ദുബായ് ഭരണാധികാരി ഷെയ്ഖ് മുഹമ്മദ് ബിന്‍ റാഷിദ് അല്‍ മഖ്തൂമും മുന്‍ ഭാര്യയും തമ്മിലുളള ഇണക്കവും പിണക്കവും നാടുവിടലും ഒക്കെ ചര്‍ച്ചയായതാണ്. ഇപ്പോഴിതാ രാജകുമാരിക്ക് അനുകൂലമായി വലിയൊരു വിധി വന്നിരിക്കുകയാണ്. ഇവര്‍ തമ്മിലുളള കേസില്‍ റെക്കാഡ് തുകയാണ് ലണ്ടനിലെ കോടതി വിധിച്ചിരിക്കുന്നത്.

സ്വത്തിന്റെ അവകാശത്തിന്റെ പേരിലെ കേസില്‍ ഷെയ്ഖ് മുഹമ്മദിന്റെ ആറാം ഭാര്യയായിരുന്ന ഹയ ബിന്‍ത് അല്‍ ഹുസൈന്‍ രാജകുമാരിക്ക് 554 മില്യണ്‍ പൗണ്ട് (ഏകദേശം 733 മില്യണ്‍ ഡോളര്‍) ഷെയ്ഖ് നല്‍കാനാണ് കോടതി വിധിച്ചത്. രാജകുമാരിക്കും ഇവരുടെ രണ്ട് മക്കള്‍ക്കും ആജീവനാന്ത സുരക്ഷ ഉറപ്പാക്കാനാണ് ഇത്രയും തുക നല്‍കേണ്ടി വരിക.

സുരക്ഷയ്ക്കായുളള തുകയല്ല വിവാഹബന്ധം തകര്‍ന്നതിലൂടെ ലഭിക്കേണ്ട നഷ്ടപരിഹാരമാണ് ഷെയ്ഖ് നല്‍കേണ്ടതെന്ന് കോടതിയില്‍ വിധി പ്രഖ്യാപിച്ച ജഡ്ജി ഫിലിപ് മൂര്‍ പറഞ്ഞു. തുകയില്‍ 251.5 മില്യണ്‍ പൗണ്ട് മൂന്ന് മാസത്തിനകം ഹയയ്ക്ക് നല്‍കണം. ഹയയുടെ ബ്രിട്ടീഷ് മാളികകള്‍ സംരക്ഷിക്കാനും ആഭരണങ്ങള്‍ക്കും ഓട്ട പന്തയത്തിനുപയോഗിക്കുന്ന കുതിരകള്‍ക്കുമായി അവര്‍ പറഞ്ഞ തുക അടയ്ക്കണമെന്നും കോടതി പറഞ്ഞു. ഈ തുക ഒറ്റ തവണയായി തന്നെ നല്‍കണം.

മക്കളായ ജലീല (14), സയിദ്(9) എന്നിവര്‍ക്ക് മൂന്ന് മില്യണ്‍ പൗണ്ട് വിദ്യാഭ്യാസത്തിനായി നല്‍കണം. കൊടുക്കാനുളള 9.6 മില്യണ്‍ പൗണ്ടും നല്‍കണം. കുട്ടികള്‍ വളരുമ്പോള്‍ അവരുടെ പരിപാലനത്തിനും സുരക്ഷയ്ക്കും വര്‍ഷം 11.2 മില്യണ്‍ പൗണ്ട് നല്‍കണം. എച്ച്എസ്ബിസി ബാങ്കിന്റെ 290 മില്യണ്‍ പൗണ്ട് സെക്യുരിറ്റി നിക്ഷേപം വഴി ഇത് ഉറപ്പാക്കണം. റെക്കാഡ് തുക നല്‍കണമെന്നാണ് കോടതി വിധിച്ചതെങ്കിലും ഹയ ആവശ്യപ്പെട്ട 1.4 ബില്യണ്‍ പൗണ്ടിന്റെ പകുതി മാത്രമാണ് നല്‍കാന്‍ കോടതി വിധിച്ചത്.

തനിക്കും മക്കള്‍ക്കും മേലുളള ഷെയ്ഖ് മുഹമ്മദിന്റെ സ്വാധീനത്തില്‍ നിന്നും തങ്ങള്‍ക്ക് പുറത്തുകടക്കണമെന്നും ഹയ കോടതിയില്‍ ആവശ്യപ്പെട്ടു. തന്റെ അംഗരക്ഷകരില്‍ ഒരാളുമായി ഹയയ്ക്ക് ബന്ധമുണ്ടായതിനെ തുടര്‍ന്നുളള പ്രശ്‌നങ്ങള്‍ കാരണമാണ് ഇവര്‍ മക്കളുമൊത്ത് ലണ്ടനിലെത്തിയത്. ഈ പ്രശ്‌നത്തില്‍ ഷെയ്ഖ് മുഹമ്മദിനോട് ഹയ വിവാഹമോചനം ആവശ്യപ്പെട്ടിരുന്നു.

ഇതോടെ ഷെയ്ഖില്‍ നിന്ന് സുരക്ഷാ ഭീഷണിയുണ്ടായതായാണ് ഹയ വെളിപ്പെടുത്തുന്നത്. ഹയയുടെയും അഭിഭാഷകരുടെയും ഫോണ്‍കോളുകള്‍ പെഗാസസ് സോഫ്റ്റ്‌വെയര്‍ ഉപയോഗിച്ച് ചോര്‍ത്താന്‍ ഷെയ്ഖ് മുഹമ്മദ് ആവശ്യപ്പെട്ട വാര്‍ത്തകളുണ്ടായിരുന്നു.

ജോര്‍ദാനിലെ ഹുസൈന്‍ രാജാവിന്റെ മൂന്നാമത്തെ ഭാര്യ അലിയാ രാജ്ഞിയിലുള്ള മകളാണ് ഹയ ബിന്‍ത് ഹുസൈന്‍. ജോര്‍ദാനിലെ അബ്ലുള്ള രണ്ടാമന്‍ രാജാവിന്റെ അര്‍ധ സഹോദരിയാണ് ഇവര്‍. ജോര്‍ദാനിലെ ഹയ രാജകുമാരി എന്നാണ് ഇവര്‍ അറിയപ്പെടുന്നത്. 1921 മുതല്‍ ജോര്‍ദാന്‍ ഭരിക്കുന്ന രാജവംശമായ ഹാഷ്മി കുടുംബാംഗമാണ്. ഇംഗ്ലണ്ടിലെ ഒക്‌സ്‌ഫോര്‍ഡ് സര്‍വ്വകലാശാലയില്‍ നിന്ന് ബിരുദം നേടി. അന്താരാഷ്ട്ര ജംപിങ് മത്സരത്തില്‍ ജോര്‍ദാന് വേണ്ടി മത്സരിച്ച ഒരു അശ്വാഭ്യാസിയാണ് ഹയ. രണ്ടു തവണ ഇന്റര്‍നാഷണല്‍ ഫെഡറേഷന്‍ ഫോര്‍ ഇക്വസ്‌റ്റേറിയന്‍ സ്‌പോര്‍ട്‌സ് എന്ന സംഘടനയുടെ പ്രസിഡന്റായിരുന്നു.

2004 ഏപ്രില്‍ 10ന് മുഹമ്മദ് ബിന്‍ റാഷിദ് അല്‍ മഖ്തൂമിനെ ഹയ വിവാഹം ചെയ്തു. 2007 ഡിസംബര്‍ രണ്ടിന് ആദ്യത്തെ കുഞ്ഞിന് ഷെയ്ഖ ജലീല ബിന്‍ത് മുഹമ്മദ് ബിന്‍ റാഷിദ് അല്‍ മഖ്തൂം ജന്മം നല്‍കി. യുഎഇയുടെ 36ആം ജന്മദിനമായ ഡിസംബര്‍ രണ്ടിനായിരുന്നു ആദ്യ കുഞ്ഞ് ജനിച്ചത്. 2012 ജനുവരി ഏഴിന് രണ്ടാമത്തെ കുട്ടിയായ ശെയ്ഖ് സായിദ് ബിന്‍ മുഹമ്മദ് ബിന്‍ റാഷിദ് അല്‍ മഖ്തൂം ജനിച്ചു. ഇങ്ങനെ സന്തോഷത്തോടെയിരിക്കുമ്പോഴാണ് അംഗരക്ഷകനുമായുള്ള അടുപ്പം പുറത്തായതും ഹയ നാട് വിട്ടതും.