സിദ്ധാര്ഥന്റെ മരണത്തില് പ്രത്യേക അന്വേഷണത്തിനുള്ള ഗവര്ണറുടെ തീരുമാനം ഇന്ന് ഉണ്ടായേക്കും....വിരമിച്ച ഹൈക്കോടതി ജഡ്ജിയെ അന്വേഷണത്തിന് ചുമതലപ്പെടുത്താനാണ് നീക്കം
സിദ്ധാര്ഥന്റെ മരണത്തില് പ്രത്യേക അന്വേഷണത്തിനുള്ള ഗവര്ണറുടെ തീരുമാനം ഇന്ന് ഉണ്ടായേക്കും. വിരമിച്ച ഹൈക്കോടതി ജഡ്ജിയെ അന്വേഷണത്തിന് ചുമതലപ്പെടുത്താനാണ് നീക്കം.
പൊലീസ് ഉദ്യോഗസ്ഥനെ കൂടി അന്വേഷണത്തില് ഉള്പ്പെടുത്തും. മരണത്തില് സി.ബി.ഐ അന്വേഷണം പ്രഖ്യാപിച്ചെങ്കിലും ജുഡീഷ്യല് അന്വേഷണം അനിവാര്യമാണെന്ന നിലപാടിലാണ് ഗവര്ണര്. ഇതിനിടെ, സിദ്ധാര്ഥന്റെ മരണം സംബന്ധിച്ച രേഖകള് കേരള പൊലീസ് സി.ബി.ഐക്ക് കൈമാറുകയും ചെയ്തു.
സ്പെഷല് സെല് ഡിവൈ.എസ്.പി ശ്രീകാന്ത് ഡല്ഹിയില് നേരിട്ടെത്തിയാണ് പേഴ്സനല് മന്ത്രാലയത്തിന് എഫ്.ഐ.ആറിന്റെ ഇംഗ്ലീഷ് വിവര്ത്തനവും കേസിന്റെ നാള്വഴികളും പൊലീസിന്റെ കണ്ടെത്തലുകളുമടങ്ങിയ രേഖകള് കൈമാറിയത്.
സംസ്ഥാന സര്ക്കാര് അന്വേഷണം സി.ബി.ഐക്ക് കൈമാറിയെങ്കിലും രേഖകള് നല്കാന് വൈകിയത് വിവാദമായിരുന്നു. സിദ്ധാര്ഥന്റെ പിതാവ് ജയപ്രകാശ് സര്ക്കാറിനെതിരെ രംഗത്തെത്തിയതിനു പിന്നാലെയാണ് കഴിഞ്ഞദിവസം സി.ബി.ഐക്ക് നേരിട്ട് രേഖകള് കൈമാറുന്നതിന് ഉദ്യോഗസ്ഥനെ അയക്കാനായി സംസ്ഥാന സര്ക്കാര് തീരുമാനിച്ചത്.
രേഖകള് അയക്കാനായി വൈകിയതിന് ആഭ്യന്തര വകുപ്പിലെ മൂന്ന് ഉദ്യോഗസ്ഥരെ സസ്പെന്ഡ് ചെയ്തിട്ടുണ്ടായിരുന്നു. സിദ്ധാര്ഥന്റെ മരണവുമായി ബന്ധപ്പെട്ട അന്വേഷണം സി.ബി.ഐക്ക് വിട്ട് മാര്ച്ച് ഒമ്പതിന് സര്ക്കാര് വിജ്ഞാപനമിറക്കി. ഇതുസംബന്ധിച്ച വിജ്ഞാപനത്തിന്റെ പകര്പ്പ് കൊച്ചിയിലെ സി.ബി.ഐ മേഖല ഓഫീസിലേക്ക് അയച്ചത് മാര്ച്ച് 16നാണ്.
കേസിന്റെ മറ്റു വിശദാംശങ്ങള് അടങ്ങിയ റിപ്പോര്ട്ട് നല്കിയിട്ടുണ്ടായിരുന്നില്ല. സി.ബി.ഐക്ക് കേസ് വിടുമ്പോള് അനുബന്ധ രേഖകള് കൊച്ചി ഓഫിസ് വഴി സി.ബി.ഐ ആസ്ഥാനത്തേക്ക് അയക്കാറുണ്ട്.
അനുബന്ധ രേഖകള് ലഭിക്കാതായതോടെ, എഫ്.ഐ.ആറിന്റെ വിവര്ത്തനം ചെയ്ത പകര്പ്പും മറ്റു രേഖകളുമാവശ്യപ്പെട്ട് കൊച്ചിയിലെ സി.ബി.ഐ ബ്രാഞ്ച് മേധാവി സംസ്ഥാന പൊലീസ് മേധാവിക്ക് മാര്ച്ച് 20ന് കത്ത് നല്കി. ഉദ്യോഗസ്ഥതലത്തില് വീഴ്ച കണ്ടെത്തിയതോടെ ആവശ്യമായ രേഖകള് ഉടന് നേരിട്ട് കൈമാറണമെന്ന് മുഖ്യമന്ത്രി സംസ്ഥാന പൊലീസ് മേധാവിയോട് നിര്ദേശിച്ചു.
https://www.facebook.com/Malayalivartha