കൈവിട്ട വാക്കും ചാക്കും... വടക്കാഞ്ചേരിയിലെ ലൈഫ് മിഷന് പാര്പ്പിട സമുച്ചയ പദ്ധതിയില് സിബിഐ അന്വേഷണം കടുപ്പിച്ചതോടെ കാര്യങ്ങള് നീങ്ങുന്നത് ശിവശങ്കറിലേക്ക്; യൂണിടാക് ഉടമ സന്തോഷ് ഈപ്പന്റെ മൊഴി ശിവശങ്കറിന് കുരുക്കാകുന്നു; സ്വപ്ന പറഞ്ഞു ശിവശങ്കര് അനുമതി വാങ്ങിത്തന്നുവെന്ന് വെളിപ്പെടുത്തല്
പല പ്രാവശ്യം കസ്റ്റംസും എന്ഐഎയും ചോദ്യം ചെയ്തിട്ടും ഒന്നും കിട്ടാതിരുന്ന സര്ക്കാര് മുന് പ്രിന്സിപ്പല് സെക്രട്ടറി എം. ശിവശങ്കര് ലൈഫ് പദ്ധതിയില് കുടുങ്ങുമോയെന്ന ചോദ്യമാണ് ഉയരുന്നത്. യൂണിടെക് ഉടമ സന്തോഷ് ഈപ്പന് നല്കിയ മൊഴിയാണ് ശിവശങ്കറിന് കുരുക്കായി മാറിയിരിക്കുന്നത്. വടക്കാഞ്ചേരിയിലെ ലൈഫ് മിഷന് പാര്പ്പിട സമുച്ചയ പദ്ധതി നിര്മാണക്കരാര് ലഭിക്കാന് ശിവശങ്കറും സഹായിച്ചെന്നാണ് സന്തോഷ് ഈപ്പന്റെ മൊഴി. പദ്ധതിക്കാവശ്യമായ എല്ലാ സര്ക്കാര് അനുമതിയും നേടാന് സഹായിച്ചത് ശിവശങ്കറിന്റെ ഇടപെടലാണെന്നു സന്തോഷ് സി.ബി.ഐ. ചോദ്യം ചെയ്യലില് വെളിപ്പെടുത്തി.
യു.എ.ഇ. കോണ്സുലേറ്റും യൂണിടാക്കുമായി 2019 ഓഗസ്റ്റില് കരാറൊപ്പിട്ടശേഷം ഒരാഴ്ച കഴിഞ്ഞാണ് ശിവശങ്കറെ കാണാന് സെക്രട്ടേറിയറ്റില് എത്തിയത്. തുടര്ന്ന്, ലൈഫ് മിഷന് ഓഫീസിലേക്ക് വിളിപ്പിച്ച് സി.ഇ.ഒയെ അന്വേഷിച്ചെങ്കിലും അദ്ദേഹം അന്നവിടെ ഉണ്ടായിരുന്നില്ല. മറ്റൊരു ഉയര്ന്ന ഉദ്യോഗസ്ഥനുമായാണ് സംസാരിച്ചത്. യൂണിടാക്കിന് ലൈഫ് മിഷന് ക്ലിയറന്സ് കൊടുത്തതിനാല് ഫഌറ്റ് നിര്മാണത്തിനാവശ്യമായ അനുമതികള് വടക്കാഞ്ചേരി നഗരസഭയുമായും മറ്റു വകുപ്പുകളുമായി ബന്ധപ്പെട്ട് ചെയ്തു കൊടുക്കണമെന്നായിരുന്നു ശിവശങ്കറിന്റെ നിര്ദേശം. നിര്മാണാനുമതി വേഗം ലഭിക്കാനായി ശിവശങ്കറെ കാണാന് ഉപദേശിച്ചത് സ്വപ്ന സുരേഷാണ്. ശിവശങ്കറിന്റെ ഇടപെടലോടെ എല്ലാ അനുമതിയും വേഗം ലഭിച്ച്, നിര്മാണം തുടങ്ങാന് കഴിഞ്ഞു. എന്നാല്, അദ്ദേഹത്തിന് കമ്മീഷന് നല്കിയിട്ടില്ലെന്നും വഴിവിട്ടു പ്രവര്ത്തിച്ചതായി അറിവില്ലെന്നും സന്തോഷ് മൊഴിനല്കി. ലൈഫ് മിഷന്റെ എല്ലാ കാര്യങ്ങള്ക്കും ചുക്കാന് പിടിച്ചതും അനുമതി നേടാന് സഹായിച്ചതും സ്വപ്നയാണ്.
സെക്രട്ടേറിയറ്റിലെ സി.സി. ടിവി ദൃശ്യങ്ങളില് നിന്നും മറ്റ് ഡിജിറ്റല് രേഖകളില് നിന്നും ശിവശങ്കറിന്റെ ഇടപെടല് സംബന്ധിച്ച തെളിവുകള് സി.ബി.ഐക്ക് ലഭിച്ചു. വൈകാതെ സ്വപ്നയേയും ശിവശങ്കറെയും ചോദ്യംചെയ്യും. യൂണിടാക് ഉടമ നല്കിയ 4.50 കോടി രൂപ കമ്മീഷനില് ഒരു വിഹിതം ശിവശങ്കര് ഉള്പ്പെടെയുള്ള ഉദ്യോഗസ്ഥര്ക്ക് ലഭിച്ചെന്നാണ് സി.ബി.ഐയുടെ സംശയം. ലൈഫ് മിഷന് ഇടപാടുമായി യാതൊരു ബന്ധവുമില്ലെന്നാണു ശിവശങ്കര് മുമ്പ് എന്.ഐ.എക്കു നല്കിയ മൊഴി. 6% കമ്മീഷന് തുകയില് 58 ലക്ഷം രൂപ പി.എസ്. സരിത്തിന്റെയും സ്വപ്നയുടെയും സംയുക്ത അക്കൗണ്ടിലേക്കു നല്കി. കോണ്സുലേറ്റ് ജനറലിനുള്ള 20% കമ്മീഷനില് 3.80 കോടി രൂപ അക്കൗണ്ടന്റായ ഈജിപ്ഷ്യന് പൗരന് ഖാലിദിനു പണമായും കൈമാറിയെന്നാണു യൂണിടാക് ഉടമയുടെ വെളിപ്പെടുത്തല്.
അതേസമയം ഖാലിദ് വാങ്ങിയ പണം മറ്റാര്ക്കെങ്കിലും വീതം വച്ചോയെന്നും സി.ബി.ഐ. പരിശോധിക്കുന്നു. ഖാലിദ് കോണ്സുല് ജനറലിന് നല്കിയ തുകയില്നിന്ന് ഒരുകോടി അദ്ദേഹം സമ്മാനമായി തന്നെന്നാണു സ്വപ്നയുടെ മൊഴി. ബാക്കി ഡോളറാക്കി ജനറലിന് നല്കി. ഇതു സി.ബി.ഐ. വിശ്വസിക്കുന്നില്ല. തുക ഡോളറാക്കാന് സമീപിച്ചവരെ ചോദ്യംചെയ്തപ്പോള് അത്രയും തുക കൈകാര്യം ചെയ്യാന് ശേഷിയുള്ളവരല്ലെന്നു വ്യക്തമായി. പരമാവധി 10,000 ഡോളറേ മാറ്റിയെടുത്തിട്ടുള്ളൂ. ബാക്കി വീതം വച്ചെന്നാണു സി.ബി.ഐ. നിഗമനം.
അതേസമയം മറ്റൊരു സെക്രട്ടറിയെ കൂടി ദേശീയ അന്വേഷണ സംഘം ചോദ്യം ചെയ്യുകയാണ്. ലൈഫ് മിഷന് സി.ഇ.ഒയും തദ്ദേശ വകുപ്പ് സെക്രട്ടറിയുമായ യു.വി ജോസിനെയാണ് സി.ബി.ഐ ചോദ്യം ചെയ്യുന്നത്. അടുത്ത മാസം അഞ്ചിന് ചോദ്യം ചെയ്യലിന് ഹാജരാകാന് സി.ബി.ഐ നോട്ടീസ് നല്കി. കൊച്ചി ഓഫീസില് ഹാജരാകാനാണ് നിര്ദ്ദേശം. ലൈഫ് മിഷനുമായി ബന്ധപ്പെട്ട ഫയലുകള് ഹാജരാക്കാനും ജോസിന് നിര്ദ്ദേശം നല്കി.
ലൈഫ് മിഷന് പദ്ധതിയുമായി ബന്ധപ്പെട്ട് തൃശൂര് ജില്ലാ കോര്ഡിനേറ്റര് ലിന്സ് ഡേവിഡിനെ സി.ബി.ഐ ചോദ്യം ചെയ്തിരുന്നു. ലൈഫ് മിഷനുമായി ബന്ധപ്പെട്ട ഫയലുകള് പരിശോധിക്കുന്നതിനായി സി.ബി.ഐ സംഘം കഴിഞ്ഞ ദിവസം തൃശൂര് ജില്ലാ ഓഫീസില് എത്തിയെങ്കിലും ഇവ വിജിലന്സിന് കൈമാറിയിരുന്നു. തുടര്ന്നാണ് ഇന്ന് ഫയലുകളുമായി ചോദ്യം ചെയ്യലിന് ഹാജരാകാന് അന്വേഷണ സംഘം ആവശ്യപ്പെട്ടത്. യൂണിടെക് ഉടമയുടെ വെളിപ്പെടുത്തലോടു കൂടി ശിവശങ്കറിനെ സിബിഐ ചോദ്യം ചെയ്യുമെന്ന് ഏറെക്കുറെ വ്യക്തമായി.
"
https://www.facebook.com/Malayalivartha