തിരുവനന്തപുരം: ബാല ചലച്ചിത്രമേളയുടെ രണ്ടാംനാള്‍ സിനിമകള്‍ക്കൊപ്പം കളിയും ചിരിയും പാട്ടും മേളവും ചോദ്യങ്ങളും ഉത്തരങ്ങളുമായി കൊച്ചുകൂട്ടുകാര്‍ ആഘോഷമാക്കി. വിവിധ ജില്ലകളില്‍ നിന്നെത്തിയ പുതിയ പുതിയ കൂട്ടുകാരുമായി സൗഹൃദം പങ്കിട്ടും അവര്‍ ചലച്ചിത്രമേള ആസ്വദിച്ചു. കുട്ടികള്‍ തന്നെ രചനയും സംവിധാനവും നിര്‍വഹിക്കുകയും അഭിനയിക്കുകയും ചെയ്ത നാല് സിനിമകള്‍ ഇന്നലെ രാവിലെ ശ്രീ തിയേറ്ററില്‍ പ്രദര്‍ശിപ്പിച്ചു.

തിരുവനന്തപുരം കഴക്കൂട്ടം അലന്‍ഫെല്‍ഡ്മാന്‍ സ്‌കൂളിലെ എട്ടാംക്‌സുകാരി തമന്ന തിരക്കഥ എഴുതി ഛായാഗ്രഹണവും സംവിധാനവും നിര്‍വഹിച്ച ലഞ്ച്‌ബ്രേക്ക് ആയിരുന്നു മത്സരവിഭാഗത്തിലെ ഹ്രസ്വചിത്രം. സ്‌കൂളിലെ ഉച്ചഭക്ഷണ സമയത്ത് തെരുവില്‍ അലഞ്ഞ് നടക്കുന്ന രണ്ട് കുട്ടികള്‍ സ്‌കൂളിന്റെ പരിസരത്തെത്തുന്നതുമായി ബന്ധപ്പെട്ടുണ്ടാകുന്ന സംഭവവികസങ്ങളാണ് നാല് മിനിറ്റ് ദൈര്‍ഘ്യമുള്ള ലഞ്ച്‌ബ്രേക്ക് എന്ന ഹ്രസ്വചിത്രം.

മൊബൈലിലെയും ഓണ്‍ലൈനിലെയും ഗെയിമുകള്‍ കുട്ടികളെ വഴിതെറ്റിക്കുന്നതിനെ കുറിച്ചാണ് ഋഷികേശ് ദീപ് സംവിധാനം ചെയ്ത മുന്നറിയിപ്പ് പറയുന്നത്. കാര്‍മല്‍ സ്‌കൂളിലെ പ്ലസ് വണ്‍ വിദ്യാര്‍ത്ഥിയായ ദേവു കൃഷ്ണ എസ് നാഥ് സംവിധാനം ചെയ്ത ഡോക്യുമെന്ററിയായ യു ടേണ്‍ ടു ദ നേച്ചര്‍ ജൈവപച്ചക്കറിയെ കുറിച്ചും നല്ല ഭക്ഷണത്തെ പറ്റിയുമാണ് പറയുന്നത്. പാലക്കാട് ഭാരത് മാതാ സ്‌കൂളിലെ കെ.എസ് അലോക് കൃഷ്ണന്‍ സംവിധാനം ചെയ്ത ഹരിതം പ്ലാസ്റ്റിക് അടക്കമുളള മാലിന്യങ്ങള്‍ ഉപയോഗിച്ച് ഗാര്‍ഡന്‍ ഉണ്ടാക്കുന്നതിനെ കുറിച്ചാണ് നമ്മളെ കൂട്ടിക്കൊണ്ട് പോകുന്നത്.