ക്രിക്കറ്റില്‍ ഒന്നും അസാധ്യമല്ലെന്ന് തെളിയിക്കുകയാണ് പഞ്ചാബ്. വമ്പന്‍ സ്‌കോര്‍ ഉയര്‍ത്തിയിട്ടും കൊല്‍ക്കത്തയ്ക്കു രക്ഷയില്ല. ഈഡന്‍ ഗാര്‍ഡന്‍സില്‍ നടന്ന ത്രില്ലര്‍ പോരാട്ടത്തില്‍ രണ്ടു വിക്കറ്റ് നഷ്ടത്തില്‍ എട്ടു പന്തുകള്‍ ബാക്കിനില്‍ക്കെയാണ് പഞ്ചാബ് വിജയ റണ്‍സ് കുറിച്ചത്.

സ്‌കോര്‍ കൊല്‍ക്കത്ത: ആറിന് 261, പഞ്ചാബ്: 18.4 ഓവറില്‍ രണ്ട് വിക്കറ്റ് നഷ്ടത്തില്‍ 262. സെഞ്ചറി നേടിയ ജോണി ബെയര്‍‌സ്റ്റോയാണ് പഞ്ചാബിന്റെ വിജയശില്‍പി. 48 പന്തുകള്‍ നേരിട്ട ഇംഗ്ലിഷ് താരം 108 റണ്‍സുമായി പുറത്താകാതെനിന്നു. ശശാങ്ക് സിങ് (28 പന്തില്‍ 68), പ്രബ്‌സിമ്രന്‍ സിങ് (20 പന്തില്‍ 54) എന്നിവര്‍ അര്‍ധസെഞ്ചറി തികച്ചു. ട്വന്റി20 ക്രിക്കറ്റ് ചരിത്രത്തിലെ പിന്തുടര്‍ന്നു ജയിക്കുന്ന ഏറ്റവും വലിയ സ്‌കോറാണ് ഇത്.

ഏറ്റവും കൂടുതല്‍ സിക്‌സുകള്‍ പിറന്ന ട്വന്റി20 പോരാട്ടം കൂടിയായിരുന്നു ഇത്. ഇരു ടീമുകളും ചേര്‍ന്ന് അടിച്ചുകൂട്ടിയത് 42 സിക്‌സുകളാണ്. വെടിക്കെട്ട് തുടക്കമായിരുന്നു മറുപടി ബാറ്റിങ്ങില്‍ പഞ്ചാബിന്റേത്. പവര്‍ പ്ലേയില്‍ ഒരു വിക്കറ്റ് മാത്രം നഷ്ടമാക്കി പഞ്ചാബ് നേടിയത് 93 റണ്‍സ്. ദുഷ്മന്ത ചമീര എറിഞ്ഞ രണ്ടാം ഓവറില്‍ ഓപ്പണര്‍ പ്രഭ്‌സിമ്രന്‍ സിങ് 23 റണ്‍സാണ് അടിച്ചുകൂട്ടിയത്. 18 പന്തുകളില്‍ താരം അര്‍ധ സെഞ്ചറി പൂര്‍ത്തിയാക്കി.

അനുകൂല്‍ റോയിയുടെ ഓവറില്‍ രണ്ടു സിക്‌സും മൂന്നു ഫോറുകളും അടിച്ച് ജോണി ബെയര്‍‌സ്റ്റോ ഓപ്പം ചേര്‍ന്നതോടെ പഞ്ചാബ് സ്‌കോര്‍ അതിവേഗം കുതിച്ചു. പ്രഭ്‌സിമ്രനെ സുനില്‍ നരെയ്ന്‍ റണ്‍ഔട്ടാക്കുകയായിരുന്നു.

തകര്‍ത്തടിക്കുകയെന്നതു മാത്രമായിരുന്നു പിന്നീടെത്തിയ പഞ്ചാബ് ബാറ്റര്‍മാരുടെയും ലക്ഷ്യം. 16 പന്തുകള്‍ നേരിട്ട റിലീ റൂസോ 26 റണ്‍സെടുത്തു പുറത്തായി. ബെയര്‍‌സ്റ്റോയ്ക്കു കൂട്ടായി ശശാങ്ക് സിങ് എത്തിയതോടെ 15 ഓവറില്‍ പഞ്ചാബ് 200 കടന്നു. 45 പന്തുകളില്‍നിന്നാണ് ബെയര്‍‌സ്റ്റോ സെഞ്ചറി തികച്ചത്. അവസാന 12 പന്തുകളില്‍ പഞ്ചാബിനു ജയിക്കാന്‍ വേണ്ടത് വെറും ഒന്‍പതു റണ്‍സായിരുന്നു. എന്നാല്‍ പിന്നീടു ലഭിച്ച നാലു പന്തുകളില്‍ പഞ്ചാബ് വിജയത്തിലെത്തി.

ടോസ് നഷ്ടപ്പെട്ട് ബാറ്റിങ്ങിനിറങ്ങിയ കൊല്‍ക്കത്ത 20 ഓവറില്‍ ആറു വിക്കറ്റ് നഷ്ടത്തില്‍ അടിച്ചുകൂട്ടിയത് 261 റണ്‍സ്. 2024 സീസണില്‍ വമ്പന്‍ സ്‌കോറുകള്‍ പടുത്തുയര്‍ത്തുന്നതു ശീലമാക്കിയ കൊല്‍ക്കത്ത പഞ്ചാബിനെതിരെയും അതു തുടരുകയായിരുന്നു. 37 പന്തില്‍ 75 റണ്‍സെടുത്ത ഫില്‍ സോള്‍ട്ടും, 32 പന്തില്‍ 71 റണ്‍സെടുത്ത സുനില്‍ നരെയ്‌നുമാണ് കൊല്‍ക്കത്ത ഇന്നിങ്‌സിന്റെ കരുത്തായത്.

സോള്‍ട്ട് ആറും നരെയ്ന്‍ നാലും സിക്‌സുകള്‍ ബൗണ്ടറി കടത്തി. ഇരുവരും പുറത്തായതിനു പിന്നാലെയെത്തിയ വെങ്കടേഷ് അയ്യര്‍ (23 പന്തില്‍ 39), ആന്ദ്രെ റസ്സല്‍ (12 പന്തില്‍ 24), ക്യാപ്റ്റന്‍ ശ്രേയസ് അയ്യര്‍ (10 പന്തില്‍ 28) എന്നിവരും സ്വന്തം റോളുകള്‍ ഭംഗിയാക്കി. പഞ്ചാബിനു വേണ്ടി അര്‍ഷ്ദീപ് സിങ് രണ്ടു വിക്കറ്റുകള്‍ വീഴ്ത്തി. സാം കറന്‍, ഹര്‍ഷല്‍ പട്ടേല്‍, രാഹുല്‍ ചാഹര്‍ എന്നിവര്‍ ഓരോ വിക്കറ്റു വീതവും വീഴ്ത്തി. സീസണില്‍ പഞ്ചാബിന്റെ മൂന്നാമത്തെ മാത്രം വിജയമാണിത്. 10 പോയിന്റുമായി കൊല്‍ക്കത്ത രണ്ടാമതുണ്ട്.

അതേസമയം കഴിഞ്ഞ ദിവസത്തെ ഹോം ഗ്രൗണ്ടില്‍ സണ്‍റൈസേഴ്‌സ് ഹൈദരാബാദ് താരങ്ങളുടെ മോശം ബാറ്റിങ് കണ്ട് അസ്വസ്ഥത പ്രകടിപ്പിച്ച് ടീം ഉടമ കാവ്യ മാരന്‍. കഴിഞ്ഞ മത്സരങ്ങളിലെല്ലാം വെടിക്കെട്ട് ബാറ്റിങ് പ്രകടനം പുറത്തെടുത്ത ഹൈദരാബാദ്, ആര്‍സിബിക്കെതിരെ അപ്രതീക്ഷിതമായി തകരുകയായിരുന്നു. ആദ്യം ബാറ്റു ചെയ്ത ആര്‍സിബി 20 ഓവറില്‍ ഏഴു വിക്കറ്റ് നഷ്ടത്തില്‍ 206 റണ്‍സാണു നേടിയത്. സണ്‍റൈസേഴ്‌സ് അനായാസം വിജയത്തിലെത്തുമെന്നായിരുന്നു ആരാധകരുടെ പ്രതീക്ഷ.

എന്നാല്‍ ബെംഗളൂരു ബോളര്‍മാര്‍ അവസരത്തിനൊത്തുയര്‍ന്നതോടെ ഹൈദരാബാദ് ബാറ്റര്‍മാര്‍ പ്രതിരോധത്തിലായി. 37 പന്തില്‍ 40 റണ്‍സെടുത്ത ഷഹബാസ് അഹമ്മദാണ് ഹൈദരാബാദിന്റെ ടോപ് സ്‌കോറര്‍. ഓപ്പണര്‍ അഭിഷേക് ശര്‍മ (13 പന്തില്‍ 31), ക്യാപ്റ്റന്‍ പാറ്റ് കമിന്‍സ് (15 പന്തില്‍ 31) എന്നിവരും ഹൈദരാബാദിനായി തിളങ്ങിയെങ്കിലും ടീമിനെ വിജയത്തിലെത്തിക്കാന്‍ സാധിച്ചില്ല.

20 ഓവറുകള്‍ ബാറ്റു ചെയ്ത ഹൈദരാബാദിന് എട്ടു വിക്കറ്റ് നഷ്ടത്തില്‍ 171 റണ്‍സെടുക്കാന്‍ മാത്രമാണു സാധിച്ചത്. സണ്‍റൈസേഴ്‌സിന്റെ ബാറ്റിങ് വെടിക്കെട്ട് കാണാന്‍ ഹൈദരാബാദിലെത്തിയ കാവ്യ മാരന്‍ ഗാലറിയില്‍ മുഴുവന്‍ സമയവും നിരാശയോടെയാണ് ഇരുന്നത്. ഹൈദരാബാദ് താരങ്ങള്‍ പുറത്താകുമ്പോഴുള്ള കാവ്യയുടെ ഭാവങ്ങള്‍ സമൂഹമാധ്യമങ്ങളില്‍ വൈറലാണ്.