തിരുവനന്തപുരം കഴക്കൂട്ടത്ത് വിവാഹ സല്‍ക്കാരത്തിനിടെ സംഘര്‍ഷം... യുവാവ് കുത്തേറ്റ് ആശുപത്രിയില്‍, കുത്തിയത് നിരവധി കേസുകളില്‍ പ്രതിയായ യുവാവെന്ന് പോലീസ്.

കണിയാപുരം കുന്നിനകം സ്വദേശി വിഷ്ണുവിനാണ് (28) കുത്തേറ്റത്. വിഷ്ണുവിനെ തിരുവനന്തപുരം മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു. ഇന്നലെ രാത്രി ഏഴരയോടെയാണ് സംഭവം ഉണ്ടായത്.

കല്യാണ വീട്ടിലുണ്ടായ വാക്കുതര്‍ക്കത്തിന് പിന്നാലെ ജാസിംഖാന്‍ വിഷ്ണുവിന്റെ മുതുകില്‍ കുത്തുകയായിരുന്നു. ജാസിംഖാന്റെ സംഘത്തില്‍ മുന്‍പുണ്ടായിരുന്നയാളാണ് വിഷ്ണുവെന്നാണ് സൂചനകള്‍.

തിരുവനന്തപുരം മംഗലപുരത്ത് സ്വര്‍ണവ്യാപാരിയെ അക്രമിച്ച് സ്വര്‍ണം കവര്‍ന്ന കേസിലടക്കം നിരവധി കേസുകളില്‍ പ്രതിയായ ജാസിംഖാനാണ് വിഷ്ണുവിനെ കുത്തിയത് എന്നാണ് പോലീസിന്റെ നിഗമനം.