ഗൃഹപ്രവേശചടങ്ങില്‍ ഭക്ഷണം കഴിച്ചവര്‍ക്ക് ഭക്ഷ്യവിഷബാധയെന്ന സംശയം. ശാരീരിക അസ്വസ്ഥതയെ തുടര്‍ന്ന് നിരവധി പേര്‍ ചികിത്സ തേടി. നീലേശ്വരം ചോയ്യങ്കോട് ടൗണിന് സമീപത്തെ വീട്ടില്‍ നടന്ന ചടങ്ങില്‍ സംബന്ധിച്ചവരിലെ ചിലര്‍ക്കാണ് വിഷബാധയേറ്റത്. പങ്കെടുത്ത 350 പേരില്‍ ഒട്ടേറെ പേര്‍ക്ക് അസ്വസ്ഥത അനുഭവപ്പെട്ടതായാണ് റിപ്പോർട്ട്. ഇവര്‍ നീലേശ്വരം താലൂക്ക് ആശുപത്രിയിലും സമീപത്തെ സഹകരണ ആശുപത്രിയിലുമാണ് ചികിത്സ തേടിയത്.

രണ്ടു കുട്ടികള്‍ ഇപ്പോള്‍ താലൂക്ക് ആശുപത്രിയില്‍ ചികില്‍സയിലുണ്ടെന്ന് മെഡിക്കല്‍ ഓഫീസര്‍ അറിയിച്ചു. ആശുപത്രിയില്‍ ചികില്‍സ തേടിയവരില്‍ വയറിളക്കവും ഛര്‍ദിയുമാണുണ്ടായത്. അതേസമയം ബിരിയാണിയും ഐസ്‌ക്രീമും കഴിച്ചവര്‍ക്ക് പ്രശ്‌നങ്ങളൊന്നുമുണ്ടായില്ല. സലാഡ് കഴിച്ചവര്‍ക്കാണ് അസ്വസ്ഥതയുണ്ടായത്. ഗൃഹപ്രവേശം നടന്ന വീട്ടിലും അയല്‍പക്ക വീട്ടിലുമായാണ് ഭക്ഷണമൊരുക്കിയത്. ആരോഗ്യവകുപ്പ് അധികൃതരെത്തി കിണര്‍ വെള്ളം സാമ്പിള്‍ ശേഖരിച്ച് കാസര്‍കോട്ടെ ലാബിലേക്ക് പരിശോധനയ്ക്ക് അയച്ചിട്ടുണ്ട്. അതേസമയം നിരവധി പേര്‍ സ്വകാര്യ ആശുപത്രിയില്‍ ചികില്‍സയിലുണ്ടെന്ന വിവരവും ഉണ്ട്.

അതെ സമയം, ചെറുവത്തൂരിൽ ഭക്ഷ്യസുരക്ഷാ വകുപ്പ് കുടിവെള്ള സാമ്പിളുകൾ വ്യാപകമായി പരിശോധിക്കുന്നു. പരിശോധിച്ച സാമ്പിളുകളിൽ ഷിഗെല്ല ബാക്ടീരിയയുടെ സാന്നിധ്യം കണ്ടെത്തിയതിനെ തുടർന്നാണ് ആരോഗ്യവകുപ്പ് നടപടികൾ ശക്തമാക്കുന്നത്. ചെറുവത്തൂർ പഞ്ചായത്തിലെ മുഴുവൻ കുടിവെള്ള സ്രോതസുകളും ക്ളോറിനേറ്റ ചെയ്യാനാണ് ആരോഗ്യവകുപ്പ് തീരുമാനം.30 സാമ്പിളുകൾ അയച്ചതിൽ 24 എണ്ണത്തിലും ഷിഗെല്ല സാന്നിധ്യം കണ്ടെത്തിയിട്ടുണ്ട്.

കോഴിക്കോട് റീജിണൽ അനലിറ്റിക്കൽ ലാബിലാണ് പരിശോധന നടത്തിയത്. ചെറുവത്തൂരിൽ നിന്ന് ശേഖരിച്ച സാമ്പിളുകളിൽ സാല്‍മണൊല്ല, ഷിഗല്ല, കോളിഫോം, ഇ കോളി ബാക്ടീരിയകളുടെ സാന്നിധ്യമാണ് കണ്ടെത്തിയത്.

ഗൃഹപ്രവേശനത്തിൽ പങ്കെടുത്ത നിരവധി പേർക്ക് ഛർദ്ദിയും തലചുറ്റലും വയറിളക്കവും വന്നതോടെയാണ് ആളുൾ സംഭവം പരസ്പരം അറിയുന്നത്. ശാരീരിക അവശതകൾ ബാധിച്ചവരെല്ലാം ചോയ്യങ്കോട്ടും പരിസരത്തും താമസിക്കുന്നവരാണ്.

കെ.ലക്ഷ്മി (60) പി.കാർത്യായനി (57) മിനി (50) വിനായകൻ (5 ) ശൈലജ, നിർമ്മല, സുജിത, വിജയൻ, ശോഭന എന്നിവർ നീലേശ്വരം താലൂക്ക് ആശുപുരിയിൽ ചികിൽസ തേടി. ഞായറാഴ്ച നടന്ന ഗൃഹപ്രവേശന ചടങ്ങിന് ശേഷം തിങ്കളാഴ്ചയും ചൊവ്വാഴ്ച്ചയുമായാണ് പങ്കെടുത്തവർക്ക് ശാരീരിക വിഷമതകൾ അനുഭവപെട്ടത്. ബിരിയാണി അരി, കോഴി, കുടിവെള്ളം എന്നിവയിൽ ഏതെങ്കിലുമുള്ള ഭക്ഷണത്തിൽ നിന്നാണോ ഭക്ഷ്യവിഷബാധയേറ്റതെന്നും പരിശോധിച്ച് വരികയാണ്.