കളിയിക്കാവിള ബസ് സ്റ്റാന്‍ഡില്‍ കാട്ടാക്കട സ്വദേശികളായ പുരുഷനും സ്ത്രീക്കുമൊപ്പം ബെംഗളൂരുവില്‍ നിന്നു തട്ടിയെടുത്ത അഞ്ചുവയസ്സുകാരിയെ 

കണ്ടെത്തി. ചിത്രം കണ്ടു തിരിച്ചറിഞ്ഞ് കുട്ടിയുടെ രക്ഷിതാക്കള്‍ ബെംഗളൂരുവില്‍ നിന്നും തിരിച്ചിട്ടുണ്ട്. കുട്ടിക്കൊപ്പം കസ്റ്റഡിയിലായവര്‍ ദമ്പതികളാണെന്ന് അവകാശപ്പെടുന്നുണ്ടെങ്കിലും പൊലീസ് ഇവരുടെ പശ്ചാത്തലം അന്വേഷിക്കുകയാണ്.

കാട്ടാക്കട പൂവച്ചല്‍ സ്വദേശി ജോസഫ് ജോണ്‍(55), എസ്തര്‍(48) എന്നിവരാണു കസ്റ്റഡിയിലുള്ളത്. മലയാളം സംസാരിക്കുന്ന മധ്യവയസ്‌കനോടൊപ്പം കളിയിക്കാവിള ബസ് സ്റ്റാന്‍ഡില്‍ പുലര്‍ച്ചെ ബാലികയെ കണ്ടെത്തിയതില്‍ അസ്വാഭാവികത തോന്നിയ പൊലീസ് ചോദ്യം ചെയ്തതോടെ പരസ്പരവിരുദ്ധമായ ഉത്തരങ്ങള്‍ വന്നു. തുടര്‍ന്ന് സ്റ്റേഷനിലെത്തിച്ചു ചോദ്യം ചെയ്തതോടെയാണ് ഒപ്പമുള്ള ആണ്‍കുട്ടി തന്റെ മകനാണെന്നും പെണ്‍കുട്ടിയെ ബെംഗളൂരുവില്‍ നിന്നു തട്ടിയെടുത്തതാണെന്നും ജോസഫ് പറഞ്ഞത്.

ഐസ്‌ക്രീം നല്‍കാമെന്നു പറഞ്ഞ് പെണ്‍കുട്ടിയെ തട്ടിയെടുത്തതാണെന്ന് ഇവര്‍ക്കൊപ്പമുണ്ടായിരുന്ന എട്ടു വയസ്സുകാരന്‍ പൊലീസിനു മൊഴി നല്‍കിയതാണ് സംഭവത്തില്‍ വഴിത്തിരിവായത്. ആണ്‍കുട്ടി തന്റെ ആദ്യഭാര്യയിലെ മകനാണെന്നാണ് ജോസഫ് പൊലീസിനോടു പറഞ്ഞത്.