പാകിസ്ഥാന്‍ രണ്ടാം പോരാട്ടത്തില്‍ തിരികെയെത്തി . ജയത്തോടെ അവര്‍ പരമ്പര സമനിലയിലാക്കി. ഇതോടെ മൂന്നാമത്തേയും അവസാനത്തേയും പോരാട്ടം ഇരു ടീമുകള്‍ക്കും നിര്‍ണായകമായി മാറി. രണ്ടാം പോരാട്ടത്തില്‍ 128 റണ്‍സിന്റെ വമ്പന്‍ ജയമാണ് പാകിസ്ഥാന്‍ ആഘോഷിച്ചത്. ആദ്യം ബാറ്റ് ചെയ്ത പാകിസ്ഥാന്‍ 47.3 ഓവറില്‍ 274 റണ്‍സില്‍ പുറത്തായി.

ബംഗ്ലാദേശിന്റെ പോരാട്ടം 23.3 ഓവറില്‍ വെറും 114 റണ്‍സില്‍ അതിവേഗം അവസാനിപ്പിച്ച് പാകിസ്ഥാന്‍ ത്രില്ലര്‍ ജയം സ്വന്തമാക്കുകയായിരുന്നു.

ഓപ്പണിങ് ഇറങ്ങി അര്‍ധ സെഞ്ച്വറി നേടുകയും ബംഗ്ലാദേശിന്റെ 3 വിക്കറ്റുകള്‍ വീഴ്ത്തുകയും ചെയ്ത മാസ് സദാഖതിന്റെ ഓള്‍ റൗണ്ട് മികവാണ് പാകിസ്ഥാന് ജയമൊരുക്കിയത്. ടി20 ക്യാപ്റ്റന്‍ സല്‍മാന്‍ ആഘയും പാകിസ്ഥാനു വേണ്ടി തിളങ്ങി. താരവും അര്‍ധ സെഞ്ച്വറി നേടി.

ആദ്യം ബാറ്റ് ചെയ്ത പാകിസ്ഥാന് ഓപ്പണര്‍മാര്‍ മിന്നും തുടക്കമാണ് നല്‍കിയിട്ടുള്ളത്. മാസ് സദാഖത് 46 പന്തില്‍ 5 സിക്‌സും 6 ഫോറും സഹിതം 75 റണ്‍സെടുത്തു. സഹ ഓപ്പണര്‍ സാഹിബ്‌സാദ ഫര്‍ഹാന്‍ 31 റണ്‍സെടുത്തു. ഇരുവരും ചേര്‍ന്നു 13 ഓവറില്‍ പാക് സ്‌കോര്‍ 103ല്‍ എത്തിച്ചാണ് പിരിഞ്ഞത്. പിന്നീട് നാലാം വിക്കറ്റില്‍ ഒന്നിച്ച സല്‍മാന്‍ ആഘ- മുഹമ്മദ് റിസ്വാന്‍ സഖ്യവും പാകിസ്ഥാനായി തിളങ്ങി.

109 റണ്‍സാണ് സഖ്യം ബോര്‍ഡില്‍ ചേര്‍ത്തത്. സല്‍മാന്‍ ആഘ 62 പന്തില്‍ 7 ഫോറും 2 സിക്‌സും സഹിതം 64 റണ്‍സെടുത്തു. മുഹമ്മദ് റിസ്വാന്‍ 44 റണ്‍സും കണ്ടെത്തി.എന്നാല്‍ മധ്യനിരയും വാലറ്റവും പൊരുതാന്‍ നില്‍ക്കാതെ അതിവേഗം കീഴടങ്ങിയതോടെ പാക് സ്‌കോര്‍ 300 കടന്നില്ല.