കൊവിഡ്‌ 19 പ്രതിരോധ പ്രവര്‍ത്തനങ്ങള്‍ സംബന്ധിച്ച സംശയങ്ങള്‍ക്ക്‌ മുഖ്യമന്ത്രി പിണറായി വിജയന്‍ പൊതുജനങ്ങള്‍ക്ക്‌ മറുപടി നല്‍കുന്നു. ട്വിറ്ററിലാണ്‌ സംസ്ഥാനത്തെ പ്രവര്‍ത്തനങ്ങളെക്കുറിച്ച്‌ മുഖ്യമന്ത്രി നേരിട്ട്‌ മറുപടി നല്‍കുന്നത്‌. നാളെ ഉച്ചയ്ക്ക് 12 മുതലാണ്‌ ട്വിറ്റര്‍ ഉപയോഗിക്കുന്നവര്‍ക്ക്‌ മുഖ്യമന്ത്രിയോട്‌ സംവദിക്കാന്‍ അവസരമുള്ളത്‌. #AskPinarayiVijayan എന്ന ഹാഷ്‌ ടാഗിലാണ്‌ ചോദ്യങ്ങള്‍ ചോദിക്കേണ്ടത്‌. ട്വിറ്റര്‍ ഇന്ത്യയുടെ "ആസ്‌ക്‌ ദ സിഎം' എന്ന പരിപാടിയുടെ ഭാഗമായാണ്‌ മുഖ്യമന്ത്രി ട്വിറ്റര്‍ തത്സമയ ചോദ്യോത്തരത്തില്‍ പങ്കെടുക്കുന്നത്‌.

സംസ്ഥാനത്ത് ഇന്ന് 42 പേര്‍ക്ക് കൂടി പുതിയതായി കോവിഡ്-19 സ്ഥിരീകരിച്ചു. പ്രതിദിനം രോഗം സ്ഥിരീകരിക്കുന്നവരുടെ എണ്ണത്തില്‍ ഇതുവരെ ഏറ്റവും കൂടുതല്‍ കേസുകള്‍ റിപ്പോര്‍ട്ട് ചെയ്ത ദിവസമാണിന്ന്. രണ്ട് പേര്‍ക്ക് രോഗം ഭേദമായതായും മുഖ്യമന്ത്രി പിണറായി വിജയന്‍ വാര്‍ത്ത സമ്മേളനത്തില്‍ അറിയിച്ചു. കണ്ണൂര്‍ ജില്ലയിലാണ് ഏറ്റവും കൂടുതല്‍ കേസുകള്‍ റിപ്പോര്‍ട്ട് ചെയ്തത്, 12 എണ്ണം.

കാസര്‍ഗോഡ് - 7, കോഴിക്കോട് - 5, പാലക്കാട് - 5, തൃശ്ശൂര്‍ - 4, മലപ്പുറം - 4, കോട്ടയം - 2, കൊല്ലം - 1, പത്തനംതിട്ട - 1, വയനാട് - 1 എന്നിങ്ങനെയാണ് മറ്റ് ജില്ലകളിലെ പുതിയതായി രോഗം സ്ഥിരീകരിച്ചവരുടെ എണ്ണം.

ഇന്ന് രോഗം സ്ഥിരീകരിച്ചവരില്‍ ഭൂരിഭാഗം പേരും ഇതര സംസ്ഥാനങ്ങളില്‍ നിന്ന് എത്തിയവരാണ്. രാജ്യത്ത് ഏറ്റവും കൂടുതല്‍ കോവിഡ്-19 രോഗികളുള്ള മഹരാഷ്ട്രയില്‍ നിന്നെത്തിയ 21 പേര്‍ക്കും തമിഴ്നാട് ആന്ധ്രപ്രദേശ് എന്നിവിടങ്ങളില്‍ നിന്നെത്തിയ ഓരോരുത്തര്‍ക്കും രോഗം സ്ഥിരീകരിച്ചു. 17 പേര്‍ വിദേശത്ത് നിന്ന് എത്തിയവരാണ്. കണ്ണൂരില്‍ ഒരാള്‍ക്ക് സമ്ബര്‍ക്കത്തിലൂടെ രോഗബാധയുണ്ടായി. കോഴിക്കോട് രോഗം സ്ഥിരീകരിച്ച ഒരാള്‍ ആരോഗ്യ പ്രവര്‍ത്തകയാണ്.

ഇതോടെ സംസ്ഥാനത്ത് ആകോ രോഗം സ്ഥിരീകരിച്ചവരുടെ എണ്ണം 732 ആയി. 216 പേരാണ് നിലവില്‍ ആശുപത്രിയില്‍ ചികിത്സയിലുള്ളത്. ഇന്നലെ മരിച്ച ഖദീജകുട്ടിയടക്കം വൈറസ് ബാധിതരായി മരണപ്പെട്ടവരുടെ എണ്ണം സംസ്ഥാനത്ത് നാലാണ്. അതേസമയം നിരീക്ഷണത്തില്‍ കഴിയുന്നവരുടെ എണ്ണത്തിലും കാര്യമായ വര്‍ധനവ് രേഖപ്പെടുത്തി. 84258 പേരാണ് കേരളത്തിലാകെ നിരീക്ഷണത്തിലുള്ളത്. ഇതില്‍ 83649 പേര്‍ വീടുകളിലോ ഇന്‍സ്റ്റിറ്റ്യൂഷല്‍ ക്വറന്റൈനിലോ ആണ്. 609 പേരാണ് ആശുപത്രിയില്‍ നിരീക്ഷണത്തിലുള്ളത്. ഇന്ന് മാത്രം 162 പേരെ പുതിയതായി ആശുപത്രിയില്‍ പ്രവേശിപ്പിച്ചു.

സംസ്ഥാനത്ത് ഇതുവരെ 51310 സാമ്ബിളുകള്‍ പരിശോധിച്ചതില്‍ 49533 എണ്ണവും രോഗബാധയില്ലെന്ന് ഉറപ്പാക്കിയിട്ടുണ്ട്. സെന്റിനല്‍ സര്‍വെയ്ലന്‍സിന്റെ ഭാഗമായി മുന്‍ഗണന വിഭാഗത്തില്‍ നിന്നും ശേഖരിച്ച 7072 സാമ്ബിളുകളില്‍ 6630 ഉം നെഗറ്റീവാണ്.