പോലീസും ഗുണ്ടകളും മാഫിയകളും തമ്മിലുള്ള അവിശുദ്ധ ബന്ധം നാട്ടില്‍ പാട്ടായിട്ടും പിണറായി സര്‍ക്കാര്‍ അടുത്തിടെയാണ് അറിഞ്ഞതെന്നാണ് പറയുന്നത്. അറിഞ്ഞ പാടേ ഗുണ്ടാ മാഫിയ കിങ് മേക്കര്‍മാരായ പോലീസ് ഉദ്യോഗസ്ഥരെ പിരിച്ചുവിട്ടും സസ്‌പെന്‍ഡ് ചെയ്തും സര്‍ക്കാര്‍ നടപടികള്‍ കടുപ്പിച്ചു. എന്നിട്ടും ഗുണ്ട അഴിഞ്ഞാട്ടം തീരാത്തതിനാല്‍ അടുത്ത നടപടിയിലേയ്ക്ക് കടക്കുകയാണ്. സംസ്ഥാനത്തെ മുഴുവന്‍ ഗുണ്ടകളുടെയും നിരീക്ഷണം എസ്.ഐ മുതല്‍ എസ് പി വരെയുള്ള ഉദ്യോഗസ്ഥര്‍ക്ക് വീതിച്ചു കൊടുക്കുകയാണ് . ടോപ് ടെണ്‍ എന്ന് പേരിട്ടിരിക്കുന്ന പദ്ധതി പ്രാവര്‍ത്തികമാക്കാന്‍ പോലീസ് മേധാവി ഉത്തരവായി കഴിഞ്ഞു.

പദ്ധതിയുടെ ഭാഗമായി പോലീസ് സ്റ്റേഷന്‍ മുതല്‍ ജില്ലാ പൊലീസ് മേധാവിക്കു വരെ ഗുണ്ടകളുടെ നിരീക്ഷണച്ചുമതല വീതിച്ചുനല്‍കും. ഗുണ്ടകളുടെ ഓരോ ദിവസത്തെയും പ്രവര്‍ത്തനം നിരീക്ഷിക്കലാണ് 'ടോപ് 10' എന്നപദ്ധതിയുടെ ലക്ഷ്യം. പൊലീസ് സ്റ്റേഷനിലെ ഇന്‍സ്‌പെക്ടര്‍പത്ത്,, ഡിവൈഎസ്പി പതിനഞ്ച്, ജില്ലാ പൊലീസ് മേധാവി ഇരുപത്തഞ്ച് എന്ന കണക്കില്‍ ഗുണ്ടകളെ നിരീക്ഷിക്കണം.
എസ്എച്ച്ഒക്ക് തന്റെ കണക്കിലുള്ള ഗുണ്ടകളെ നിരീക്ഷിക്കാന്‍ ഓരോ പൊലീസ് ഉദ്യോഗസ്ഥനെ ചുമതലപ്പെടുത്താം. ജില്ലാ പൊലീസ് മേധാവിക്ക് സ്‌ക്വാഡിനെ ചുമതലപ്പെടുത്താം. ഓരോരുത്തരുടെയും പട്ടികയില്‍ ഏറ്റവും കുഴപ്പക്കാരായ 10 പേരെ പ്രത്യേകം ശ്രദ്ധിക്കണം. ടോപ് 10 പട്ടികയില്‍പെട്ടവരുടെ എല്ലാ വിവരവും ഓഫിസറുടെ പക്കലുണ്ടാകണമെന്നും  ഡിജിപി ജില്ലാ പൊലീസ് മേധാവികള്‍ക്ക് നിര്‍ദേശം നല്‍കി.

സംസ്ഥാനത്താകെ 8045 ഗുണ്ടകളുണ്ടെന്നാണ് പൊലീസിന്റെ കണക്ക്. 2 കേസുകളില്‍ കൂടിയാല്‍ സിആര്‍പിസി 107 പ്രകാരം ഒരു വര്‍ഷത്തേക്ക് കുറ്റകൃത്യങ്ങളില്‍ ഏര്‍പ്പെടില്ലെന്ന ഉറപ്പുമായി ബോണ്ട് വയ്പിക്കണം. ഇതിനു ശേഷവും കുറ്റകൃത്യങ്ങളില്‍പെട്ടാല്‍ 'റൗഡി ചരിത്ര പട്ടിക' കൂടി തയാറാക്കി ഗുണ്ടാപട്ടികയിലേക്കു ചേര്‍ക്കണം. ഗുണ്ടകളെപ്പറ്റിയുള്ള വിവരങ്ങള്‍ അറിയാന്‍ വേറൊരു ഗുണ്ടയെ ഉപയോഗിക്കുന്ന രീതിയിലും നിയന്ത്രണം വേണമെന്ന് നിര്‍ദേശിച്ചിട്ടുണ്ട്. സാധാരണ പോലീസുകാര്‍ കുറ്റകൃത്യങ്ങള്‍ നടത്തി മുങ്ങുന്ന ഗുണ്ടകളെ കണ്ടെത്താന്‍ മറ്റ് ഗുണ്ടകളുടെ സഹായം തേടുന്നതും അവരെ അതിന് ഉപയോഗിക്കുന്നതും സാധാരണമാണ്. അത്തരം ബന്ധങ്ങള്‍ ഉപയോഗിച്ചാണ് ഗുണ്ടകള്‍ പോലീസ് കേസുകളുടെ ഒത്തുതീര്‍പ്പുകാരായും, പണമിടപാടുകളിലെ ഇടനില്ക്കാരായും മാറിയിരുന്നത്.

ഗുണ്ടാമാഫിയ ബന്ധത്തിന്റെ പേരില്‍ മംഗലപുരം സ്റ്റേഷനിലെ മുഴുവന്‍ ഉദ്യോഗസ്ഥരെയും സ്ഥലംമാറ്റിയിരുന്നു. എസ്എച്ച്ഒ സജീഷിനെ നേരത്തേ സസ്‌പെന്‍ഡ് ചെയ്തിരുന്നു. ഒരാഴ്ച മുന്‍പ് സ്ഥാനമേറ്റ എസ്‌ഐയെയും സ്ഥലംമാറ്റി. വനിതാ പൊലീസുകാര്‍ ഉള്‍പ്പെടെ 24 പേരെയാണു സ്ഥലംമാറ്റിയത്. ഉരുട്ടി കൊലകേസിന് ശേഷം കേരളത്തില്‍ ആദ്യമായാണ് ഒരു പോലീസ് സ്‌റ്റേഷനിലെ മുഴുവന്‍ പോലീസുകാരെയും സ്ഥലം മാറ്റുന്നതെന്ന പ്രത്യേകതയുമുണ്ട്. കൂട്ട സ്ഥലം മാറ്റം കൊണ്ട് കാര്യമില്ല ഗുണ്ടമാഫിയ ബന്ധമുള്ള പോലീസുകാരെ നിരീക്ഷിക്കാനും പ്രത്യേക സംവിധാനം അനിവാര്യമാണ്.

തിരുവനന്തപുരത്ത്, ലൈംഗിക പീഡനക്കേസില്‍ പ്രതികളായ 2 പൊലീസുകാരെയും പീഡനക്കേസിന്റെ അന്വേഷണത്തില്‍ വീഴ്ച വരുത്തിയ ഇന്‍സ്‌പെക്ടറെയും കഴിഞ്ഞദിവസം സര്‍വീസില്‍നിന്നു പിരിച്ചുവിട്ടിരുന്ന .ഗുണ്ടാബന്ധമുള്ള രണ്ട് മുതിര്‍ന്ന പോലീസ് ഉദ്യോഗസ്ഥരെ സസ്പെന്റ് ചെയ്യേണ്ടിവന്നത് പോലീസ് സേനയില്‍ നിലനില്‍ക്കുന്ന അതിഗുരുതരമായ സ്ഥിതിവിശേഷത്തിലേക്കാണ് വിരല്‍ ചൂണ്ടുന്നതെന്ന് വ്യക്തം. . ഗുണ്ടകള്‍ സംഘടിപ്പിക്കുന്ന മദ്യസല്‍ക്കാരത്തില്‍ ഈ പോലീസുകാര്‍ സ്ഥിരമായി പങ്കെടുക്കാറുണ്ടായിരുന്നുവെന്നും, ഇതിലൊരാളുടെ മകളുടെ പിറന്നാളാഘോഷത്തിന് പണം പിരിച്ചുകൊടുത്തത് ഗുണ്ടകളായിരുന്നുവെന്നും ഇരുവര്‍ക്കുമെതിരായ അന്വേഷണ റിപ്പോര്‍ട്ടിലുണ്ട്..

നിരവധി കേസുകളില്‍ പ്രതിയായ ഒരു ഗുണ്ടാനേതാവിനെ അറസ്റ്റുചെയ്യാന്‍ ശ്രമിച്ചതിന് തന്നെ സസ്പെന്റ് ചെയ്തെന്ന് സിഐ റാങ്കിലുള്ള ഒരു പോലീസുകാരന്‍ കഴിഞ്ഞ ദിവസം വെളിപ്പെടുത്തിയത് ഗുണ്ടകളുടെ സംരക്ഷകരായിരിക്കുന്ന പോലീസിനെ വെട്ടിലാക്കിയിരുന്നു. ഈ പ്രശ്നം കൂടുതല്‍ ചര്‍ച്ചയാവാതിരിക്കാനും, പോലീസുകാരും ഗുണ്ടകളും തമ്മിലെ അവിശുദ്ധ ബന്ധം മൂടിവയ്ക്കാനുമാണ് മുതിര്‍ന്ന പോലീസുദ്യോഗസ്ഥരെ സസ്പെന്റ് ചെയ്തിരിക്കുന്നതെന്ന സംശയം ബലപ്പെട്ടിരിക്കുകയാണ്. ഇത് ഒരു ഒത്തുകളിയുടെ ഭാഗവുമാണ്. ജനങ്ങളുടെ ശ്രദ്ധ മറ്റൊന്നിലേക്ക് മാറുന്നതോടെ സസ്പെന്‍ഷനിലായിരിക്കുന്ന പോലീസുദ്യോഗസ്ഥരെ തിരിച്ചെടുക്കും. ശമ്പളമുള്‍പ്പെടെ ഇവര്‍ക്ക് യാതൊരു നഷ്ടവും സംഭവിക്കാനിടയില്ല.