പേരൂര്‍ക്കട അമ്പലമുക്ക് ചെടി വില്‍പ്പന കേന്ദ്രത്തിലെ ജീവനക്കാരിയെ വെട്ടി കൊലപ്പെടുത്തിയ കേസിലെ പ്രതിക്ക് സംഭവ സ്ഥലത്തേയും പ്രതി സഞ്ചരിച്ച വഴികളിലെയും സി. സി. ടി. വി ദൃശ്യങ്ങള്‍ നല്‍കണമെന്ന് കോടതി.

ഒന്നാം അഢീഷണല്‍ ജില്ലാ സെഷന്‍സ് ജഡ്ജി കെ. പി. അനില്‍ കുമാറാണ് ദൃശ്യങ്ങള്‍ നല്‍കാന്‍ പ്രോസിക്യൂഷനോട് നിര്‍ദ്ദേശിച്ചത്. ന്യായ വിചാരണക്ക് പ്രോസിക്യൂഷന്‍ ആശ്രയിക്കുന്ന റെക്കോര്‍ഡുകളുടെ പകര്‍പ്പ് പ്രതിക്ക് ലഭിക്കാന്‍ അര്‍ഹതയുണ്ടെന്ന നിയമ വ്യവസ്ഥ പ്രകാരമാണ് കോടതി ഉത്തരവ്.

നെടുമങ്ങാട് കരിപ്പൂര്‍ പുലിപ്പാറ സ്വദേശിനി വിനീതയെയാണ് കന്യാകുമാരി തോവാള വെളളാമടം രാജീവ് നഗര്‍ സ്വദേശി രാജേന്ദ്രന്‍ കുത്തി കൊലപ്പെടുത്തിയത്. കേസിലെ 10 ഓളം സാക്ഷികളുടെ രഹസ്യമൊഴി ആവശ്യപ്പെട്ട് പ്രതിഭാഗം നല്‍കിയ ഹര്‍ജി പരിഗണിക്കുകയായിരുന്നു കോടതി.

വിനീതയുടെ ധരിച്ചിരുന്ന നാലര പവന്‍ തൂക്കമുളള സ്വര്‍ണ്ണമാല കവര്‍ന്ന് എടുക്കുന്നതിനാണ് രാജേന്ദ്രന്‍ പട്ടാപകല്‍ നഗര മധ്യത്തില്‍ വച്ച് വിനീതയെ കൊലപ്പെടുത്തിയത്. കോവിഡ് മഹാമാരിയുടെ മൂര്‍ദ്ധന്യ അവസ്ഥയില്‍ നഗരം കടുത്ത പോലീസ് സുരക്ഷയിലായിരുന്ന 2022 ഫെബ്രുവരി ആറിനായിരുന്നു കൊലപാതകം. ചെടിച്ചട്ടി വാങ്ങാന്‍ എന്ന വ്യാജേന കടയില്‍ എത്തിയ രാജേന്ദ്രന്‍ വിനീതയെ കൊലപ്പെടുത്തി അവരുടെ മാല കൈവശപ്പെടുത്തിയ ശേഷം രക്ഷപ്പെടുകയായിരുന്നു.

അവിടെ നിന്ന് ഓട്ടോ റിക്ഷയില്‍ മുട്ടട വയലിക്കട റോഡിലെ സര്‍ക്കാര്‍ പൊതു കുളത്തിന് സമീപം ഇറങ്ങിയ പ്രതി രക്തം പുരണ്ട ഷര്‍ട്ട് കുളത്തിലുപേക്ഷിച്ചു. ഷര്‍ട്ടിനടിയില്‍ ധരിച്ചിരുന്ന ടീ ഷര്‍ട്ട് ധരിച്ച് ഒരു സ്‌കൂട്ടറില്‍ ലിഫ്റ്റ് അടിച്ച് ഉളളൂര്‍ ഭാഗത്തേക്ക് പോയി. അവിടെ നിന്ന് ഓട്ടോറിക്ഷയില്‍ രാജേന്ദ്രന്‍ ജോലി നോക്കിയിരുന്ന പേരൂര്‍ക്കടയിലെ കുമാര്‍ ഹോട്ടലില്‍ എത്തി.


ഇലക്ട്രിക് ചിരവയില്‍ വച്ച് കൈ മുറിച്ച ശേഷം ഹോട്ടലുടമയോട് ചികിത്സക്കെന്ന് പറഞ്ഞ് അവധിയെടുത്ത് തമിഴ് നാട്ടിലേക്ക് പോയി. തമിഴ് നാട് തിരുനെല്‍വേലിക്ക് സമീപം കാവല്‍ കിണറിലെ ലോഡ്ജ് മുറിയില്‍ നിന്നാണ് പോലീസ് പിന്നീട് പ്രതിയെ പിടികൂടിയത്.