തലസ്ഥാനത്ത് നിന്ന് രണ്ട് സംവിധായികമാര് മേളയില് സിനിമയുമായി എത്തി
തിരുവനന്തപുരം: സാങ്കേതിക വിദ്യ ഒരുപാടു വളര്ന്നെങ്കിലും അതിനൊപ്പം നമുക്ക് വളരാന് സാധിച്ചിട്ടില്ലെന്നും വീട്ടാവശ്യങ്ങക്ക് എങ്ങനെ വ്യവസായ സ്ഥാപനങ്ങളെയും അന്യ സംസ്ഥാനങ്ങളെയും ആശ്രയിക്കാതിരിക്കാന് സാധിക്കുമെന്ന അന്വേഷണമാണ് ' യു ടേണ് ടു ദി നേച്ചര്' എന്ന ഡോക്യുമെന്ററിയുടെ സംവിധായികയായ ദേവു കൃഷ്ണ എസ് നാഥ് പറഞ്ഞു. തിരുവനന്തപുരം കാര്മല് സ്കൂളിലെ പ്ലസ് വണ് വിദ്യാര്ത്ഥിയാണ് ഈ കുട്ടി സംവിധായിക. 15 മിനിറ്റ് ദൈര്ഘ്യമുള്ള ഡോക്യുമെന്ററിയാണ് ദേവു ഒരുക്കിയത്. അധ്യാപകനും ഡോക്യുമെന്ററി സംവിധായകനുമായ അച്ഛനാണ് തന്റെ ഏറ്റവും വലിയ പ്രചോദനമെന്നും ദേവു പറഞ്ഞു. രാജ്യാന്തര ചില്ഡ്രന്സ് ഫിലിം ഫെസ്റ്റിവലിനോട് അനുബന്ധിച്ച് ഇന്നലെ കൈരളി തിയേറ്ററില് നടന്ന മീറ്റ് ദ ഡയറക്ടേഴ്സ് എന്ന പരിപാടിയില് സംസാരിക്കുകയായിരുന്നു ദേവു.
ചലച്ചിത്രമേളയില് കുട്ടികള് സംവിധാനം ചെയ്ത നാല് സിനിമകള് മത്സരവിഭാഗത്തിലുണ്ട്. സനല് കുമാര് ശശിധരന് തനിക്ക് പ്രിയപ്പെട്ട സംവിധായകന് ആണെന്നും അദ്ദേഹം തിരക്കഥ ഇല്ലാതെ സിനിമ ചെയ്യുന്ന രീതിയാണ് തന്നെ ഏറ്റവും കൂടുതല് ആകര്ഷിച്ചിരിക്കുന്നതെന്നും ' ലഞ്ച് ബ്രേക്കി ' ന്റെ സംവിധായിക തമന്ന പറഞ്ഞു . ഫോട്ടോഗ്രാഫറായ അച്ഛനാണ് തന്റെ പ്രചോതനമെന്നും ചലച്ചിത്രമേഖലയില് തന്റേതായ വ്യക്തിമുദ്ര പതിപ്പിക്കാന് ആഗ്രഹിക്കുന്നു എന്നും തമന്ന കൂട്ടിച്ചേര്ന്നു. തിരുവനന്തപുരം കഴക്കൂട്ടം അലന്ഫെല്ഡ്മാന് സ്കൂളിലെ എട്ടാംക്സുകാരി തമന്ന തിരക്കഥ എഴുതി ഛായാഗ്രഹണവും സംവിധാനവും നിര്വഹിച്ച സിനിമ ഇതിനകം മറ്റ് പല മേളകളിലും പ്രദര്ശിപ്പിച്ചു.
ബാലപാഠങ്ങളുടെ സഹ സംവിധായക സന്ധ്യ ഉണ്ണികൃഷ്ണന് , ബാലതാരം തന്മയ, 'ബാലപാഠങ്ങള്' സംവിധാനം ചെയ്ത അനില് പാലക്കാട് എന്നിവരും സംസാരിച്ചു.
https://www.facebook.com/Malayalivartha
