ശബരി മലയില്‍ സുപ്രീം കോടതി വിധി എതിരായാല്‍ കേന്ദ്രം നിയമനിര്‍മ്മാണം നടത്തുമെന്ന വാഗ്ദാനം മുന്നോട്ടു വയ്ക്കാന്‍ ബിജെപി ആലോചിക്കുന്നതിനിടയിലാണ് കോണ്‍ഗ്രസ് നിയമ നിര്‍മ്മാണ വാഗ്ദാനവുമായി രംഗത്തിറങ്ങിയത്.

അതു കൊണ്ടു തന്നെ നിയമനിര്‍മ്മാണം എന്ന വാഗ്ദാനം തത്കാലം മാറ്റി വയ്ക്കാന്‍ ബിജെപി തീരുമാനിച്ചു. എങ്കിലും മുഖ്യ അജണ്ട ശബരിമലയായിരിക്കുമെന്ന പ്രഖ്യാപനം സംസ്ഥാന പ്രസിഡന്റ് കെ. സുരേന്ദ്രന്‍ നടത്തി.

നിയമസഭാ തെരഞ്ഞെടുപ്പില്‍ ശബരിമല പ്രധാന തെരഞ്ഞെടുപ്പ് വിഷയം ആണെന്നാണ് ബിജെപി സംസ്ഥാന അധ്യക്ഷന്‍ കെ സുരേന്ദ്രന്‍ പറഞ്ഞത്. ശബരിമലയുടെ പേരില്‍ ഇരുമുന്നണികളും ജനങ്ങളെ കബളിപ്പിക്കുകയാണ്. ബിജെപിയുടെ രാഷ്ട്രീയ അജണ്ടയെ ഇരുമുന്നണികളും സ്വീകരിക്കുന്നു.

രാഹുല്‍ ഗാന്ധിയുടെ നയം ശബരിമലയില്‍ വിശ്വാസികള്‍ക്ക് എതിരായിരുന്നെങ്കില്‍ യുഡിഎഫ് ഇപ്പോള്‍ നിയമം കൊണ്ടുവരുമെന്നാണ് പറയുന്നതെന്നും കെ സുരേന്ദ്രന്‍ പറഞ്ഞു.

യുവതീ പ്രവേശനം സംബന്ധിച്ച സുപ്രീം കോടതി വിധിയുണ്ടായപ്പോള്‍ കോണ്‍ഗ്രസിന്റെ ദേശീയ നേതൃത്വവും രാഹുല്‍ ഗാന്ധിയും അതിനെ അനുകൂലിച്ച് ട്വീറ്റ് ചെയ്ത കാര്യമാണ് സുരേന്ദന്‍ പറഞ്ഞത്. ശബരിമല യുവതി പ്രവേശനത്തെ കുറിച്ചുള്ള ചോദ്യങ്ങള്‍ക്ക് തങ്ങള്‍ അനുകൂലിക്കുന്നു എന്നാണ് അന്ന് രാഹുല്‍ ഗാന്ധി പറഞ്ഞത്.

യുവതീ പ്രവേശന വിവാദത്തിന്റെ പശ്ചാത്തലത്തില്‍ പാര്‍ലെമെന്റ് തെരഞ്ഞടുപ്പില്‍ വലിയ വിജയം കരസ്ഥമാക്കിയപ്പോഴും കോണ്‍ഗ്രസ് തന്ത്രപരമായ മൗനമാണ് പിന്തുടര്‍ന്നത്.കോണ്‍ഗ്രസ് വിശ്വാസത്തിന്റെ കാര്യത്തില്‍ എക്കാലത്തും രണ്ട് വള്ളത്തിലാണ് കാല്‍ ചവിട്ടിയിട്ടുള്ളത്. ബിജെപി എക്കാലവും വിശ്വാസികള്‍ക്കൊപ്പമാണ് നിന്നിട്ടുള്ളത്.

ഒരു കോണ്‍ഗ്രസുകാരനെതിരെ പോലും ശബരിമല സമരത്തില്‍ കേസുണ്ടായിട്ടില്ലെന്ന് സുരേന്ദ്രന്‍ പറഞ്ഞു.. സമരം ചെയ്തതും സര്‍ക്കാനെ മുട്ടുമടക്കിപ്പിച്ചതും ബിജെപിയാണ്. ജനിക്കുമ്പോള്‍ എല്ലാവരും ഹിന്ദുക്കളാണെന്ന് പറയുന്നത് സ്വാഗതാര്‍ഹമാണ്. വിശ്വാസികളെ കാണാതെ പോകാനാകില്ല എന്നാണ് പുതിയ നിലപാട് എങ്കില്‍ ശബരിമല കേസുകള്‍ പിണറായി പിന്‍വലിക്കണം. ശബരിമല നിലപാട് തെറ്റായിപോയെന്ന് പിണറായി പറയണമെന്നും കെ സുരേന്ദ്രന്‍ പറഞ്ഞു.

കേരളത്തില്‍ ഭക്ഷണത്തെ വരെ വര്‍ഗീയ വത്കരിക്കുകയാണെന്നാണ് ബിജെപി സംസ്ഥാന അധ്യക്ഷന്‍ കെ സുരേന്ദ്രന്‍ പറയുന്നത്. ആദ്യം വസ്ത്രത്തിലായിരുന്നു മതവത്കരണമെങ്കില്‍ ഹലാല്‍ ഭക്ഷണശാലകളാണിപ്പോള്‍. ഹലാല്‍ ഭക്ഷണം മതതീവ്രവാദികളുടേതാണെന്ന് പറഞ്ഞ സുരേന്ദ്രന്‍ എന്താണ് ഇക്കാര്യത്തില്‍ എല്‍ഡിഎഫ്, യുഡിഎഫ് നിലപാടെന്നും ചോദിച്ചു.

ന്യൂനപക്ഷങ്ങള്‍ക്ക് കൂടുതല്‍ പദ്ധതികളും വികസനവും കൊടുക്കുന്നു. അതില്‍ തന്നെ മുസ്ലീംസമുദായത്തിന് അനര്‍ഹമായി കൊടുക്കുമ്പോള്‍ ക്രിസ്ത്രീയ സമുദായത്തിന് കിട്ടുന്നില്ല. ഇക്കാര്യത്തില്‍ ഇടത് വലത് നിലപാടെന്താണെന്നും കെ സുരേന്ദ്രന്‍ ചോദിച്ചു.

ന്യൂന പക്ഷങ്ങള്‍ക്ക് എതിരെ ചരടുവലിക്കാനാണ് ബി ജെ പി നീക്കം. ഭൂരിപക്ഷത്തിന്റെ വികാരം വലുതാക്കി തെരഞ്ഞടുപ്പില്‍ മേല്‍ക്കോയ്മ സ്ഥാപിക്കാനാണ് ബിജെപിയുടെ നീക്കം. എന്നാല്‍ െ്രെകസ്തവരെ കൈവിടാന്‍ ബിജെപി തയ്യാറല്ല. ഇതിന് മുന്നോടിയായിട്ടാണ് ഓര്‍ത്തഡോക്‌സ് യാക്കോബായ വിഷയത്തില്‍ ശ്രീധരന്‍ പിള്ള ഇടപെട്ടത്.

ക്ഷേത്രങ്ങള്‍ ഭക്തരെ ഏല്‍പ്പിക്കുക എന്നത് ബിജെപി യുടെ ലക്ഷ്യങ്ങളിലൊന്നാണ്. ദേവസ്വം ബോര്‍ഡ് എന്ന സംവിധാനം ഇല്ലാതാക്കണമെന്നത് വര്‍ഷങ്ങളായി ബി ജെ പി മുന്നോട്ടുവയ്ക്കുന്ന ആവശ്യമാണ്. ക്ഷേത്രത്തിലെ പണം സര്‍ക്കാരിന് എന്നതിനേക്കാള്‍ ക്ഷേത്രങ്ങളിലെ പണം ക്ഷേത്രങ്ങള്‍ക്ക് എന്ന നിര്‍ദ്ദേശമാണ് ബി ജെ പി മുന്നോട്ടു വയ്ക്കുന്നത്. ദേവസ്വം ബോര്‍ഡില്‍ ചില പ്രധാന ക്ഷേത്രങ്ങള്‍ക്ക് മാത്രമാണ് വരുമാനമുള്ളത്. ബാക്കി ക്ഷേത്രത്തിലെ ദൈനം ദിന പ്രവര്‍ത്തനങ്ങള്‍ നടന്നു പോകുന്നത് സര്‍ക്കാരില്‍ നിന്ന കിട്ടുന്ന സഹായം കൊണ്ടാണ്. എന്നാല്‍ ക്ഷേത്രങ്ങളിലെ വരുമാനം സര്‍ക്കാര്‍ തട്ടിയെടുക്കുന്നു എന്നാണ് ബിജെ പി പറയുന്നത്.