നാടിന്റെ വികസനത്തിന് ഒരുമയാണ് വേണ്ടത്. പക്ഷേ ഒന്നിച്ചു നില്‍ക്കാന്‍ നമുക്കാകുന്നില്ല. നാടിന്റെ വികസനത്തിന്റെ പ്രശ്‌നം വരുമ്പോള്‍ മറ്റ് അഭിപ്രായം മാറ്റിവെച്ച് ഒന്നിച്ചു നില്‍ക്കണം.അഭിപ്രായങ്ങളും അഭിപ്രായഭിന്നതകളും സ്വാഭികമാണെന്നും എന്നാല്‍ അത് നാടിന്റെ വികനസനത്തെ ബാധിക്കാന്‍ പാടില്ലെന്നും മുഖ്യമന്ത്രി പിണറായി വിജയന്‍. കൊച്ചിയില്‍ വ്യവസായ വകുപ്പ് സംഘടിപ്പിച്ച സംരഭക സമ്മേളനം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. സംരഭക സമ്മേളനം പ്രതിപക്ഷം ബഹിഷ്‌കരിച്ചതിനേയും മുഖ്യമന്ത്രി വിമര്‍ശിച്ചു.

സംസ്ഥാ വ്യവസായ വകുപ്പ് സംഘടിപ്പിക്കുന്ന മഹാ നിക്ഷേപക സംഗമമാണ് കൊച്ചിയില്‍ മുഖ്യമന്ത്രി ഉദ്ഘാടനം ചെയ്തത്. പതിനായിരത്തോളം സംരഭകരാണ് കലൂര്‍ രാജ്യാന്തര സ്‌റ്റേഡിയത്തില്‍ സംഘടിപ്പിക്കുന്ന നിക്ഷേപകസംഗമത്തില്‍ പങ്കെടുക്കുന്നത്. മഹാ സംഗമത്തിലൂടെ നിക്ഷേപാന്തരീക്ഷം മെച്ചപ്പെടുത്തി റാങ്ക് ഉയര്‍ത്താനാണ് സര്‍ക്കാര്‍ ലക്ഷ്യം വെക്കുന്നത്. രാജ്യത്തെ സൗഹൃദ റാങ്കിംഗ് പട്ടികയില്‍ 15 ാമതാണ് കേരളം.

സംരഭക സംഗമത്തില്‍ സര്‍ക്കാര്‍ ആരേയും മാറ്റി നിര്‍ത്തിയിട്ടില്ല. നമ്മുടെ നാട് ഇപ്പോള്‍ നേരിടുന്ന പ്രശ്‌നമാണിത്. നാടിന്റെ വികസനത്തെ ബാധിക്കുന്ന പ്രശ്‌നമാണിത്. എല്ലാവര്‍ക്കും കക്ഷിരാഷ്ട്രീയം ഉണ്ടാകാം. പക്ഷേ നാടിന്റെ വികസനത്തില്‍ ഒറ്റക്കെട്ടായി നില്‍ക്കണം. ഇക്കാര്യത്തില്‍ പ്രതിപക്ഷം ഒരുമിച്ച് നില്‍ക്കണമെന്ന് ആഗ്രഹിച്ചു. എന്നാല്‍ അവരവരുടെ കാരണത്താല്‍ അത് നടന്നില്ല. അതിന് നാടിനോട് പ്രതിബദ്ധതയുണ്ടാകണം. അതിനുളള ഹൃദയവിശാലതയുണ്ടാകണം. ഈ മനോഭാവം മാറ്റണം.

കേരളം വ്യവസായ സൗഹൃദമല്ലെന്ന് സ്ഥാപിക്കാന്‍ ചിലര്‍ ശ്രമിക്കുന്നു. ചില മാധ്യമങ്ങളും ഇതിന് കൂട്ട് നില്‍ക്കുന്നു. കേരളം കടത്തില്‍ മുങ്ങി നില്‍ക്കുന്നു എന്ന് വരുത്തി തീര്‍ക്കാന്‍ ശ്രമം നടക്കുന്നുണ്ട്. 2020 ല്‍ കേരളത്തിന്റെ പൊതുകടം 29 ശതമാനമാണ്. 2021 ല്‍ ഇത് 37 ശതമാനമായി കേന്ദ്രത്തിന്റെ പൊതുകടം ഇക്കാലയളവില്‍ 12 ശതമാനം കൂടി. ഇതു മറച്ചു വെച്ചാണ് കേരളത്തിനെതിരായ പ്രചാരണം നടക്കുന്നത്. കേരളത്തിന്റെ വരുമാനത്തില്‍ 64 ശതമാനം തനത് വരുമാനമാണ്. എന്നിട്ടും കേന്ദ്രത്തിന്റെ സഹായം കൊണ്ടാണ് കേരളം നിലനില്‍ക്കുന്നത് എന്നാണ് ച്രാരണം' മുഖ്യമന്ത്രി പറഞ്ഞു.