സര്വേ പോകുന്ന പോക്ക്... കാത്തുകാത്തിരുന്ന മുഖ്യമന്ത്രി പദം ഉമ്മന്ചാണ്ടി അടിച്ചുകൊണ്ട് പോയതിന് പിന്നാലെ ഡല്ഹിയില് നിന്നും അമ്പരപ്പിക്കുന്ന റിപ്പോര്ട്ട്; കേരളത്തിലും ബംഗാളിലും ഭരണത്തുടര്ച്ചയെന്ന് എബിപിസി വോട്ടര് സര്വേ പ്രവചനം
മുഖ്യമന്ത്രി പിണറായി വിജയനെ മാറ്റാനിരുന്ന കോണ്ഗ്രസ് നേതാക്കള് സ്വയം മാറുന്ന കാഴ്ചയാണ് കണ്ടത്. ചെന്നിത്തല വന്നാല് ന്യൂനപക്ഷം വോട്ട് ചെയ്യില്ലെന്ന് വന്നതോടെ ഉമ്മന്ചാണ്ടിയെ മുന്നില് നിര്ത്തി പട നയിക്കാനാണ് കോണ്ഗ്രസ് ഹൈക്കമാന്ഡ് നല്കിയിരിക്കുന്ന നിര്ദേശം.
അതീവ പ്രാധാന്യമുള്ള നിയമസഭാ പോരാട്ടത്തില് ഉമ്മന് ചാണ്ടി മുന്നിരയിലുണ്ടാവണമെന്ന നിര്ദേശം അവസാനം കോണ്ഗ്രസ് ഹൈക്കമാന്ഡ് എടുത്തു. മുന് മുഖ്യമന്ത്രിക്കു യോജിച്ച പദവിയെന്ന നിലയിലാണ്, തിരഞ്ഞെടുപ്പുമായി ബന്ധപ്പെട്ട നിര്ണായക സമിതിയുടെ അധ്യക്ഷനായി അദ്ദേഹത്തെ നിര്ദേശിച്ചത്. പാര്ട്ടി ഏല്പിക്കുന്ന ഏത് ഉത്തരവാദിത്തവും ഏറ്റെടുക്കാന് തയാറാണെന്ന് അടുത്തിടെ കേരളം സന്ദര്ശിച്ച എഐസിസി ജനറല് സെക്രട്ടറി താരിഖ് അന്വറിനെ ഉമ്മന് ചാണ്ടി അറിയിച്ചിരുന്നു.
ഇക്കാര്യം ഇടക്കാല പ്രസിഡന്റ് സോണിയ ഗാന്ധിയെയും രാഹുല് ഗാന്ധിയെയും താരിഖ് അറിയിച്ചു. പ്രതിപക്ഷ നേതാവ് രമേശ് ചെന്നിത്തല, കെപിസിസി പ്രസിഡന്റ് മുല്ലപ്പള്ളി രാമചന്ദ്രന്, സംഘടനാ ചുമതലയുള്ള എഐസിസി ജനറല് സെക്രട്ടറി കെ.സി. വേണുഗോപാല് എന്നിവരുടെ കൂടി അഭിപ്രായമാരാഞ്ഞ ശേഷമാണു ഉമ്മന് ചാണ്ടിയുടെ നേതൃത്വത്തിലുള്ള സമിതിക്കു ഹൈക്കമാന്ഡ് അംഗീകാരം നല്കിയത്. തെരഞ്ഞെടുപ്പില് ഉമ്മന് ചാണ്ടി മുന്നിരയിലുണ്ടാവണമെന്ന മുസ്ലിം ലീഗിന്റെ നിര്ദേശവും ഹൈക്കമാന്ഡ് കണക്കിലെടുത്തു.
ഇങ്ങനെ കോണ്ഗ്രസിലെ തമ്മില് തല്ലിന് ഉമ്മന്ചാണ്ടിയിലൂടെ താത്ക്കാലിക പരിഹാരം ഉണ്ടായപ്പോള് ഡല്ഹിയില് നിന്നും തന്നെ മറ്റൊരു പ്രവചനമാണ് വന്നിരിക്കുന്നത്. അതില് ചെന്നിത്തലയുടെ പേരുപോലുമില്ല. എബിപി നെറ്റ്വര്ക്കും സി വോട്ടറും ചേര്ന്നു നടത്തിയ അഭിപ്രായ വോട്ടെടുപ്പില് നിയമസഭയിലേക്ക് കേരളത്തില് എല്ഡിഎഫിനും ബംഗാളില് തൃണമൂലിനും മുന്തൂക്കം. തമിഴ്നാട്ടില് യുപിഎ സഖ്യത്തിനും പുതുച്ചേരിയിലും അസമിലും എന്ഡിഎയ്ക്കുമാണ് മേല്ക്കൈ. ഒക്ടോബര്-ഡിസംബറില് 12 ആഴ്ചകളിലായായിരുന്നു സര്വേ.
കേരളം: 6000 പേരാണ് സര്വേയില് പങ്കെടുത്തത്. എല്ഡിഎഫിന് 41.6% വോട്ട്, 81 മുതല് 89 വരെ സീറ്റ്; യുഡിഎഫിന് 34.6% വോട്ട്, 49 മുതല് 57 സീറ്റ്, ബിജെപിക്ക് 15.3% വോട്ട്, 0 മുതല് 2 സീറ്റ്; മറ്റുള്ളവര്ക്ക് 8.5% വോട്ട്, 0 മുതല് 2 സീറ്റ്.
മുഖ്യമന്ത്രി സ്ഥാനത്തിനു യോജിച്ചത് പിണറായി വിജയനെന്ന് 46.7% പേര്, ഉമ്മന് ചാണ്ടിയെന്ന് 22.3%, മൂന്നാമതുള്ളത് ആരോഗ്യ മന്ത്രി ശൈലജ ടീച്ചര് (6.3%).
ബംഗാള്: തൃണമൂല് 43% വോട്ട്, 154 മുതല് 163 സീറ്റ്; ബിജെപി 37.5% വോട്ട്, 98 മുതല് 106 സീറ്റ്; കോണ്ഗ്രസ്, ഇടത് കൂട്ടുകെട്ടിന് 11.8% വോട്ട്, 26 മുതല് 34 സീറ്റ്.
മുഖ്യമന്ത്രി സ്ഥാനത്തേക്ക് മമത ബാനര്ജിക്ക് 49%, ദിലീപ് ഘോഷ് 19%, സൗരവ് ഗാംഗുലിക്ക് 13% എന്നിങ്ങനെ പിന്തുണ.
തമിഴ്നാട്: യുപിഎ 41.1% വോട്ട്, 158 മുതല് 166 സീറ്റ്; എന്ഡിഎ 28.7% വോട്ട്, 60 മുതല് 68 സീറ്റ്. മുഖ്യമന്ത്രിസ്ഥാനത്തേക്ക് എം.കെ. സ്റ്റാലിനെന്ന് 36.4% പേരും ഇ.കെ. പളനിസ്വാമിയെന്ന് 25.5% പേരും.
അങ്ങനെ തദ്ദേശ തെരഞ്ഞെടുപ്പോടെ പിണറായി വിജയന് നാടുകടക്കുമെന്ന് കരുതിയിരുന്നവര്ക്കെല്ലാം തെറ്റി. ദേശീയ തലത്തില് നടത്തിയ സര്വേയില് പോലും പിണറായി വിജയന് ഒന്നാമതാണ്. ചെന്നിത്തല 6000 രൂപ ജനങ്ങള്ക്ക് പ്രഖ്യാപിച്ചിട്ടും ഹൈക്കനാമ്ഡിന് പോലും വിശ്വാസമില്ല. അതിനാല് തന്നെ ചെന്നിത്തലെ ഒതുക്കി ഉമ്മന്ചാണ്ടിയെ രംഗത്തിറക്കി. ബാക്കിയെല്ലാം തെരഞ്ഞെടുപ്പ് ഗോദയില്.
"
https://www.facebook.com/Malayalivartha