കഴിഞ്ഞ ദിവസമാണ് ഗൾഫിൽ നിന്നും കേരളത്തിലേക്കുള്ള ടിക്കറ്റ് നിരക്ക് കുറഞ്ഞതായുള്ള വാർത്തകൾ വന്നത്. പ്രവാസികൾ ഏവരും ഏറെ പ്രതീക്ഷയോടെയും അതോടൊപ്പം തന്നെ ആശ്വാസത്തോടെയുമാണ് ആ വാർത്ത കേട്ടത്. ഇപ്പോഴിതാ മറ്റൊരു വാർത്ത പുറത്ത് വരുകയാണ്. അതായത് കേരളത്തിൽനിന്ന് യുഎഇയിലേക്കുള്ള വിമാന ടിക്കറ്റിന് ഇരട്ടി നിരക്ക് ഈടാക്കുകയാണ്. യുഎഇയിൽനിന്ന് കേരളത്തിലെത്താൻ ശരാശരി 6000 രൂപയാണ് ഈടാക്കുന്നത്. എങ്കിൽ തിരിച്ച് യുഎഇയിലേക്കു വരണമെങ്കിൽ കുറഞ്ഞത് 13,900 രൂപ നൽകണം. 2 എയർലൈനുകളിൽ ഒഴികെ 14000 രൂപയ്ക്കു മുകളിലാണ് ടിക്കറ്റ് നിരക്ക് ഈടാക്കുന്നത്.

അതോടൊപ്പം തന്നെ നാളെ കൊച്ചി– ദുബായ് യാത്രയ്ക്ക് എയർ ഇന്ത്യ എക്സ്പ്രസ്, സ്പൈസ് ജെറ്റ് എന്നീ വിമാനങ്ങളിൽ കുറഞ്ഞ നിരക്ക് 13,900 രൂപയാണ്. ഇൻഡിഗോ 14,900, എയർ അറേബ്യ 15,500, എമിറേറ്റ്സ് എയർലൈൻ 16,900 എന്നിങ്ങനെയാണ് വൺവേ നിരക്ക് ഈടാക്കുന്നത്. നാലംഗ കുടുംബത്തിന് യാത്ര ചെയ്യാൻ ഇതു യഥാക്രമം 53,900, 61800, 60,600, 63,000, 68500 രൂപ എന്നിങ്ങനെയുമാണ് നിരക്കുള്ളത്.

കൂടാതെ യുഎഇ പ്രഖ്യാപിച്ച വീസ നിയമത്തിലെയും കോവിഡ് നിയന്ത്രണങ്ങളിലെയും ഇളവാണ് ഓഫ് പീക്ക് സമയത്തെ തിരക്കിനും വിമാന ടിക്കറ്റ് വർധനയ്ക്കും കാരണമെന്ന് ട്രാവൽ വിദഗ്ധർ ചൂണ്ടിക്കാണിക്കുന്നു. വിനോദ സഞ്ചാരം, ബിസിനസ്, ജോലി അന്വേഷണം, സ്വയം തൊഴിൽ, വിദേശ പഠനം തുടങ്ങിയ ആവശ്യങ്ങൾക്കായി മറ്റു രാജ്യങ്ങളിലേക്കു പോകുന്നവരുടെ എണ്ണവും വർധിക്കുകയാണ് ചെയ്യുന്നത്.

അതേസമയം യുഎഇ വീസ നടപടിക്രമങ്ങൾ ലളിതമാക്കിയതും നിക്ഷേപകർക്കും കലാകാരന്മാർക്കും വിദഗ്ധർക്കും മികച്ച വിദ്യാർഥികൾക്കുമെല്ലാം പ്രത്യേക ദീർഘകാല വീസ നൽകുന്നതും യാത്രക്കാരുടെ എണ്ണം കൂട്ടയിരുണ്ട്. ഇതുകൂടാതെ കുറഞ്ഞ ചെലവിൽ ഹോട്ടൽ താമസം, ബന്ധുക്കളുടെയും സുഹൃത്തുക്കളുടെയും നാട്ടുകാരുടെയും സാന്നിധ്യം, കുറഞ്ഞ ദൂരം എന്നിവയും ആകർഷണമാണ്.