തൊണ്ടി മുതല്‍ കണ്ടെത്താന്‍ കഴിഞ്ഞില്ലെങ്കില്‍ ജയിക്കുമെന്നാണ് കസ്റ്റംസ് പറയുന്നത്. എന്നാല്‍ തൊണ്ടി മുതലില്ലാതെ കേസ് ജയിച്ച സാഹചര്യമില്ല. എന്നിട്ടും കസ്റ്റംസ് പറയുന്നു തൊണ്ടിയില്ലെങ്കിലും കേസ് ജയിച്ച ചരിത്രമുണ്ട്.

നയതന്ത്ര ചാനല്‍ വഴി സ്വപ്ന സുരേഷും സംഘവും കടത്തിക്കൊണ്ടുവന്നത് 167 കിലോ സ്വര്‍ണം ആണെന്നാണ് കസ്റ്റംസ് പറയുന്നത്. ഇതിനു കോടികള്‍ വിലവരും. ഇതാണ് കേസിലെ പ്രധാന തൊണ്ടിമുതല്‍. എന്നാല്‍ ഇതില്‍ പകുതി പോലും കണ്ടെത്താന്‍ കേന്ദ്ര ഏജന്‍സികള്‍ക്ക് കഴിഞ്ഞിട്ടില്ല.

കേന്ദ്ര ഏജന്‍സികള്‍ ഇക്കാര്യത്തില്‍ അന്ധത നടിക്കുന്നതാണോ അതോ അന്ധരാണോ എന്ന കാര്യത്തില്‍ സ്വര്‍ണ്ണകടത്ത് കേസിനെ പിന്തുടരുന്ന എല്ലാവര്‍ക്കും സംശയമുണ്ട്. ജൂണില്‍ എത്തിച്ച 30 കിലോ സ്വര്‍ണം മാത്രമാണ് ഇതുവരെ കണ്ടെത്തിയത്. കള്ളക്കടത്തില്‍ പങ്കെടുത്തവരും ഇടനിലക്കാരും പിടിയിലായെങ്കിലും സ്വര്‍ണം വാങ്ങിയവരെക്കുറിച്ച് അന്വേഷണ സംഘത്തിന് മിണ്ടാട്ടമില്ല. അതെന്ത് കൊണ്ടാണെന്ന് വ്യക്തമല്ല.

2019 നവംബര്‍ മുതല്‍ 2020 ജൂണ്‍വരെ സ്വപ്ന സുരേഷിന്റെ നേതൃത്വത്തില്‍ 21 തവണ സ്വര്‍ണ്ണം കടത്തിയെന്നാണ് കേന്ദ്ര ഏജന്‍സികള്‍ വ്യക്തമാക്കിയത്. ശിവശങ്കര്‍ ഇവരുടെ മാസ്റ്റര്‍ ബ്രയിന്‍ ആണെന്നാണ് ഏജന്‍സികളുടെ വിശദീകരണം

ദുബായില്‍ ഉണ്ടായിരുന്ന റബിന്‍സും കൂട്ടരും എത്തിച്ചത് 18.3 കിലോയാണെന്ന് ഏജന്‍സികള്‍ പറയുന്നു. മുഹമ്മദ് ഷാഫിയും സംഘവും പണം നല്‍കിയത് 47 കിലോ സ്വര്‍ണ്ണത്തിന്. അബ്ദു പിടിയും സംഘവും പണം നല്‍കിയത് 38.5 കിലോ. ഏറ്റവും ഒടുവില്‍ 2020 ജൂണില്‍ കെടി റമീസും സരിതും സ്വപ്നയും ചേര്‍ന്ന് എത്തിച്ചത് 30. 24 കിലോ. ആകെ 167 കിലോ സ്വര്‍ണം. പക്ഷെ ആദ്യം പിടികൂടി സ്വര്‍ണ്ണമല്ലാതെ മറ്റൊന്നും കണ്ടെത്താന്‍ കേന്ദ്ര ഏജന്‍സികള്‍ക്കായില്ല. എന്‍ഐഎ മാത്രം 30 പേരെ അറസ്റ്റ് ചെയ്തു. എല്ലാവരും ഇടത്തട്ടുകാരും കള്ളക്കടത്തിന് നേതൃത്വം കൊടുത്തവരും.

ടാന്‍സാനിയയും സൗദിയും യുഎഇയുമടക്ക സ്വര്‍ണം വന്ന വഴികളും സ്വര്‍ണം അയക്കാന്‍ വ്യാജ രേഖയടക്കമുണ്ടാക്കിയ ആളുകളെ വരെ തിരിച്ചറിഞ്ഞിരുന്നു. എന്നാല്‍ അവരെയും പിടി കൂടിയില്ല. അവരെല്ലാം മറ്റ് രാജ്യക്കാരാണെന്നാണ് വിശദീകരണം. പിടികൂടുന്നത് എളുപ്പമല്ലത്രേ.

കേരളത്തിലെത്തിയ സ്വര്‍ണം എവിടേക്ക് പോയി എന്നതില്‍ കേന്ദ്ര ഏജന്‍സികളുടെ കുറ്റപത്രത്തില്‍ മൗനമാണ്. അത് കേരളത്തിനകത്ത് പോയോ പുറത്തുപോയോ എന്നതിനെ കുറിച്ച് പോലും യാതൊരു വിശദീകരണവും നല്‍കിയിട്ടില്ല. കുറ്റപത്രത്തിന് പിന്നില്‍ വിട്ടു വീഴ്ചയുണ്ടോ എന്ന് വ്യക്തമല്ല.

കള്ളപ്പണം ഉപയോഗിച്ച് കൈകള്‍ മറിഞ്ഞാണ് സ്വര്‍ണം എത്തിയത്. അത് കൊണ്ടുവന്നവര്‍ക്ക് പോലും ആര്‍ക്കാണ് വിറ്റതെന്ന് കൃത്യമായി അറിയില്ലെന്നാണ് അന്വേഷണ ഏജന്‍സികള്‍ വിശദീകരിക്കുന്നത്. സ്വര്‍ണം മറ്റ് സംസ്ഥാനങ്ങളിലേക്കടക്കം പോയിട്ടുണ്ട്. പിന്നീട് ഇവ ആഭരണമായാണ് തിരിച്ചെത്തുന്നത്. കൊടുവള്ളിയിലടക്കം വിവിധ ജ്വല്ലറികളില്‍ ഇതിനായി പരിശോധന നടത്തി സ്വര്‍ണം കസ്റ്റഡിയിലെടുത്തെങ്കിലും ഇത് വിമാനത്താവളം വഴിയെത്തിയ കള്ളക്കടത്ത് സ്വര്‍ണമാണെന്ന് തെളിയിക്കാന്‍ കേന്ദ്ര ഏജന്‍സികള്‍ക്കായില്ല. നാളെ ജുവലറി ഉടമകള്‍ കേസുകൊടുത്താല്‍ അതിന് കേന്ദ്ര ഏജന്‍സികള്‍ മറുപടി പറയേണ്ടി വരും.

ഇവ അന്വേഷിക്കാന്‍ ആത്മാര്‍ത്ഥമായ യാതൊരു ശ്രമവും നടന്നിട്ടില്ല എന്നതാണ് സത്യം. ഒരു ഐ എ എസുകാരനെ കൂടി പ്രതിചേര്‍ത്ത കേസാണിതെന്ന് മറക്കരുതു്. അത്രയും ഗൗരവമുള്ള ഒരു കേസിലാണ് കേന്ദ്ര ഏജന്‍സികള്‍ കുട്ടിക്കളി തുടരുന്നത്.

ഇത്തരത്തിലുള്ള കേസുകളില്‍ പ്രതികളെ രക്ഷിക്കാന്‍ വേണ്ടി തൊണ്ടി കണ്ടെത്താതിരിക്കാറുണ്ട്. തിരുവനന്തപുരം സ്വര്‍ണ്ണക്കടത്തില്‍ രാഷ്ട്രീയം ചേര്‍ക്കാനാണ് അന്വേഷണ ഏജന്‍സികള്‍ ശ്രമിച്ചിട്ടുള്ളത്. വാര്‍ത്തകള്‍ ചോര്‍ത്തിയും അല്ലാതെയും നല്‍കി നിരന്തരം വിവാദം സൃഷ്ടിക്കാനാണ് ഏജന്‍സികള്‍ ശ്രമിച്ചത്. ഒരു പക്ഷേ അന്വേഷണ ഏജന്‍സികള്‍ ഇത്തരമൊരു വെട്ടില്‍ വീഴുമെന്ന് പ്രതീക്ഷിച്ചിരിക്കില്ല.

അതേസമയം തൊണ്ടി മുതല്‍ കണ്ടെത്താന്‍ കഴിയാത്തത് കേസ് അന്വേഷണത്തെ ബാധിക്കില്ലെന്നും അന്വേഷണം സംഘം വിശദീകരിക്കുന്നു.അത് ഏത് നിയമത്തിന്റെ അടിസ്ഥാനത്തിലാണെന്നറിയില്ല.