സംസ്ഥാനത്ത് മോഷണം നടത്തുന്ന തമിഴ് സംഘത്തിലെ മൂന്ന് സ്ത്രീകള് അറസ്റ്റില്
സംസ്ഥാനത്ത് ബസുകളിലും തിരക്കേറിയ സ്ഥലങ്ങളിലും മോഷണം നടത്തുന്ന സംഘത്തിലെ തമിഴ്നാട് സ്വദേശിനികളായ മൂന്നു സ്ത്രീകള് പിടിയില്. തെങ്കാശി പഴയകുറ്റാലം സ്വദേശികളും ബന്ധുക്കളുമായ ബിന്ദു (48) സിന്ധു (40) ഗംഗാദേവി (27) എന്നിവരെ ചാത്തന്നൂര് പൊലീസാണ് പിടികൂടിയത്. സംസ്ഥാനത്ത് ഒട്ടാകെ മോഷണം നടത്തുന്ന സംഘത്തിലെ കണ്ണികളാണ് ഇവരെന്ന് പൊലീസ് പറഞ്ഞു. ഇന്നലെ രാവിലെ പത്തോടെ കൊല്ലത്ത് നിന്ന് തിരുവനന്തപുരത്തേക്ക് പോയ കെഎസ്ആര്ടിസി ബസിലെ യാത്രക്കാരിയുടെ ബാഗ് തുറന്നു പഴ്സ് മോഷ്ടിക്കാനുള്ള ശ്രമം യാത്രക്കാരുടെ ശ്രദ്ധയില്പെട്ടു. ബസില് ഉണ്ടായിരുന്ന ചാത്തന്നൂര് സ്റ്റേഷനിലെ വനിതാ പൊലീസ് ഇവരെ തടഞ്ഞുവച്ച ശേഷം സ്റ്റേഷനില് വിവരം അറിയിച്ചു.
മൂവരെയും ചാത്തന്നൂര് ജംക്ഷനില് വച്ചു പൊലീസ് കസ്റ്റഡിയില് എടുത്തു ചോദ്യം ചെയ്തപ്പോഴാണ് വ്യാപകമായി മോഷണം നടത്തുന്ന സംഘാംഗങ്ങളാണെന്ന് മനസ്സിലായത്. തിരഞ്ഞെടുപ്പ് പ്രഖ്യാപിച്ചതിനു പിന്നാലെ കേരളത്തില് എത്തിയ സംഘം കഴിഞ്ഞ ഏതാനും ദിവസങ്ങള്ക്കുള്ളില് ജില്ലയില് പത്തിലേറെ മോഷണം നടത്തി. തിരക്കു സൃഷ്ടിച്ചു യാത്രക്കാരുടെ സ്വര്ണ മാലകളും ബാഗില് നിന്നും പഴ്സും പണവും അപഹരിക്കുകയാണ് രീതി. കഴിഞ്ഞ ദിവസം ചാത്തന്നൂരില് രണ്ടു പേരുടെ സ്വര്ണാഭരണങ്ങള് മോഷണം പോയിരുന്നു. പാരിപ്പള്ളി, കുണ്ടറ സ്റ്റേഷനുകളിലും സമാനമായി കേസുകള് ഉണ്ട്. പ്രതികളെ കോടതിയില് ഹാജരാക്കി.
https://www.facebook.com/Malayalivartha