ഇന്ന് ഇന്ത്യയെ സംബന്ധിച്ച് സുപ്രധാനമാണ്. ഇന്ത്യന്‍ ബഹിരാകാശരംഗത്തിന്റെ സമീപകാലത്തെ ഏറ്റവും വലിയ കുതിപ്പിന് തയാറെടുക്കുകയാണ് രാജ്യം. ഇന്ന് ഉച്ചകഴിഞ്ഞ് 2.35ന് ശ്രീഹരിക്കോട്ടയിലെ സതീഷ് ധവാന്‍ ബഹിരാകാശകേന്ദ്രത്തില്‍ നിന്നു വിക്ഷേപിക്കുന്ന ചന്ദ്രയാന്‍ 3 രാജ്യാന്തര തലത്തില്‍ വലിയ ശ്രദ്ധയാണു നേടുന്നത്. ചന്ദ്രയാന്‍ 3 വിക്ഷേപണത്തിനൊപ്പം സുരക്ഷിത ലാന്‍ഡിങിനായും കാത്തിരിക്കുകയാണ് ശാസ്ത്രലോകത്തിനൊപ്പം ഭാരതത്തിലെ ജനങ്ങള്‍.

ചന്ദ്രയാന്‍ 2 ദൗത്യത്തോട് വളരെയേറെ സാമ്യമുള്ളതും എന്നാല്‍ ഓര്‍ബിറ്റര്‍ ഭാഗം ഇല്ലാത്തതുമായ ദൗത്യമാണ് ചന്ദ്രയാന്‍ 3. ചന്ദ്രോപരിതലത്തില്‍ ആദ്യമായി ഇന്ത്യയുടെ ഒരു ലാന്‍ഡര്‍ സുരക്ഷിതമായി സോഫ്റ്റ്‌ലാന്‍ഡ് ചെയ്യിപ്പിക്കുക, ലാന്‍ഡറിനുള്ളിലെ റോവറിനെ ചന്ദ്രോപരിതലത്തില്‍ ഇറക്കിവിട്ട് പര്യവേക്ഷണങ്ങള്‍ നടത്തുക എന്നതാണ് പ്രധാനമായും ചന്ദ്രയാന്‍ 3 ദൗത്യത്തിന്റെ ലക്ഷ്യം.

ചന്ദ്രനും ഭൂമിയും തമ്മിലുള്ള ശരാശരി ദൂരം 384,000 കിലോമീറ്ററാണ്. ചന്ദ്രയാന്‍ 2 ദൗത്യം ഏകദേശം ഒന്നരമാസമെടുത്താണ് കഴിഞ്ഞ തവണ ചന്ദ്രനിലെത്തിയത്. വളരെ സങ്കീര്‍ണമായ പ്രക്രിയകളിലൂടെ ചുറ്റിചുറ്റി ചെറിയ ഭ്രമണപഥങ്ങളിലേക്ക് കയറി ചന്ദ്രന്റെ അടുത്തെത്തുന്ന രീതിയാണ് ചന്ദ്രയാന്‍ 2 സ്വീകരിച്ചത്. അവസാന ഭ്രമണപഥത്തില്‍ എത്തിയ ശേഷം ലാന്‍ഡിങ് ബേണ്‍ എന്ന പ്രക്രിയയിലൂടെ ത്രസ്റ്ററുകള്‍ ജ്വലിപ്പിച്ച് ചന്ദ്രോപരിതലത്തില്‍ ലാന്‍ഡ് ചെയ്യാനും ചന്ദ്രയാന്‍ 2വിലെ വിക്രം ലാന്‍ഡര്‍ ശ്രമിച്ചു.

ഇതു വിജയകരമായിരുന്നെങ്കിലും വിക്രം ലാന്‍ഡര്‍ പ്രതീക്ഷിച്ചതുപോലെ സോഫ്റ്റ്‌ലാന്‍ഡ് അല്ല മറിച്ച് ക്രാഷ്ലാന്‍ഡ് ചെയ്യുകയായിരുന്നു. ഏകദേശം ഇതേ രീതി തന്നെയാകും ചന്ദ്രയാന്‍ 3 ദൗത്യവും അവലംബിക്കുന്നത്. അതിനാലാണ് ഒന്നരമാസത്തിലധികം സമയം ചന്ദ്രയാന്‍ 3ക്ക് വേണ്ടിവരുന്നത്.

കപ്പിനും ചുണ്ടിനുമിടയില്‍ നഷ്ടപ്പെട്ട ഒരു ദൗത്യത്തെ ഇക്കുറി ചന്ദ്രോപരിതലത്തില്‍ സുരക്ഷിതമായി ഇറക്കാനുള്ള തീവ്രയത്‌നത്തിലാണ് ഇസ്‌റോ. ചന്ദ്രയാന്‍ മൂന്നിന്റെ പ്രധാന വെല്ലുവിളിയും ഇതുതന്നെ. യുഎസും റഷ്യയും ചൈനയും മാത്രം കൈവരിച്ച നേട്ടം ഓഗസ്റ്റില്‍ ഇന്ത്യയുടെ പേരിലും എഴുതിച്ചേര്‍ക്കാനുള്ള ശ്രമമാണിത്.
ന്മ പാളിയ വിക്രം

2019 സെപ്റ്റംബര്‍ 7ന് പുലര്‍ച്ചെ 1.53ന് സോഫ്റ്റ് ലാന്‍ഡിങ്ങിനു വെറും മൂന്നു മിനിറ്റ് ശേഷിക്കെ, 2.1 കിലോമീറ്റര്‍ അകലെയായാണ് ചന്ദ്രയാന്‍ രണ്ടിന്റെ പ്രഗ്യാന്‍ റോവറിനെ വഹിച്ചിരുന്ന വിക്രം ലാന്‍ഡര്‍ പാളിയത്. സുരക്ഷിതമായി ഇറക്കുന്നതിനിടെ വേഗം നിയന്ത്രിക്കുന്നതിലെ വീഴ്ച ലാന്‍ഡര്‍ ഇടിച്ചിറങ്ങി തകരാനിടയാക്കി. വിക്രത്തില്‍ ഉപയോഗിച്ചിരുന്ന 800 ന്യൂട്ടന്‍ ശേഷിയുള്ള അഞ്ചാമത്തെ ത്രസ്റ്റര്‍ എന്‍ജിനാണ് അന്നു വില്ലനായത്.

ചന്ദ്രയാന്‍ രണ്ടിന്റെ ലാന്‍ഡറില്‍ 800 ന്യൂട്ടന്‍ ശേഷിയുള്ള അഞ്ചു ത്രസ്റ്റര്‍ എന്‍ജിനുകള്‍ ഉണ്ടായിരുന്നെങ്കില്‍ ഇക്കുറി നാലെണ്ണമേയുള്ളൂ. ചന്ദ്രന്റെ 100 കിലോമീറ്റര്‍ അകലെയായുള്ള ഭ്രമണപഥത്തില്‍ എത്തുന്നതു വരെ പ്രൊപ്പല്‍ഷന്‍ മോഡ്യൂളാണ് ലാന്‍ഡറിനെയും റോവറിനെയും വഹിക്കുന്നത്. പുതിയ ദൗത്യത്തിനു സെക്കന്‍ഡില്‍ 3 മീറ്റര്‍ വേഗത്തില്‍ ഇറങ്ങാനുള്ള ശേഷിയുണ്ട്. ചന്ദ്രയാന്‍ 2ന് സെക്കന്‍ഡില്‍ 2 മീറ്ററേ സാധ്യമായിരുന്നുള്ളൂ.

ലാന്‍ഡറിലെ 800 ന്യൂട്ടന്‍ ത്രസ്റ്ററുകള്‍ വിപരീതദിശയില്‍ ജ്വലിപ്പിച്ചാണ് വേഗം നിയന്ത്രിക്കുന്നത്. അവസാന ഘട്ടത്തില്‍ (ഫൈന്‍ ബ്രേക്കിങ്) 2 ത്രസ്റ്റര്‍ എന്‍ജിനുകള്‍ ഒരുമിച്ചു ജ്വലിപ്പിച്ച് സോഫ്റ്റ് ലാന്‍ഡിങ് സാധ്യമാക്കും. ഇറക്കത്തിനിടെ ലാന്‍ഡറിന്റെ ദിശ നിയന്ത്രിക്കാന്‍ ത്രസ്റ്ററുകള്‍ക്കു കഴിയാത്തപക്ഷം ഉപയോഗിക്കാന്‍ 8 റോള്‍ കണ്‍ട്രോള്‍ സിസ്റ്റം ത്രസ്റ്റര്‍ എന്‍ജിനുകള്‍ കൂടി ഇതില്‍ ഉള്‍പ്പെടുത്തി.

ലാന്‍ഡറിന്റെ ഗതിനിയന്ത്രണ സോഫ്റ്റ്വെയര്‍ പ്രോഗ്രാമുകള്‍ ഇത്തവണ കുറ്റമറ്റതാക്കിയിട്ടുണ്ട്. സോഫ്റ്റ് ലാന്‍ഡിങ് നടത്തുന്നതിനിടെ ചന്ദ്രോപരിതലവും ലാന്‍ഡറും തമ്മിലുള്ള അകലം കണക്കാക്കുന്നതില്‍ സോഫ്റ്റ് വെയര്‍ പ്രോഗ്രാമിനു തെറ്റുപറ്റാതിരിക്കാനാണിത്.

ഇറങ്ങുന്ന ചന്ദ്രോപരിതലത്തെക്കുറിച്ചു വിവരങ്ങള്‍ നല്‍കാന്‍ അത്യാധുനിക സെന്‍സറുകള്‍ക്കു പുറമേ 2ലാന്‍ഡര്‍ ഹസാര്‍ഡ് ഡിറ്റക്ഷന്‍ ആന്‍ഡ് അവോയിഡന്‍സ് ക്യാമറകളും ദൗത്യത്തിലുണ്ട്.

ഇക്കുറി ലാന്‍ഡര്‍ ഇറങ്ങുന്ന സ്ഥലത്തിന്റെ വിസ്തൃതി 4 കിലോമീറ്റര്‍ നീളവും 2 കിലോമീറ്റര്‍ വീതിയുമാക്കി കൂട്ടി. അരക്കിലോമീറ്റര്‍ വീതിയും നീളവുമാണ് ചന്ദ്രയാന്‍ രണ്ടിനായി നിശ്ചയിച്ചിരുന്നത്.

അടിയന്തര സാഹചര്യം നേരിടാന്‍ കൂടുതല്‍ ഇന്ധനവും ഇത്തവണ ഉള്‍പ്പെടുത്തി.