രോഗികള്‍ എന്തു പിഴച്ചു; ഡോക്ടര്‍മാരുടെ സമരത്തില്‍ വലഞ്ഞ് രോഗികള്‍; ഒ.പി പ്രവര്‍ത്തിക്കുന്നില്ല; ചികില്‍സ നിഷേധിക്കപ്പെട്ട് അവശരായ രോഗികള്‍ മടങ്ങുന്നു; സമരം ആയുര്‍വേദ ഡോക്ടര്‍മാര്‍ക്ക് ശസ്ത്രക്രിയകള്‍ ചെയ്യാന്‍ അനുമതിനല്‍കുന്ന ഉത്തരവില്‍ പ്രതിഷേധിച്ച്
ആയുര്‍വേദ- അലോപ്പതി ഡോക്ടര്‍മാരുടെ പോരില്‍ വലയുന്നത് പാവം രോഗികള്‍. ആയുര്‍വേദ ഡോക്ടര്‍മാര്‍ക്ക് ശസ്ത്രക്രിയകള്‍ ചെയ്യാന്‍ അനുമതിനല്‍കുന്ന ഉത്തരവില്‍ പ്രതിഷേധിച്ചാണ് രാജ്യവ്യാപകമായി നടക്കുന്ന അലോപ്പതി ഡോക്ടര്‍മാര്‍ സമരം നടത്തുന്നത്. അവശരായ രോഗികള്‍ പോലും മടങ്ങിപ്പോകേണ്ട സാഹചര്യമാണ് സംസ്ഥാനത്തെ പല സര്‍ക്കാര്‍ ആശുപത്രികളിലും രാവിലെ മുതല്‍ ഉണ്ടായത്.
ഒ.പി. ബഹിഷ്‌കരിച്ചാണ് ഡോക്ടര്‍മാര്‍ പ്രതിഷേധിക്കുന്നത്. ജില്ലാ ആശുപത്രികളിലും മെഡിക്കല്‍ കോളേജുകളിലുമെത്തുന്ന മറ്റു ജില്ലകളില്‍നിന്നുള്ള രോഗികള്‍ക്കടക്കം മടങ്ങിപ്പോകേണ്ട സാഹചര്യമുണ്ട്. അതേസമയം അത്യാഹിത വിഭാഗത്തിലെത്തുന്ന ചുരുക്കംചില രോഗികള്‍ക്ക് ചികിത്സ ലഭിക്കുന്നുണ്ട്. തിരുവനന്തപുരം മെഡിക്കല്‍ കോളേജില്‍ ഗുരുതര രോഗങ്ങളുമായി എത്തുന്നവരെ ചികിത്സിക്കുമെന്ന് കെജിഎംസിടിഎ സംസ്ഥാന പ്രസിഡന്റ് വ്യക്തമാക്കി. ഐസിയു, അത്യാഹിത വിഭാഗങ്ങള്‍, കോവിഡ് വിഭാഗം എന്നിവയെല്ലാം പ്രവര്‍ത്തിക്കുന്നുണ്ടെന്നും അദ്ദേഹം വ്യക്തമാക്കി.
ഇന്ത്യന്‍ മെഡിക്കല്‍ അസോസിയേഷന്‍ ആഹ്വാനംചെയ്ത സമരത്തില്‍ കെ.ജി.എം.ഒ.എ, കെ.ജി.എം.സി.ടി.എ, കെ.ജി.എസ്.ഡി.എ, കെ. ജി.ഐ.എം.ഒ.എ, കെ.പി.എം.സി.ടി.എ തുടങ്ങിയ ഡോക്ടര്‍മാരുടെ സംഘടനകളും ഐക്യദാര്‍ഢ്യം പ്രഖ്യാപിക്കുകയായിരുന്നു. മുന്‍കൂട്ടി നിശ്ചയിച്ച ശസ്ത്രക്രിയകളും നടത്തില്ലെന്ന് വ്യക്തമാക്കിയിട്ടുണ്ട്. മെഡിക്കല്‍ കോളജുകളിലും സര്‍ക്കാര്‍ ആശുപത്രികളിലും ധാരാളം രോഗികള്‍ എത്തിയിരുന്നു. എന്നാല്‍ പരിശോധനകള്‍ നടത്താന്‍ ഡോക്ടര്‍മാര്‍ തയ്യാറായില്ല.
ചികിത്സ നിഷേധിക്കില്ലെന്നും ഗുരുതരാവസ്ഥയിലുളള രോഗികളെ ചികിത്സിക്കുമെന്നും കെജിഎംസിടിഎ സംസ്ഥാന പ്രസിഡന്റ് ഡോ.ബിനോയ് വ്യക്തമാക്കി. എന്നാല്‍ ബഹിഷ്‌കരണത്തെക്കുറിച്ച് അറിയാതെ മെഡിക്കല്‍ കോളജില്‍ ഉള്‍പ്പെടെ മറ്റ് അസുഖങ്ങളുമായി എത്തിയ രോഗികള്‍ നിരവധിയാണ്. ഇവര്‍ക്കെല്ലാം പൂര്‍ണമായി ചികിത്സ നിഷേധിക്കുന്ന സ്ഥിതിയാണ്. കൊറോണ കാലത്ത് ഒപി ബഹിഷ്‌കരണത്തിലേക്ക് നീങ്ങിയ ഡോക്ടര്‍മാരുടെ നടപടി വ്യാപക വിമര്‍ശനത്തിന് ഇടയാക്കിയിട്ടുണ്ട്. സെന്‍ട്രല്‍ കൗണ്‍സില്‍ ഓഫ് ഇന്ത്യന്‍ മെഡിസിന്റെ ഉത്തരവില്‍ പ്രതിഷേധിച്ചാണ് അലോപ്പതി ഡോക്ടര്‍മാര്‍ പ്രത്യക്ഷ സമരത്തിന് ഇറങ്ങിയത്. തീരുമാനം വന്നപ്പോള്‍ മുതല്‍ ഇതിനെതിരേ അലോപ്പതി ഡോക്ടര്‍മാര്‍ ശബ്ദമുയര്‍ത്തിയിരുന്നു.
https://www.facebook.com/Malayalivartha
