ശരിക്കും ബാഹുബലി പോലെയാണ് തമിഴ് രാഷ്ട്രീയം മാറുകയാണ്. രാജമാതാവും കട്ടപ്പമാരും കളം നിറയുകയാണ്. ബെംഗളുരുവില്‍ 4 വര്‍ഷത്തെ ജയില്‍ ശിക്ഷയും രണ്ടാഴ്ചത്തെ കോവിഡ് ചികിത്സയും കഴിഞ്ഞ് അണ്ണാഡിഎംകെ മുന്‍ ജനറല്‍ സെക്രട്ടറി ശശികല ഇന്നു ചെന്നൈയിലെത്തുമ്പോള്‍ സൂപ്പര്‍താര ചിത്രത്തിന്റെ റിലീസിനു സമാനമായ ആകാംക്ഷയില്‍ തമിഴക രാഷ്ട്രീയം.

ശശികലയെ രാജ മാതാ ആയി വിശേഷിപ്പിക്കുന്ന പോസ്റ്ററുകള്‍ ചെന്നൈയില്‍ നിറഞ്ഞു കഴിഞ്ഞു. അതിനിടെ ബെംഗളരുവില്‍ നിന്നും ശശികല തമിഴ്‌നാട്ടിലേക്ക് പുറപ്പെട്ടിട്ടുണ്ട്.

അണ്ണാഡിഎംകെ കേന്ദ്രങ്ങളില്‍ നിന്നുയരുന്നത് ആശങ്കയില്‍ പൊതിഞ്ഞ ജാഗ്രതയാണ്. കാത്തിരുന്നു കാണാന്‍ ഡിഎംകെ. തുടര്‍നീക്കങ്ങളില്‍ നിര്‍ണായകമാകുക ബിജെപിയുടെ നിലപാട്. ജയിലില്‍ പോകുമ്പോള്‍ അണ്ണാഡിഎംകെ ജനറല്‍ സെക്രട്ടറിയായിരുന്നു ശശികല. തിരിച്ചെത്തുമ്പോള്‍, പാര്‍ട്ടിയും സര്‍ക്കാരും പളനിസാമി, പനീര്‍സെല്‍വം ഇരട്ട നേതൃത്വത്തിന്റെ പിടിയില്‍.

വി.കെ.ശശികല ഇന്ന് ചെന്നൈയിലെത്താനിരിക്കെ, അനധികൃത സ്വത്ത് സമ്പാദനക്കേസിലെ കൂട്ടുപ്രതികളായ ഇളവരശി, വി.എന്‍. സുധാകരന്‍ എന്നിവരുടെ പേരില്‍ ചെന്നൈയിലുള്ള 6 സ്വത്തുവകകള്‍ കണ്ടുകെട്ടി സര്‍ക്കാര്‍. ശശികലയുടെ സഹോദര ഭാര്യയാണ് ഇളവരശി. സഹോദരീ പുത്രനും ടി.ടി.വി. ദിനകരന്റെ സഹോദരനുമാണു സുധാകരന്‍.



അനധികൃത സ്വത്ത് സമ്പാദനക്കേസില്‍ ശിക്ഷയുടെ ഭാഗമായി പ്രതികള്‍ക്കു 100 കോടി രൂപ പിഴ വിധിച്ചിരുന്നു. ഇതിന്റെ ഭാഗമായാണു ചെന്നൈ കലക്ടര്‍ ഇളവരശിയുടെയും സുധാകരന്റെയും പേരിലുള്ള സ്വത്തുവകകള്‍ കണ്ടുകെട്ടിയത്. ജയില്‍ മോചിതയായ ഇളവരശിയും ശശികലയ്‌ക്കൊപ്പം ചെന്നൈയിലെത്തും.

10 കോടി രൂപ പിഴ അടയ്ക്കാത്തതിനാല്‍ സുധാകരന്‍ ഇതുവരെ ജയില്‍ മോചിതനായിട്ടില്ല. ശ്രീറാം റോഡിലെ വസ്തു, വാലസ് എസ്‌റ്റേറ്റിലെ 5 വസ്തുക്കള്‍ എന്നിവയാണു കണ്ടുകെട്ടിയത്.

അതേസമയം തിരിച്ചുവരവ് ശക്തിപ്രകടനമാക്കി മാറ്റുന്നതു തടയാന്‍ അണ്ണാഡിഎംകെ രംഗത്തെത്തിയിട്ടുണ്ട്. ക്രമസമാധാനം തകര്‍ക്കാന്‍ ശശികലയും അനന്തരവന്‍ ടി.ടി.വി. ദിനകരനും പദ്ധതിയിട്ടിട്ടുണ്ടെന്നും തടയണമെന്നുമാവശ്യപ്പെട്ട് പാര്‍ട്ടി നേതാക്കള്‍ ഡിജിപിക്കു പരാതി നല്‍കി.

ചെന്നൈയില്‍ 12 ഇടത്ത് ശശികല അണ്ണാഡിഎംകെ പതാകയുയര്‍ത്തുമെന്നു സൂചനയുണ്ട്. ഇതു സമ്മതിക്കരുതെന്നാവശ്യപ്പെട്ടു മന്ത്രിമാര്‍ പരാതി നല്‍കിയിരുന്നു. ചെന്നൈയില്‍ സ്വീകരണ ഘോഷയാത്ര നടത്താന്‍ പൊലീസ് അനുമതി നല്‍കിയിട്ടില്ല. പാര്‍ട്ടിക്കുള്ളില്‍ 'ചിന്നമ്മ അനുകൂല' സ്വരമുയരുന്നതു തടയാനായി അണ്ണാഡിഎംകെ ജില്ലാ സെക്രട്ടറിമാരുടെ അടിയന്തര യോഗം വിളിച്ചു. ഇന്ന് രാവിലെ 9.30ന് ബെംഗളുരുവിലെ റിസോര്‍ട്ടില്‍ നിന്നു ശശികല പുറപ്പെടും.

ബെംഗളൂരു മുതല്‍ ചെന്നൈ വരെ 32 ഇടങ്ങളിലാണ് സ്വീകരണ പരിപാടികള്‍. ടി നഗറിലുള്ള എംജിആറിന്റെ വസതിയിലെത്തി പ്രാര്‍ത്ഥിച്ച ശേഷം ശശികല പ്രവര്‍ത്തകരെ കാണും. ശശികലയ്‌ക്കൊപ്പം ഇളവരശിയും ചെന്നൈയിലേക്ക് എത്തും. ശശികലയുടെ വരവിനോടനുബന്ധിച്ച് അണ്ണാ ഡിഎംകെ ആസ്ഥാനത്തും പൊയസ് ഗാര്‍ഡനിലെ ജയ സ്മാരകത്തിലും സുരക്ഷ കൂട്ടിയിട്ടുണ്ട്. തമിഴ്‌നാട് കര്‍ണാടക അതിര്‍ത്തിയില്‍ 1500 പൊലീസുകാരെ വിന്യസിച്ചിട്ടുണ്ട്.

ദേവനഹള്ളിയിലെ റിസോര്‍ട്ടില്‍ നിന്ന് ശശികല ഹൊസൂറിലേക്കെത്തുമെന്നാണ് അറിയിച്ചിരിക്കുന്നത്. ഇത് തമിഴ്‌നാട് അതിര്‍ത്തിയാണ്. ഇവിടേക്ക് നിരവധി ശശികല അനുകൂലികളാണ് എത്തിക്കൊണ്ടിരിക്കുന്നത്. ജയ സമാധിയിലേക്കുള്ള റാലിക്ക് അനുമതിയുണ്ടെന്നാണ് ദിനകര പക്ഷം പറയുന്നത്.

എന്നാല്‍, അനുമതി നല്‍കിയിട്ടില്ലെന്ന് പൊലീസും പറയുന്നു. അതിനിടെ ജയാസമാധിയും എംജിആര്‍ സ്മാരകവും പൂട്ടിയെന്ന വാര്‍ത്തയും വരുന്നുണ്ട്. അതുകൊണ്ടുതന്നെ തമിഴ്‌നാട് രാഷ്ട്രീയത്തില്‍ ഇനിയെന്തൊക്കെ സംഭവിക്കുമെന്ന ആകാംക്ഷയാണ് ബാക്കിയാകുന്നത്.