരുന്നത്. ആന എഴുന്നള്ളത്തിന് താങ്ങാനാവാത്ത ചെലവ് നേരിടാനാണ് പുതിയമാര്‍ഗം തേടിയത്. എന്നാല്‍ ഉത്സവം കൊഴുക്കുകയുംവേണം. ഇതിനുള്ള പരിഹാരമെന്തെന്ന ചിന്തയില്‍നിന്ന് കൊല്ലത്തെയും തിരുവനന്തപുരത്തെയും ക്ഷേത്രഭാരവാഹികള്‍ കണ്ടുപിടിച്ച ഉത്തരമാണ് കുതിര എഴുന്നള്ളത്ത്. നിരന്നു നില്‍ക്കുന്ന ഗജവീരന്മാര്‍ക്കു പകരം കുതിരകളാണ് ഉത്സവപ്പറമ്പുകളിലെ പുതിയ കാഴ്ച. പാലക്കാട്, തൃശ്ശൂര്‍ ജില്ലകളിലും ഉത്സവങ്ങള്‍ക്ക് ഇപ്പോള്‍ കുതിരകളെ ഉപയോഗിക്കുന്നുണ്ട്. അതാകുമ്പോള്‍ മദമിളകുകയുമില്ല. 

കൊല്ലം തഴുത്തല സ്വദേശി ഇംതിയാസ് ഷാ, ചാത്തന്നൂര്‍ സ്വദേശി അജീഷ് അനില്‍കുമാര്‍, മയ്യനാട് സ്വദേശി സക്കറിയ എഡ്വേര്‍ഡ് സക്കറിയ എന്നിവരുടെ കുതിരകള്‍ക്കെല്ലാം ഇത്തവണ നിറയെ പരിപാടികളായിരുന്നു. ഇംതിയാസ് ഷായുടെ വീരയും സക്കറിയയുടെ രാജയും മുപ്പതോളം ഉത്സവങ്ങളില്‍ പങ്കെടുത്തു. അജീഷ് അനില്‍കുമാര്‍ ഇപ്പോഴുള്ള കുതിരയെ മാറ്റി അടുത്ത സീസണില്‍ പുതിയതിനെ വാങ്ങാനൊരുങ്ങുന്നു.

കാല്‍ലക്ഷംമുതല്‍ രണ്ടരലക്ഷംരൂപ വരെയാണ് ആനകളുടെ വാടക. ഇത് താങ്ങാനാകാതെ വന്നതോടെയാണ് പല ഉത്സവങ്ങള്‍ക്കും കുതിരകളെ ഉപയോഗിക്കാന്‍ തുടങ്ങിയത്. എഴുന്നള്ളത്തിന് കുതിരയ്ക്ക് 5000 മുതല്‍ 7500 രൂപ വരെയാണ് വാങ്ങുന്നത്.

പലയിടത്തും ആനകളുടെ എണ്ണംകുറച്ചും പൂര്‍ണമായും ഒഴിവാക്കിയും കുതിരകളെ കൊണ്ടുവന്നു. കൊല്ലം നെടുമണ്‍കാവിലെ ക്ഷേത്രത്തില്‍ 10 കുതിരകളാണ് എഴുന്നള്ളത്തിനുണ്ടായിരുന്നത്.

എഴുന്നള്ളത്തിന് ഉപയോഗിക്കുന്നുണ്ടെങ്കിലും കുതിരകളെ ഇതുവരെ തിടമ്പെടുക്കാന്‍ നിയോഗിച്ചിട്ടില്ല. ആനകളെ പൂര്‍ണമായും ഒഴിവാക്കിയ സ്ഥലങ്ങളില്‍ കുതിരകളുണ്ടെങ്കിലും മേല്‍ശാന്തിയോ ശാന്തിക്കാരോ പരികര്‍മികളോ തിടമ്പ് തോളിലേറ്റും. ചിലയിടങ്ങളില്‍ കുതിരയെ കെട്ടിയ രഥത്തിലാണ് തിടമ്പേറ്റിയത്. 

അതേസമയം തെച്ചിക്കോട്ടുകാവ് രാമചന്ദ്രന്റെ വിലക്ക് സംബന്ധിച്ചു നിയമോപദേശം തേടുമെന്നാണ് കടകംപള്ളി പറയുന്നത്. പ്രശ്‌നം രമ്യമായി പരിഹരിക്കാനാണു സര്‍ക്കാര്‍ ശ്രമിക്കുന്നതെന്നുംഅദ്ദേഹം പറഞ്ഞു. ചര്‍ച്ചയില്‍ വനംമന്ത്രി കെ. രാജു, മുഖ്യ വനപാലകന്‍, ആനയുടമകളെ പ്രതിനിധീകരിച്ച് സംഘടനാ പ്രസിഡന്റ് കെ.ബി. ഗണേഷ്‌കുമാര്‍ എം.എല്‍.എ, ജനറല്‍ സെക്രട്ടറി പി. ശശികുമാര്‍ എന്നിവരും പങ്കെടുത്തു. അതേസമയം, വിഷയത്തില്‍ തെച്ചിക്കോട്ടുകാവ് ദേവസ്വം നല്‍കിയ ഹര്‍ജി െഹെക്കോടതി ഇന്നു പരിഗണിക്കും. ആനയുടെ വിലക്കിനെ എതിര്‍ക്കുന്നവരും അനുകൂലിക്കുന്നവരും െഹെക്കോടതി വിധിയില്‍ പ്രതീക്ഷയര്‍പ്പിക്കുന്നു. തൃശൂര്‍ പൂരം നേരിടുന്ന പ്രതിസന്ധി മാറുമോയെന്ന ആകാംക്ഷയിലാണു പൂരപ്രേമികള്‍.

ആനയുടമകളുമായി തലസ്ഥാനത്തും തൃശൂരിലുമായി മന്ത്രിമാരുടെ നേതൃത്വത്തില്‍ നടക്കുന്ന കൂടുതല്‍ ചര്‍ച്ചകളില്‍ മഞ്ഞുരുകുമെന്നാണ് എല്ലാവരുടെയും പ്രതീക്ഷ. എന്നാല്‍, ഇന്നത്തെ കോടതി വിധിക്കുശേഷമാകും തെച്ചിക്കോട്ടുകാവ് രാമചന്ദ്രനെ എഴുന്നള്ളിക്കുന്ന കാര്യത്തില്‍ അന്തിമതീരുമാനമെന്നു ജില്ലാ കലക്ടര്‍ ടി.വി.അനുപമ വ്യക്തമാക്കി. മദപ്പാടുള്ളതും അനാരോഗ്യമുള്ളതും വിരണ്ടോടാന്‍ സാധ്യതയുള്ളതുമായ ആനകളെ പൂരവുമായി ബന്ധപ്പെട്ട് 1114 വരെ തൃശൂര്‍ നഗരത്തില്‍ പ്രവേശിപ്പിക്കില്ല. 

നിയന്ത്രണം ഏതെങ്കിലും ആനയെ സംബന്ധിച്ചല്ല, പൊതുവായ ഉത്തരവാണ്. ആനകളെ സംബന്ധിച്ച രേഖകള്‍ വനംവകുപ്പും വെറ്ററിനറി ഉദ്യോഗസ്ഥരും പരിശോധിക്കുമെന്നു കലക്ടര്‍ വ്യക്തമാക്കി. അതേസമയം, ആനയുടമകളും ജില്ലാ കലക്ടറുമായുള്ള ഭിന്നതയും രൂക്ഷമായി. പൂരത്തിന്റെ ശോഭ കെടുത്തരുതെന്ന് ആവശ്യപ്പെട്ട് പ്രതിപക്ഷനേതാവ് രമേശ് ചെന്നിത്തലയും മുന്‍മുഖ്യമന്ത്രി ഉമ്മന്‍ ചാണ്ടിയും രംഗത്തു വന്നു.