കേരളത്തില് ഇന്നും തീവ്രമഴ മുന്നറിയിപ്പ്... നാല് ജില്ലകളില് ഓറഞ്ച് അലര്ട്ട്, പത്ത് ജില്ലകളില് യെല്ലോ അലര്ട്ട്, സംസ്ഥാനത്താകെ ഇന്ന് വ്യാപകമായി തന്നെ ഒറ്റപ്പെട്ട ശക്തമായ മഴയ്ക്കും അതിശക്തമായ മഴയ്ക്കും സാധ്യതയുണ്ടെന്ന് കാലാവസ്ഥാ വകുപ്പിന്റെ പ്രവചനം
കേരളത്തില് ഇന്നും തീവ്രമഴ മുന്നറിയിപ്പ്. ഇന്ന് എല്ലാ ജില്ലകളിലും കാലാവസ്ഥാ വകുപ്പ് മുന്നറിയിപ്പ് നല്കിയിട്ടുണ്ട്. മുന്നറിയിപ്പ് അനുസരിച്ച് വടക്കന് കേരളത്തിലാണ് അതിശക്തമായ മഴയ്ക്ക് സാധ്യത. നാല് ജില്ലകളില് ഓറഞ്ച് അലര്ട്ട് പ്രഖ്യാപിച്ചു.മലപ്പുറം, കോഴിക്കോട്, കണ്ണൂര്, കാസര്കോട് ജില്ലകളിലാണ് ഓറഞ്ച് അലര്ട്ട്. മറ്റ് ജില്ലകളിലെല്ലാം ഇന്ന് യെല്ലോ അലര്ട്ട് പ്രഖ്യാപിച്ചു.
ഇന്ന് വ്യാപകമായി തന്നെ ഒറ്റപ്പെട്ട ശക്തമായ മഴയ്ക്കും അതിശക്തമായ മഴയ്ക്കും സാധ്യതയുണ്ടെന്നാണ് കാലാവസ്ഥാ വകുപ്പിന്റെ പ്രവചനം. അറബിക്കടലിലെയും ബംഗാള് ഉള്ക്കടലിലെയും ചക്രവാതച്ചുഴികളും ഇതിന്റെ സ്വാധീനഫലമായുള്ള ശക്തമായ പടിഞ്ഞാറന് കാറ്റുമാണ് മഴയ്ക്ക് കാരണമാകുന്നത്.
മത്സ്യതൊഴിലാളികള് ഇനി ഒരു അറിയിപ്പ് ഉണ്ടാകുന്നത് വരെ കടലില് പോകരുതെന്ന് മുന്നറിയിപ്പുണ്ട്.വ്യാഴാഴ്ച വരെ കേരള ലക്ഷദ്വീപ് കര്ണാടക തീരങ്ങളില് മണിക്കൂറില് 40 മുതല് 50 കിലോമീറ്റര് വേഗതയിലും ചില അവസരങ്ങളില് മണിക്കൂറില് 60 കിലോമീറ്റര് വേഗതയിലും ശക്തമായ കാറ്റിനും മോശം കാലാവസ്ഥയ്ക്കും സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ്.
മലയോര മേഖലകളില് ഒറ്റപ്പെട്ട ശക്തമായ ഇടിയോടു കൂടിയ മഴക്ക് സാധ്യത ഉള്ളതിനാല് കഴിഞ്ഞ ദിവസങ്ങളില് ശക്തമായ മഴ ലഭിച്ച മലയോരപ്രദേശങ്ങളില് ഓറഞ്ച് അലെര്ട്ടിന് സമാനമായ ജാഗ്രത പാലിക്കണം.
കഴിഞ്ഞ ദിവസങ്ങളില് വലിയ അളവില് മഴ ലഭിച്ച പ്രദേശങ്ങളില് മഴ തുടരുന്ന സാഹചര്യത്തില് താഴ്ന്ന പ്രദേശങ്ങള്, നദീതീരങ്ങള്, ഉരുള്പൊട്ടല്-മണ്ണിടിച്ചില് സാധ്യതയുള്ള മലയോര പ്രദേശങ്ങള് തുടങ്ങിയ ഇടങ്ങളിലുള്ളവര് അതീവ ജാഗ്രത പാലിക്കേണ്ടതാണ്.
അതേസമയം അതിശക്തമായ മഴ മുന്നറിയിപ്പുള്ള സാഹചര്യത്തില് അധികൃതരുടെ നിര്ദേശങ്ങള് അനുസരിച്ച് മാറിത്താമസിക്കേണ്ട ഇടങ്ങളില് അതിനോട് സഹകരിക്കേണ്ടതാണ്. വിവിധ തീരങ്ങളില് കടലാക്രമണം ശക്തമാകാന് സാധ്യതയുള്ളതിനാല് അപകട മേഖലകളില് താമസിക്കുന്നവര് ജാഗ്രത പാലിക്കണം. ആവശ്യമായ ഘട്ടത്തില് മാറി താമസിക്കണം.
മല്സ്യബന്ധനോപധികള് സുരക്ഷിതമാക്കി വെക്കണം. അടച്ചുറപ്പില്ലാത്ത വീടുകളില് താമസിക്കുന്നവരും മേല്ക്കൂര ശക്തമല്ലാത്ത വീടുകളില് താമസിക്കുന്നവരും വരും ദിവസങ്ങളിലെ മുന്നറിയിപ്പുകളുടെ അടിസ്ഥാനത്തില് സുരക്ഷയെ മുന്കരുതി മാറി താമസിക്കാന് തയ്യാറാവേണ്ടതാണ്.
സ്വകാര്യ-പൊതു ഇടങ്ങളില് അപകടവസ്ഥയില് നില്ക്കുന്ന മരങ്ങള്/പോസ്റ്റുകള്/ബോര്ഡുകള് തുടങ്ങിയവ സുരക്ഷിതമാക്കേണ്ടതും മരങ്ങള് കോതി ഒതുക്കുകയും ചെയ്യേണ്ടതാണ്. അപകടാവസ്ഥകള് അധികൃതരുടെ ശ്രദ്ധയില് പെടുത്തേണ്ടതാണ്. ദുരിതാശ്വാസ ക്യാമ്പുകളിലേക്ക് മാറേണ്ടുന്ന ഘട്ടങ്ങളില് പൂര്ണ്ണമായും കോവിഡ് മാനദണ്ഡങ്ങള് പാലിക്കാന് തയ്യാറാവേണ്ടതാണ്.
"
https://www.facebook.com/Malayalivartha
