കൊറോണയെന്ന മഹാമാരിയെ നേരിടാന്‍ രാജ്യം ഒറ്റക്കെട്ടുകയായി പൊരുതുകയാണ്. രോഗം വ്യാപനം തടയുന്നതിനായി 21 ദിവസത്തേക്കാണ് രാജ്യം സമ്പൂര്‍ണമായി അടച്ചിട്ടിരിക്കുന്നത്. രോഗികളുടെ എണ്ണത്തില്‍ വര്‍ധനയുണ്ടെങ്കിലും കാര്യങ്ങള്‍ നിയന്ത്രണ വിധേയമാണ്. എന്നാല്‍ അതിനിടയിലും ഒരു ദുഖവാര്‍ത്തയാണ് ഇപ്പോള്‍ പങ്കു വയ്ക്കാനുള്ളത്. കൊറോണ വൈറസ് ബാധയുണ്ടായെന്ന ഭയത്തേ തുടര്‍ന്ന് കര്‍ണാടയില്‍ 56കാരന്‍ ആത്മഹത്യ ചെയ്തു. ഉഡുപ്പി ജില്ലയിലെ ഉപ്പൂര്‍ ഗ്രാമത്തില്‍ നാര്‍നാട് നിവാസിയായ ഗോപാലകൃഷ്ണ മാഡിവാലയാണ് മരിച്ചത്. എന്നാല്‍ ഇയാള്‍ക്ക് കൊറോണ വൈറസിന്റെ ലക്ഷണങ്ങളൊന്നും ഉണ്ടായിരുന്നില്ലെന്ന് ബന്ധപ്പെട്ട വൃത്തങ്ങള്‍ അറിയിച്ചു.

ഉഡുപ്പിയില്‍ ബുധനാഴ്ചയായിരുന്നു സംഭവം. വീടിന് സമീപത്തുള്ള മരത്തില്‍ ഇയാളെ തൂങ്ങിമരിച്ച നിലയില്‍ കണ്ടെത്തുകയായിരുന്നു. കൊറോണയെന്ന് സംശയിക്കുന്നതിനാല്‍ മരിക്കുകയാണെന്ന് പറയുന്ന ആത്മഹത്യാക്കുറിപ്പും കണ്ടെടുത്തു. തനിക്ക് കൊറോണ ബാധിച്ചിട്ടുണ്ടെന്നും കുടുംബാംഗങ്ങള്‍ ഉറപ്പായും പരിശോധനയ്ക്ക് വിധേയരാകണമെന്നും ഇയാള്‍ എഴുതിവെച്ച ആത്മഹത്യാ കുറിപ്പില്‍ പറയുന്നു. കുറിപ്പില്‍ വീട്ടുകാരോട് സുരക്ഷിതരായി തുടരാനും ആവശ്യപ്പെട്ടിട്ടുണ്ട്. കൊറോണയാണെന്ന് സംശയമുള്ളതായി ഗോപാലകൃഷ്ണ സുഹൃത്തിനോട് പറഞ്ഞിരുന്നതായി പ്രദേശവാസികള്‍ പറഞ്ഞു. കെഎസ്ആര്‍ടിസി ഡ്രൈവറായി ജോലി ചെയ്തിരുന്ന ഗോപാലകൃഷ്ണ അടുത്തിടെ പുതിയ ഡ്രൈവര്‍മാരുടെ പരിശീലകനായി നിയമിക്കപ്പെട്ടിരുന്നു. 56 കാരനായ ഇയാള്‍ വിവാഹിതനും രണ്ട് കുട്ടികളും പിതാവുമാണ്.

അതേസമയം വീട്ടില്‍ നിരീക്ഷണത്തില്‍ കഴിയേണ്ട ആളുകളുടെ ലിസ്റ്റില്‍ ഇയാള്‍ ഉണ്ടായിരുന്നില്ലെന്ന് പോലീസ് പറയുന്നു. ഇയാള്‍ക്ക് രോഗലക്ഷണങ്ങള്‍ ഒന്നും തന്നെ ഉണ്ടായിരുന്നില്ലെന്നും അധികൃതര്‍ വ്യക്തമാക്കി. ആത്മഹത്യ ചെയ്തയാള്‍ തനിക്ക് കൊറോണയുണ്ടെന്ന് ആത്മഹത്യാ കുറിപ്പില്‍ പറഞ്ഞിരിക്കുന്നതിനാല്‍ ഇയാളില്‍ നിന്ന് രോഗ നിര്‍ണയ പരിശോധനയ്ക്കായി സാമ്പിള്‍ ശേഖരിച്ചിട്ടുണ്ട്. പരിശോധനാ ഫലവും മൃതദേഹം പോസ്റ്റുമോര്‍ട്ടം ചെയ്തതിന്റെ റിപ്പോര്‍ട്ടും വരാന്‍ കാത്തിരിക്കുകയാണ് പോലീസ്.

അതേസമയം, ലോക്ക് ഡൗണിന്റെ ആദ്യദിനമായ ബുധനാഴ്ച മാത്രം ഇന്ത്യയില്‍ 101 കൊറോണ കേസുകളാണ് റിപ്പോര്‍ട്ട് ചെയ്തത്. മൂന്നുപേര്‍ മരിക്കുകയും ചെയ്തു. രാജ്യത്ത് കൊറോണ സ്ഥിരികരിച്ചവരുടെ ആകെ എണ്ണം 612 ആയി ഉയര്‍ന്നു. രോഗം മൂലം മരിച്ചവരുടെ എണ്ണം 13 ആവുകയും ചെയ്തു. കോറോണ ബാധിച്ച് രണ്ടു പേര്‍ക്ക് കര്‍ണാടകയില്‍ ജീവന്‍ ന്ടമായി. മഹാരാഷ്ട്രയില്‍ ആറുപേര്‍ക്കുകൂടി കോവിഡ് സ്ഥിരീകരിച്ചു. ഇതോടെ മഹാരാഷ്ട്രയില്‍ ആകെ രോഗബാധിതര്‍ 122 ആയി. തമിഴ്നാട്ടിലും ഗോവയിലും ഇന്നലെ മൂന്നുപേര്‍ക്ക് വീതം കോവിഡ് സ്ഥിരീകരിച്ചു. ഗോവയില്‍ ഇതാദ്യമായാണ് കോവിഡ് റിപ്പോര്‍ട്ട് ചെയ്യുന്നത്.