ഡബ്ബിങ് ആര്‍ട്ടിസ്റ്റ് ഭാഗ്യലക്ഷ്മിക്കെതിരേ അപവാദകരമായ വീഡിയോ യൂട്യൂബില്‍ അപ് ലോഡ് ചെയ്തതിന് സംവിധായകന്‍ ശാന്തിവിള ദിനേശ് അറസ്റ്റില്‍ എന്ന തലക്കെട്ടോടെയാണ് ഇന്നലെ ഉച്ച മുതല്‍ ചാനലുകളിലും ഓണ്‍ലൈന്‍ മാധ്യമങ്ങളിലും വാര്‍ത്ത വന്നത്.

തിരുവനന്തപുരം സൈബര്‍ പോലീസ് ആണ് അറസ്റ്റ് ചെയ്തതതെന്നും ജാമ്യത്തില്‍ വിട്ടയച്ചു എന്നും അതോടൊപ്പം ഉണ്ടായിരുന്നു. സംഗതി സകല മലയാളികളും വിശ്വസിച്ചു. കാരണം ഈ കേസ് നേരത്തെ ചര്‍ച്ചയായിരുന്നു.

തന്നെ പറ്റി അപവാദ പരാമര്‍ശമുള്ള വീഡിയോ യുട്യൂബില്‍ അപ്ലോഡ് ചെയ്‌തെന്ന് കാണിച്ച് മുഖ്യമന്ത്രിക്കും ഡിജിപിക്കും ഭാഗ്യലക്ഷ്മി പരാതി നല്‍കിയിരുന്നു. തുടര്‍ന്നാണ് അറസ്റ്റെന്നായിരുന്നു വാര്‍ത്ത.

തന്റെ സ്വകാര്യ ജീവിതത്തെ അപമാനിക്കുന്ന പരാമര്‍ശങ്ങള്‍ ദിനേശ് സമൂഹമാധ്യമങ്ങളിലൂടെ നടത്തിയെന്നായിരുന്നു പരാതി. ഭാഗ്യലക്ഷ്മിയുടെ മൊഴിയെടുത്ത പോലീസ് ശാന്തിവിള ദിനേശിനെ വിളിച്ചുവരുത്തി ഒരുവട്ടം താക്കീത് നല്‍കിയിരുന്നു.

ഈ കേസില്‍ ഇയാള്‍ മുന്‍കൂര്‍ ജാമ്യം തേടിയിരുന്നു. തുടര്‍ന്നും വീണ്ടും പരമാര്‍ശം നടത്തിയതിനെത്തുടര്‍ന്നാണ് വീണ്ടും പരാതി നല്‍കിയതും അറസ്റ്റ് രേഖപ്പെടുത്തിയതും. ഇങ്ങനെയാണ് വാര്‍ത്ത പോയ പോക്ക്. ഇതോടെ സംവിധായകന്‍ ശാന്തിവിള രമേശ് തന്നെ രംഗത്തെത്തുകയായിരുന്നു.

എന്നെ അറസ്റ്റ് ചെയ്‌തെന്നാണ് മാദ്ധ്യമങ്ങളിലൂടെ പ്രചരിക്കുന്ന വാര്‍ത്ത. എനിക്ക് ജനുവരി 21ന് മുന്‍കൂര്‍ ജാമ്യം ലഭിച്ചിരുന്നു. ജാമ്യവ്യവസ്ഥയുടെ ഭാഗമായാണ് അന്വേഷണ ഉദ്യോഗസ്ഥനെ കാണാന്‍ പോയത്. ഈ വാര്‍ത്തയ്ക്ക് പിന്നില്‍ ആരാണെന്ന് വ്യക്തമായി അറിയാം എന്നാണ് ശാന്തിവിള ദിനേശ് പറഞ്ഞത്. ഇതോടെ വാര്‍ത്ത മാറി മറിഞ്ഞു.

ഡബ്ബിംഗ് ആര്‍ട്ടിസ്റ്റ് ഭാഗ്യലക്ഷ്മി നല്‍കിയ പരാതിയില്‍ സംവിധായകന്‍ ശാന്തിവിള ദിനേശിനെ സൈബര്‍ പൊലീസ് ചോദ്യം ചെയ്തശേഷം വിട്ടയച്ചു എന്നായി വാര്‍ത്ത മാറി. ഭാഗ്യലക്ഷ്മിയുടെ രണ്ടാമത്തെ പരാതിയിലാണ് നടപടി. യു ട്യൂബ് ചാനലിലൂടെ സ്വകാര്യ ജീവിതത്തെ മോശമായി ചിത്രീകരിക്കുന്ന പരാമര്‍ശങ്ങള്‍ ശാന്തിവിള ദിനേശ് നടത്തിയെന്നാണ് ഭാഗ്യലക്ഷ്മിയുടെ പരാതി. മുഖ്യമന്ത്രിയും സംസ്ഥാന പോലീസ് മേധാവി ലോക്‌നാഥ് ബെഹ്‌റയ്ക്കുമാണ് പരാതി കൈമാറിയത്.

മുന്‍കൂര്‍ ജാമ്യം നേടിയിട്ടുള്ളതിനാല്‍ ചോദ്യം ചെയ്തശേഷം ദിനേശിനെ വിട്ടയക്കുകയായിരുന്നു. നേരത്തെ തന്നെ വീഡിയോയും നീക്കം ചെയ്തിരുന്നു. മുന്‍പും ദിനേശിനെതിരെ ഭാഗ്യലക്ഷ്മി പരാതി നല്‍കിയിരുന്നു. അന്ന് ദിനേശിനെ സ്‌റ്റേഷനില്‍ വിളിച്ച് താക്കീത് നല്‍കിയിരിന്നു. ഇതിന് പിന്നാലെയാണ് ചോദ്യം ചെയ്യാന്‍ വിളിച്ചു വരുത്തിയത്.


വിവാദ യൂട്യൂബ് വീഡിയോ ഇട്ട വിജയ് പി.നായരെ കൈയേറ്റംചെയ്‌തെന്ന കേസില്‍ ഡബ്ബിങ് ആര്‍ട്ടിസ്റ്റ് ഭാഗ്യലക്ഷ്മി, ദിയ സന, ശ്രീലക്ഷ്മി എന്നിവര്‍ക്ക് അടുത്തിടേയാണ് ഹൈക്കോടതി മുന്‍കൂര്‍ ജാമ്യം അനുവദിച്ചത്.

നിയമം കൈയിലെടുക്കുന്നത് തെറ്റായ മാതൃകയാകുമെന്നാണ് ജസ്റ്റിസ് അശോക് മേനോന്‍ ഓര്‍മിപ്പിച്ചത്. നിയമം നടപ്പാക്കാനെന്നപേരിലുള്ള അത്തരം നടപടികളെ നിയന്ത്രിക്കേണ്ടതാണ്. അല്ലെങ്കിലത് ആള്‍ക്കൂട്ടാധിപത്യം, നിയമരാഹിത്യം, അരാജകത്വം എന്നിവയ്ക്ക് വഴിവെക്കും. ഓരോരുത്തരും തനിക്ക് ശരിയെന്നുതോന്നുന്നതിനുവേണ്ടി നിയമം കൈയിലെടുത്താല്‍ കലാപമാവും ഫലം.

അത്തരം പ്രവൃത്തികള്‍ അംഗീകരിക്കാനാവില്ലെങ്കിലും അത് ഹര്‍ജിക്കാരെ ജയിലിലേക്കയച്ച് ഒരുപാഠം പഠിപ്പിക്കത്തക്ക കാരണമാവുന്നില്ലെന്ന് കോടതി വ്യക്തമാക്കി. ജാമ്യം അനുവദിക്കുന്നത് മറ്റുപല മാനദണ്ഡങ്ങള്‍കൂടി പരിഗണിച്ചാണ്. ജാമ്യം നല്‍കുന്നത് തെറ്റായ സന്ദേശം നല്‍കുമെന്ന കാരണംകൊണ്ടുമാത്രം ഹര്‍ജി തള്ളാനാവില്ല.

ജാമ്യം അനുവദിക്കുന്ന ഈ ഉത്തരവിലെ നിഗമനങ്ങള്‍ വിചാരണക്കോടതിയെ ബാധിക്കരുതെന്നും കോടതി പറഞ്ഞു. അന്ന് ഏറെ വിവാദമായ ഈ കേസിന് ശേഷം ഇപ്പൊഴാണ് വീണ്ടും ചര്‍ച്ചയാകുന്നത്.