മായം മറിമായം... കേരളത്തില് കോണ്ഗ്രസ് നേതാക്കളില് ഒരു വിഭാഗം എന്ഡിഎയില് ചേരാന് ചര്ച്ച നടത്തിയതായി അസം മുഖ്യമന്ത്രി ഹിമന്ദ ബിശ്വ ശര്മ്മ; കോണ്ഗ്രസിന്റെ പ്രതികരണം കാത്ത് മലയാളികള്; പ്രചാരണത്തിന്റെ അവസാന മണിക്കൂറുകളിലേക്ക് കേരളം; 13 സംസ്ഥാനങ്ങളിലെ 88 മണ്ഡലങ്ങളില് 26ന് ജനവിധി
തെരഞ്ഞെടുപ്പ് അവസാന ലാപ്പിലേക്ക് കടക്കവെ കേരളത്തിലെ കോണ്ഗ്രസ് നേതാക്കള്ക്കെതിരെ ഗുരുതര ആരോപണവുമായി അസം മുഖ്യമന്ത്രിയും ബിജെപി നേതാവുമായ ഹിമന്ദ ബിശ്വ ശര്മ്മ. കേരളത്തില് കോണ്ഗ്രസ് നേതാക്കളിലെ ഒരു വിഭാഗം, പ്രാദേശിക പാര്ട്ടിയുണ്ടാക്കി എന്ഡിഎയില് ചേരാന് ചര്ച്ച നടത്തിയെന്ന് ഹിമന്ദ ബിശ്വ ശര്മ്മ വെളിപ്പെടുത്തി.
ഒരു വിഭാഗം കോണ്ഗ്രസ് നേതാക്കള് പ്രാദേശിക പാര്ട്ടി രൂപീകരിച്ച് എന്ഡിഎ സഹകരണം എന്ന രീതിയിലാണ് ചര്ച്ച നടന്നത്. 3 മാസം മുന്പ് വരെ ചര്ച്ച തുടര്ന്നു. ലോക്സഭ തെരഞ്ഞെടുപ്പിലേക്ക് വേണ്ടെന്ന് പിന്നീട് തീരുമാനിക്കുകയായിരുന്നു. നിയമസഭ തെരഞ്ഞെടുപ്പ് മുന്നില് കണ്ട് അത്തരം ചര്ച്ചകള് തുടരുമെന്നും നേരത്തെ കോണ്ഗ്രസുകാരനായിരുന്ന തനിക്ക് ഏത് സംസ്ഥാനത്തെ നേതാവുമായും ഫോണില് ബന്ധപെടാന് കഴിയുമെന്നും ഹിമന്ത ബിശ്വ ശര്മ കൂട്ടിച്ചേര്ത്തു.
പ്രധാനമന്ത്രിയുടെ രാജസ്ഥാനിലെ പരാമര്ശം സെക്കുലര് പരാമര്ശമാണെന്ന് അദ്ദേഹം അഭിപ്രായപ്പെട്ടു. ഒരു മതത്തിനു മാത്രം വിഭവങ്ങള് നല്കുന്ന നിലപാടാണ് പ്രതിപക്ഷത്തിനുളളത്. മണിപ്പൂരിനെ കുറിച്ച് കേരളത്തിന് അനാവശ്യ ആധിയാണുളളത്. ജനങ്ങളെയും ക്രിസ്ത്യന് ബിഷപ്പുമാര് അടക്കമുളളവരെയും ആരൊക്കെയോ ചേര്ന്ന് തെറ്റിദ്ധരിപ്പിച്ചിരിക്കുകയാണ്. പ്രധാനമന്ത്രിയെ കുറിച്ച് വടക്ക് കിഴക്കന് സംസ്ഥാനങ്ങളിലെ ആര്ക്കും പരാതി ഇല്ലെന്നും ഹിമന്ദ ബിശ്വ ശര്മ്മ കൊച്ചിയില് പറഞ്ഞു.
അതേസമയം ലോക്സഭാ തെരഞ്ഞെടുപ്പ് പരസ്യ പ്രചാരണത്തിന്റെ അവസാന മണിക്കൂറുകളിലേക്കാണ് കേരളം കടക്കുന്നത്. ഇനിയൊരു ദിനം മാത്രം മുന്നില്. കൊടുമ്പിരി കൊണ്ട പ്രചാരണത്തിലാണ് രാഷ്ട്രീയ പാര്ട്ടികളെല്ലാം തന്നെ. ഇനി കൊട്ടിക്കലാശം ഗംഭീരമാക്കാനുള്ള തയ്യാറെടുപ്പിലാണ് മുന്നണികളെല്ലാം.
ഇന്നും നാളെയുമായി സ്ഥാനാര്ത്ഥികളുടെ അവസനാവട്ട മണ്ഡല പര്യടനങ്ങള് നടക്കും. ദേശീയനേതാക്കളും പലയിടങ്ങളിലായി ക്യാമ്പ് ചെയ്യുന്നുണ്ട്. നാളെ വൈകീട്ട് ആറ് വരെയാണ് പരസ്യ പ്രചാരണത്തിനുള്ള സമയം. വ്യാഴാഴ്ച നിശബ്ദപ്രചാരണമാണ്. വെള്ളിയാഴ്ച കേരളം പോളിംഗ് ബൂത്തിലേക്ക് നീങ്ങും.
കേരളത്തിനൊപ്പം രണ്ടാം ഘട്ട വോട്ടെടുപ്പില് പോളിംഗ് ബൂത്തിലെത്തുന്നത് 13 സംസ്ഥാനങ്ങളില് നിന്നായി 88 മണ്ഡലങ്ങളാണ്. കര്ണാടകയിലെ 14, രാജസ്ഥാനിലെ 13 മണ്ഡലങ്ങളിലും ഈ ഘട്ടത്തിലാണ് തെരഞ്ഞെടുപ്പ്.
കലാപബാധിത മേഖലയായ ഔട്ടര് മണിപ്പുരിലെ ശേഷിക്കുന്ന ബൂത്തുകളിലും ഈ ഘട്ടത്തിലാണ് തെരഞ്ഞെടുപ്പ്. ഒപ്പം യുപി, മഹാരാഷ്ട്ര, അസം, ബിഹാര്, ഛത്തീസ്ഗഢ്, മദ്ധ്യപ്രദേശ്, തൃപുര, ബംഗാള്, ജമ്മു & കശ്മീര് എന്നിവിടങ്ങളില് നിന്നെല്ലാമുള്ള മണ്ഡലങ്ങളിലേക്കുള്ള പോളിങ് 26ന് നടക്കും.
നാളെ ഛത്തീസ്ഗഡില് പ്രധാനമന്ത്രി നരേന്ദ്ര മോദി പ്രചാരണം നടത്തും. ശാരീരിക പ്രശ്നങ്ങളെ തുടര്ന്ന് വിശ്രമത്തിലായ രാഹുല് ഗാന്ധി എന്ന് പ്രചാരണം വീണ്ടും തുടങ്ങുമെന്ന് കോണ്ഗ്രസ് അറിയിച്ചിട്ടില്ല.
അതേസമയം പ്രധാനമന്ത്രി നരേന്ദ്ര മോദിയുടെ രാജസ്ഥാനിലെ വിവാദ പ്രസംഗത്തില് തെരഞ്ഞെടുപ്പ് കമ്മീഷന്റെ പ്രതികരണം കാത്തുനില്ക്കുകയാണ് പ്രതിപക്ഷം. പെരുമാറ്റച്ചട്ട ലംഘനത്തിന് നടപടി വേണമെന്നാണ് ആവശ്യം. ഇക്കാര്യമാവശ്യപ്പെട്ട് കോണ്ഗ്രസ് തെരഞ്ഞെടുപ്പ് കമ്മീഷന് പരാതി നല്കിയിട്ടുണ്ട്.
ദില്ലി പൊലീസിനും പ്രസംഗത്തിന്റെ പേരില് പരാതിയെത്തിയിട്ടുണ്ട്. സിപിഎം ആണ് ദില്ലി പൊലീസിന് പരാതി നല്കിയിരിക്കുന്നത്. എന്നാലീ പരാതി സ്റ്റേഷനില് സ്വീകരിക്കാത്തതിനെ തുടര്ന്ന് കമ്മീഷ്ണര്ക്ക് അയച്ചുകൊടുത്തു.
https://www.facebook.com/Malayalivartha