തെരഞ്ഞെടുപ്പില്‍ ജയിക്കാനുള്ള അവസാന അടവായി കോണ്‍ഗ്രസ് ബോധപൂര്‍വം ശബരിമല വിഷയം കൊണ്ടു വരുമ്പോള്‍ അത് ചര്‍ച്ചയാക്കാതെ ഒഴിവാക്കാനാണ് സിപിഎമ്മുകാര്‍ ശ്രമിക്കുന്നത്. ചാനല്‍ ചര്‍ച്ചകളില്‍ പോലും ശബരിമല വിഷയമാണെങ്കില്‍ പങ്കെടുക്കാനും അവരെ കിട്ടില്ല.

ഇങ്ങനെയിരിക്കെയാണ് പാര്‍ട്ടിക്ക് തലവേദനയായി പഴയ ബിന്ദു അമ്മിണി രംഗത്തു വരുന്നത്. രാത്രിയുടെ മറവില്‍ പാര്‍ട്ടിക്കാരായ പോലീസുകാരുടെ പിന്തുണയോടെ ശബരിമലയില്‍ കയറ്റിയെന്ന് പ്രതിപക്ഷം ആരോപിക്കുന്നയാളാണ് ബിന്ദു അമ്മിണി. അവര്‍ നേരിട്ട് രംഗത്തെത്തിയതോടെ ശബരിമല വിഷയം വീണ്ടും ചൂട് പിടിക്കുകയാണ്.

ശബരിമലയുമായി ബന്ധപ്പെട്ട കരട് നിയമം പുറത്തിറക്കിയ കോണ്‍ഗ്രസിനെ വിമര്‍ശിച്ചാണ് ബിന്ദു അമ്മിണി രംഗത്തെത്തിയത്. കോണ്‍ഗ്രസിന്റേത് തട്ടിക്കൂട്ട് പൊറാട്ട് നാടകം മാത്രമാണെന്നും അത് ബിജെപിയിലേക്കും സംഘ്പരിവാറിലേക്കും ആളുകളെ റിക്രൂട്ട് ചെയ്യാന്‍ ഉദ്ദേശിച്ചുകൊണ്ടുള്ളതാണെന്നും അവര്‍ കുറ്റപ്പെടുത്തി. ഒരു മലയാളം സ്വകാര്യ വാര്‍ത്താ ചാനലിന്റെ ചര്‍ച്ചാ പരിപാടിയിലാണ് ആക്ടിവിസ്റ്റ് ഇങ്ങനെ പ്രതികരിച്ചത്.

കേരളത്തിലെ ജനങ്ങളെ ബാധിക്കുന്ന മറ്റനേകം വിഷയങ്ങള്‍ ഉണ്ടായിട്ടും അവയെ അഭിമുഖീകരിക്കാതെ ഒളിച്ചോടിക്കൊണ്ട് കോണ്‍ഗ്രസ് വേറൊരു വിഷയം എടുത്തിട്ടിരിക്കുകയാണെന്നും ബിന്ദു അമ്മിണി പറയുന്നു. കോണ്‍ഗ്രസിന്റെ ദേശീയ നേതാക്കള്‍ക്കും പ്രാദേശിക നേതാക്കള്‍ക്കും ഈ വിഷയത്തില്‍ രണ്ട് നിലപാടാണ് ഉള്ളതെന്ന് താന്‍ സംശയിക്കുന്നതായും അവര്‍ പറഞ്ഞു.

ലോകം മുഴുവന്‍ സ്ത്രീകളുടെ അവകാശങ്ങള്‍ പരിഗണിച്ചുകൊണ്ട് മുന്നോട്ട് പോകുമ്പോള്‍ അങ്ങേയറ്റം സ്ത്രീവിരുദ്ധമായ ശാസ്ത്രവിരുദ്ധമായ കരട് നിയമമാണ് കോണ്‍ഗ്രസ് പുറത്തുവിട്ടിരിക്കുന്നതെന്ന് പറഞ്ഞുകൊണ്ട് 'ഈ ആളുകള്‍ക്ക് നാണമില്ലേ' എന്നും അവര്‍ പൊട്ടിത്തെറിച്ചു. നീതിപീഠത്തിലും ഭരണഘടനയിലും വിശ്വാസമില്ലാത്തത് കൊണ്ടാണ് കോണ്‍ഗ്രസ് ഇങ്ങനെയൊരു ബില്ല് പുറത്തിറക്കിയതെന്നും അവര്‍ പറഞ്ഞു.

ശബരിമല യുവതീപ്രവേശന നിയമം നടപ്പാക്കാന്‍ ബാദ്ധ്യതയുള്ള സര്‍ക്കാര്‍ അത് ചെയ്യാത്തതില്‍ തനിക്ക് വിമര്ശനമുണ്ടെന്നും ബിന്ദു അമ്മിണി പറഞ്ഞു. ശബരിമലയില്‍ തനിക്ക് പ്രവേശിക്കാന്‍ സാധിച്ചത് സര്‍ക്കാര്‍ അതിന്റെ ഭരണഘടനാപരമായ ഉത്തരവാദിത്വം നിറവേറ്റിയത് കൊണ്ടാണ്. എന്നാല്‍ സ്ത്രീസുരക്ഷയുമായും ലിംഗസമത്വവുമായും ബന്ധപ്പെട്ട നിലപാടില്‍ നിന്നും സര്‍ക്കാര്‍ പിന്നോട്ട് പോകുകയാണെങ്കില്‍ വളരെ വലിയ തിരിച്ചടികള്‍ നേരിടേണ്ടി വരുമെന്നും അവര്‍ പറയുന്നു.

അതേസമയം ശബരിമല വിഷയത്തില്‍ സി.പി.എമ്മിനെതിരെ വീണ്ടും ആഞ്ഞടിച്ച് പ്രതിപക്ഷ നേതാവ് രമേശ് ചെന്നിത്തല വീണ്ടും രംഗത്തെത്തി. ശബരിമല എന്ന് കേള്‍ക്കുമ്പോള്‍ സി.പി.എം ഭയക്കുകയാണ്. യുഡിഎഫ് വിശ്വാസികള്‍ക്ക് ഒപ്പമാണ്. വിശ്വാസം തകര്‍ക്കാന്‍ ആര് ശ്രമിച്ചാലും അനുവദിക്കില്ലെന്നും ചെന്നിത്തല പറഞ്ഞു.

വിഷയത്തില്‍ സി.പി.എം ആരോടൊപ്പമാണെന്ന് വ്യക്തമാക്കണം. നിലപാട് തെറ്റിയെന്ന് പറയാനുള്ള ആര്‍ജ്ജവം പിണറായി കാണിക്കണം. പരസ്യമായി നിലപാടിനെ കുറിച്ച് മാപ്പ് ചോദിച്ചാല്‍ സി.പി.എമ്മിനെ അംഗീകരിക്കാം. സത്യവാങ്മൂലം മാറ്റാന്‍ തയ്യാറുണ്ടോ എന്നും ചെന്നിത്തല ചോദിച്ചു.

കേരളത്തില്‍ ഇടത് മുന്നണി ഇഷ്ടക്കാരെ ജോലിയില്‍ തിരുകി കയറ്റുന്നുവെന്നും രമേശ് ചെന്നിത്തല പറഞ്ഞു. യു.ഡി.എഫ് അധികാരത്തില്‍ വന്നാല്‍ അനധികൃത നിയമനങ്ങള്‍ പുനഃപരിശോധിക്കും. അഴിമതിയുടെ ചെളിക്കുണ്ടില്‍ വീണ സര്‍ക്കാരാണ് പിണറായി സര്‍ക്കാരെന്നും ചെന്നിത്തല ആരോപിച്ചു.