പിടിച്ചെടുത്ത ഇസ്രയേല്‍ കപ്പലിലെ എല്ലാ ജീവനക്കാരെയും വിട്ടയച്ചതായി ഇറാന്‍. എന്നാല്‍ കപ്പല്‍ ഇപ്പോഴും തങ്ങളുടെ നിയന്ത്രണത്തിലാണെന്നും ഇറാന്‍ വിദേശകാര്യമന്ത്രി ഹൊസൈന്‍ അമീറബ്ദുള്ളാഹിയാന്‍ അറിയിച്ചു. 17 ഇന്ത്യക്കാരുള്‍പ്പെടെ 25 ജീവനക്കാരാണ് കപ്പലില്‍ ഉണ്ടായിരുന്നത്. മലയാളിയായ ആന്‍ ടെസ്സ ജോസഫെന്ന ഏകവനിതാ ജീവനക്കാരിയെ ഏപ്രില്‍ 18ന് തന്നെ ഇറാനിയന്‍ അധികൃതര്‍ വിട്ടയച്ചിരുന്നു.

മനുഷ്യത്വപരമായ കാരണങ്ങളാലാണ് ജീവനക്കാരെ മോചിപ്പിക്കുന്നതെന്നും അവര്‍ക്കും കപ്പലിന്റെ ക്യാപ്റ്റനും തങ്ങളുടെ രാജ്യങ്ങളിലേക്ക് മടങ്ങാമെന്നും വിദേശകാര്യമന്ത്രി അറിയിച്ചു.ആന്‍ ടെസ ജോസഫിന് പുറമേ രാമനാട്ടുകര സ്വദേശിയായ ശ്യാംനാഥ് തേലംപറമ്പത്ത്, പാലക്കാട് സ്വദേശി സുമേഷ്, വയനാട് സ്വദേശി പി.വി. ധനേഷ് എന്നിവരാണ് കപ്പലിലുണ്ടായിരുന്ന മലയാളി ജീവനക്കാര്‍.

ഏപ്രില്‍ 13നാണ് ഹോര്‍മൂസ് കടലിടുക്കില്‍ വച്ച് എം. എസ്. സി ഏരീസ് എന്ന കപ്പല്‍ ഇറാന്‍ സേനയായ റവല്യൂഷണറി ഗാര്‍ഡ്‌സ് പിടിച്ചെടുത്തത്. ഇയാല്‍ ഓഫര്‍ എന്ന ഇസ്രയേല്‍ കോടീശ്വരന്റെ കമ്പനിയുടെ വകയാണ് കപ്പല്‍. സിറിയന്‍ തലസ്ഥാനമായ ഡമാസ്‌കസിലെ ഇറാന്‍ കോണ്‍സുലേറ്റ് ഇസ്രയേല്‍ ആക്രമിച്ചതിന് പ്രതികാരം ചെയ്യുമെന്ന് ഇറാന്‍ പ്രഖ്യാപിച്ചതിന് പിന്നാലെയാണ് കപ്പല്‍ പിടിച്ചെടുത്തത്. സുപ്രധാനമായ കപ്പല്‍പാത അടയ്ക്കുമെന്ന് ഇറാന്‍ ഭീഷണി മുഴക്കുകയും ചെയ്തിരുന്നു. ഇപ്പോള്‍ ഇറാന്‍ സമുദ്രാതിര്‍ത്തിക്കുള്ളില്‍ ഇറാന്റെ ജുഡിഷ്യല്‍ കസ്റ്റഡിയിലുള്ള കപ്പലിന്റെ റഡാര്‍ ഓഫാക്കി ഇട്ടിരിക്കുകയാണ്.