മേയ് 23ന് ഇനിയും ദിവസങ്ങളുണ്ട്. അതിനാല്‍ തന്നെ രാഷ്ട്രീയ പാര്‍ട്ടികള്‍ക്ക് മനപ്പായസം കുടിക്കാന്‍ ഇനിയും അവസരമുണ്ട്. ഇത്തവണ സിപിഐയാണ് വിലയിരുത്തല്‍ നടത്തിയിരിക്കുന്നത്. ഈഴവവോട്ടുകള്‍ ഇടതുമുന്നണിക്ക് അനുകൂലമായതിനാല്‍ തിരുവനന്തപുരത്ത് ബി.ജെ.പി. നിലംതൊടില്ലെന്ന് സി.പി.ഐ. വിലയിരുത്തല്‍. സി.പി.ഐ. മത്സരിക്കുന്ന തിരുവനന്തപുരം, തൃശ്ശൂര്‍, മാവേലിക്കര സീറ്റുകളടക്കം 13 മണ്ഡലത്തില്‍ ഇടതുമുന്നണി വിജയിക്കും. വടകരയിലും തിരുവനന്തപുരത്തും ബി.ജെ.പി.കോണ്‍ഗ്രസ് വോട്ടുകച്ചവടം നടന്നുവെന്നും സി.പി.ഐ. സംസ്ഥാന എക്‌സിക്യുട്ടീവ് വിലയിരുത്തി.

കാസര്‍കോട്, കണ്ണൂര്‍, വടകര, കോഴിക്കോട്, പാലക്കാട്, ആലത്തൂര്‍, ആലപ്പുഴ, കൊല്ലം, ആറ്റിങ്ങല്‍, ഇടുക്കി എന്നിവയാണ് ഇടതുമുന്നണി ജയിക്കുന്ന മറ്റുമണ്ഡലങ്ങള്‍. തിരുവനന്തപുരത്ത് കഴക്കൂട്ടം, നെയ്യാറ്റിന്‍കര, പാറശ്ശാല, കോവളം എന്നിവിടങ്ങളില്‍ എല്‍.ഡി.എഫിനായിരിക്കും മുന്നേറ്റം. കഴക്കൂട്ടത്തും കോവളത്തും 10,000 വോട്ടിന്റെ ലീഡുണ്ടാവും. ഈ രണ്ടുമണ്ഡലത്തിലും ഈഴവവോട്ടുകള്‍ ഇടതുമുന്നണിക്ക് ലഭിച്ചു. വട്ടിയൂര്‍കാവില്‍ ബി.ജെ.പി.ക്ക് അനുകൂലമായി കോണ്‍ഗ്രസ് വോട്ടുമറിച്ചു. എന്നാലും, ഇവിടെ കോണ്‍ഗ്രസ് തന്നെയാകും ഒന്നാമത്. ബി.ജെ.പി.ക്ക് നേമത്തുമാത്രമേ ഒന്നാമതെത്താനാകൂവെന്നാണ് സി.പി.ഐ. കണക്കാക്കുന്നത്.

യു.ഡി.എഫ്. അനുകൂല ഹിന്ദുവോട്ടുകളില്‍ വിള്ളലുണ്ടായി എന്ന വിലയിരുത്തലാണ് തൃശ്ശൂരിലെ പ്രതീക്ഷയ്ക്ക് അടിസ്ഥാനം. ഇതിനൊപ്പം, ന്യൂനപക്ഷവോട്ടുകള്‍ ഇടതുമുന്നണിക്ക് അനുകൂലമായിരുന്നു, പ്രത്യേകിച്ച് ക്രിസ്ത്യന്‍വിഭാഗത്തിന്റേത്. അതിനാല്‍, നല്ലഭൂരിപക്ഷത്തില്‍ ഇടതുമുന്നണി തൃശ്ശൂരില്‍ ജയിക്കുമെന്ന് യോഗം വിലയിരുത്തി.

കേരളാകോണ്‍ഗ്രസ്ബി.യുടെ ഇടതുമുന്നണിയിലേക്കുള്ള വരവാണ് മാവേലിക്കരയിലെ പ്രതീക്ഷയ്ക്ക് അടിസ്ഥാനം. ചങ്ങനാശ്ശേരി ഒഴികെ ആറുമണ്ഡലത്തിലും ഇടതുമുന്നണി ലീഡ് നേടും. മാവേലിക്കര, കൊട്ടാരക്കര മണ്ഡലത്തില്‍ 15,000ത്തിലേറെ വോട്ടിന്റെ ഭൂരിപക്ഷം കിട്ടുമെന്നും സി.പി.ഐ. പ്രതീക്ഷിക്കുന്നു.

ജയപരാജയങ്ങള്‍ നിര്‍ണയിക്കുന്നതിനെക്കാള്‍ പ്രവര്‍ത്തനങ്ങളുടെ പരിശോധനയാണ് എക്‌സിക്യുട്ടീവ് യോഗത്തിലുണ്ടായത്. ഓരോ മണ്ഡലത്തിന്റെയും ചുമതലയുള്ള നേതാക്കള്‍ പ്രവര്‍ത്തനങ്ങള്‍ വിശദീകരിച്ചു. ഇടതുമുന്നണി മുമ്പൊരിക്കലും ഉണ്ടാകാത്തവിധം ഈ തിരഞ്ഞെടുപ്പില്‍ ഐക്യത്തോടെ പ്രവര്‍ത്തിച്ചെന്ന് നേതാക്കള്‍ വിലയിരുത്തി. വയനാട്ടില്‍ ഇതുപോലൊരു പ്രവര്‍ത്തനം മുമ്പുണ്ടായിട്ടില്ല. രാഹുല്‍ഗാന്ധിയുടെ സ്ഥാനാര്‍ഥിത്വം ഇടതുമുന്നണിയെയാണ് ഉത്തേജിപ്പിച്ചതെന്നായിരുന്നു നേതൃത്വത്തിന്റെ അഭിപ്രായം.

വയനാട് സ്ഥാനാര്‍ഥി പി.പി. സുനീറിനെതിരേ നിലമ്പൂര്‍ എം.എല്‍.എ. പി.വി.അന്‍വര്‍ ഉന്നയിച്ച ആരോപണങ്ങള്‍ മുഖവിലയ്‌ക്കെടുക്കേണ്ടതില്ലെന്നാണ് നേതൃത്വത്തിന്റെ നിലപാട്. അന്‍വറിന്റെ പ്രസ്താവനയ്‌ക്കെതിരേ സി.പി.ഐ. മലപ്പുറം ജില്ലാനേതാക്കള്‍ പ്രതികരിച്ചതും പ്രതിരോധിച്ചതും ഉചിതമായ രീതിയിലായിരുന്നു. സി.പി.എമ്മിന്റെ ജില്ലാനേതൃത്വം അന്‍വറിനെ തള്ളിപ്പറഞ്ഞത് ഇതുകൊണ്ടാണ്. അതിനാല്‍, ഈ വിഷയത്തില്‍ സംസ്ഥാനനേതൃത്വം ഇടപെടേണ്ടതില്ലെന്ന് എക്‌സിക്യുട്ടീവ് യോഗം നിലപാടെടുത്തു.