കോഴിക്കോട് നല്ലളം സബ് സ്റ്റേഷന്‍ വളപ്പില്‍ ഇലക്ട്രിക് വാഹനങ്ങള്‍ ചാര്‍ജ് ചെയ്യുന്നതിന് കെഎസ്ഇബിയുടെ ചാര്‍ജിങ് സ്റ്റേഷന്‍ ഒരുങ്ങി. ഒരേസമയം 6 വാഹനങ്ങള്‍ ചാര്‍ജ് ചെയ്യാവുന്ന അത്യാധുനിക സ്റ്റേഷന്‍ അടുത്ത 16-ാം തീയതി മുഖ്യമന്ത്രി പിണറായി വിജയന്‍ നാടിനു സമര്‍പ്പിക്കും. ഇലക്ട്രിക് വെഹിക്കിള്‍ ചാര്‍ജിങ് സ്റ്റേഷനുകള്‍ ദേശീയപാതയോരത്ത് സ്ഥാപിക്കാനുള്ള കെഎസ്ഇബി പദ്ധതിയുടെ ഭാഗമായാണ് നല്ലളത്ത് നിര്‍മാണം പൂര്‍ത്തീകരിച്ചത്. ഉപകരണങ്ങള്‍ സ്ഥാപിച്ച ചാര്‍ജിങ് സ്റ്റേഷന്‍ കഴിഞ്ഞ ദിവസം പ്രവര്‍ത്തനക്ഷമമാക്കി.

ഇലക്ട്രിക് വാഹനങ്ങള്‍ കൂടുതല്‍ നിരത്തിലിറങ്ങുന്നതോടെ കൂടുതല്‍ ചാര്‍ജിങ് കേന്ദ്രങ്ങള്‍ ആവശ്യമായി വരും. 60 കിലോവാട്ട്, 20 കലോവാട്ട് എന്നിങ്ങനെ അതിവേഗ ചാര്‍ജിങ് ശേഷിയുള്ള സംവിധാനമാണ് സജ്ജമാക്കിയത്. ആദ്യഘട്ടത്തില്‍ വൈദ്യുതി ഉപയോഗിച്ചുള്ള ചാര്‍ജിങ് സംവിധാനമാണ് ഒരുക്കിയതെങ്കിലും പിന്നീട് സൗരോര്‍ജം ഉപയോഗപ്പെടുത്താനും കെഎസ്ഇബിക്കു ലക്ഷ്യമുണ്ട്.

ഇലക്ട്രിക് വാഹനങ്ങള്‍ കൂടുതല്‍ നിരത്തിലിറങ്ങുന്ന സ്ഥിതിവിശേഷം മുന്നില്‍ കണ്ടാണ് ദേശീയപാതയോരത്ത് ഭൂമി ലഭ്യമായ ഇടങ്ങളില്‍ കെഎസ്ഇബി സൗകര്യം ഒരുക്കുന്നത്. പെട്രോള്‍ പമ്പുകള്‍, ആശുപത്രികള്‍, മാളുകള്‍, വിവിധ സര്‍ക്കാര്‍ ഓഫിസുകള്‍, തദ്ദേശ സ്ഥാപനങ്ങള്‍ എന്നിവിടങ്ങളില്‍ ഇലക്ട്രിക് വെഹിക്കിള്‍ ചാര്‍ജിങ് സ്റ്റേഷന്‍ സ്ഥാപിക്കാന്‍ അധികൃതര്‍ ലക്ഷ്യമിടുന്നുണ്ട്.

സംസ്ഥാനത്ത് കെഎസ്ഇബിയാണ് ചാര്‍ജിങ് സ്റ്റേഷനുകള്‍ നിര്‍മിക്കുന്നതിന്റെ നോഡല്‍ ഏജന്‍സി. ജില്ലയില്‍ 20 ഇടങ്ങളില്‍ ചാര്‍ജിങ് സ്റ്റേഷന്‍ നിര്‍മിക്കുന്നുണ്ട്.