വൈദ്യന്റെ കൊലപാതകത്തിന് സമാനമായ മറ്റൊരു കൊലപാതകം... ഡിഎംകെ പ്രാദേശിക നേതാവിനെ കാമുകിയും ഭര്‍തൃസഹോദരനും ചേര്‍ന്ന് വെട്ടിനുറുക്കി തല പുഴയിലെറിഞ്ഞു, നേതാവ് കൊല്ലപ്പെട്ടത് അതി ക്രൂരമായി, സംഭവമിങ്ങനെ....

ചെന്നൈ മണലിയിലെ ഡിഎംകെ വാര്‍ഡ് സെക്രട്ടറി എസ്.ചക്രപാണി (65) ആണ് അതിക്രൂരമായി കൊല്ലപ്പെട്ടത്. നാലുദിവസത്തിന് മുമ്പ് കാണാതായ ചക്രപാണിയെ കാമുകിയുടെ റോയപുരത്തെ വീടിന്റെ ശുചിമുറില്‍ വെട്ടിനുറുക്കി പ്ലാസ്റ്റിക് കവറുകളിലാക്കിയ നിലയിലാണ് കണ്ടെത്തിയത്.

സംഭവത്തില്‍ കാമുകി തമീമ ബാനു (40) പിടിയിലായി. തമീമയുടെ ഭര്‍തൃസഹോദരന്‍ വസീം ബാഷ (35), ഇയാളുടെ സുഹൃത്ത് ദില്ലി ബാബു (29) എന്നിവര്‍ക്കായി തിരച്ചില്‍ തുടരുകയാണെന്നു പൊലീസ്.


ഈ മാസം 10 മുതലാണ് ചക്രപാണിയെ കാണാതാകുന്നത്. സ്‌കൂട്ടറില്‍ പുറത്തുപോയ ചക്രപാണി തിരികെ വന്നില്ലെന്ന് കുടുംബം പരാതി കൊടുത്തിരുന്നു. റോഡുകളിലെ സിസിടിവി ക്യാമറകളില്‍ പതിഞ്ഞ ദൃശ്യങ്ങള്‍ പിന്തുടര്‍ന്ന പൊലീസ്, റോയപുരത്തെ ഗ്രേസ് ഗാര്‍ഡനില്‍ നിന്നു സ്‌കൂട്ടര്‍ കണ്ടെത്തി. ചക്രപാണിയുടെ മൊബൈല്‍ ഫോണ്‍ സ്‌കൂട്ടറിനു സമീപമുണ്ടെന്നു സൈബര്‍സെല്‍ പരിശോധനയില്‍ വ്യക്തമാകുകയം ചെയ്തു.

ഇതിനിടെ, രണ്ടാം തെരുവിലെ വീട്ടില്‍ നിന്നു ദുര്‍ഗന്ധം വമിക്കുന്നതായി പരിസരവാസികള്‍ പൊലീസിനെ അറിയിക്കുകയുണ്ടായി. അതേ തുടര്‍ന്ന് വീട്ടില്‍ നടത്തിയ തിരച്ചിലിലാണ് ശുചിമുറിയില്‍ വെട്ടിനുറുക്കിയ നിലയില്‍ മൃതദേഹം കണ്ടെത്തിയത്.

വീട്ടുടമ തമീമ ബാനുവും കുടുംബവും നേരത്തേ വാടയ്ക്കു താമസിച്ചിരുന്നത് ചക്രപാണിയുടെ കെട്ടിടത്തിലായിരുന്നു. പണം കടംവാങ്ങി തുടങ്ങിയ സൗഹൃദം പിന്നീട് ചക്രപാണിയും തമീമയും തമ്മിലുള്ള പ്രണയമായി വളര്‍ന്നു. വീടുമാറിയെങ്കിലും ഇരുവരും ബന്ധം വിട്ടില്ല.


കഴിഞ്ഞ ദിവസം ചക്രപാണി തമീമയെ കാണാനെത്തി. ഇതു മനസ്സിലാക്കിയ തമീമയുടെ ഭര്‍തൃസഹോദരന്‍ വസീം ബാഷ ഇവരുടെ വീട്ടിലെത്തി വഴക്കുണ്ടാക്കുകയും വീട്ടിലിരുന്ന കത്തിയെടുത്തു ചക്രപാണിയെ വസീം ആക്രമിച്ചു. വെട്ടേറ്റുവീണ ചക്രപാണി മരിച്ചെന്നുറപ്പായതോടെ വെട്ടിനുറുക്കി ഉപേക്ഷിക്കാന്‍ തമീമയും വസീമും തീരുമാനിച്ചു. ഇതിനായി സുഹൃത്തായ ഓട്ടോഡ്രൈവര്‍ ദില്ലി ബാബുവിനെ വീട്ടിലേക്കു വിളിച്ചുവരുത്തി. പത്തു കഷ്ണങ്ങളായി വെട്ടിനുറുക്കിയ മൃതദേഹം പിന്നീട് ചെറിയ പ്ലാസ്റ്റിക് ബാഗുകളിലേക്കു മാറ്റി.

തലയുടെ ഭാഗം അന്നുതന്നെ ദില്ലിബാബു അഡയാര്‍ പാലത്തില്‍ നിന്നു പുഴയിലേക്കെറിഞ്ഞു. ബാക്കിഭാഗങ്ങള്‍ സുരക്ഷിതമായി ഉപേക്ഷിക്കുന്നതിനായി ശുചിമുറിയില്‍ സൂക്ഷിച്ചിരിക്കുകയായിരുന്നു.

കൊലപാതകത്തിനുശേഷം വസീം ബാഷയും ദില്ലി ബാബുവും ഒളിവില്‍ പോയി. ചക്രപാണിയുടെ തലയ്ക്കായി തിരച്ചില്‍ നടത്തിയെങ്കിലും കണ്ടെത്താനായില്ല. ഒളിവില്‍ പോയ ഇരുവര്‍ക്കുമായി അന്വേഷണം തുടരുന്നു.