മലയാറ്റൂരില്‍ കെട്ടിടം സ്‌ഫോടനത്തില്‍ തകരുകയും രണ്ടു പേര്‍ കൊല്ലപ്പെടുകയും ചെയ്ത സംഭവത്തില്‍, കെട്ടിടത്തിനടുത്തുള്ള പാറമടയുടെ ലൈസന്‍സ് റദ്ദാക്കാന്‍ തീരുമാനിച്ചതായി ജില്ലാ കളക്ടര്‍ എസ് സുഹാസ് അറിയിച്ചു. അഡീഷണല്‍ ജില്ലാ മജിസ്‌ട്രേറ്റ് സാബു കെ ജേക്കബ് നടത്തുന്ന മജിസ്റ്റീരിയല്‍ അന്വേഷണത്തിന്റെ ഇടക്കാല റിപ്പോര്‍ട്ടിന്റെ അടിസ്ഥാനത്തിലാണ് നടപടി. ലൈസന്‍സ് റദ്ദാക്കുന്ന തീരുമാനം അന്തിമ അന്വേഷണ റിപ്പോര്‍ട്ടിന് വിധേയമായിരിക്കും എന്നും അദ്ദേഹം അറിയിച്ചു. പാറമടയുടെ നടത്തിപ്പില്‍ നിയമലംഘനങ്ങള്‍ ഉണ്ടോ എന്നത് വിശദമായി പരിശോധിച്ചുവരികയാണ്. ജില്ലയിലെ മറ്റ് പാറമടകളില്‍ സ്‌ഫോടകവസ്തുക്കള്‍ ഉപയോഗിക്കുന്നതു സംബന്ധിച്ച് പൊതുവായ പരിശോധന നടത്തുമെന്നും ജില്ലാ കളക്ടര്‍ അറിയിച്ചു.