കെഎസ്ആര്‍ടിസി ബസ് ഡ്രൈവറും ആര്യാ രാജേന്ദ്രനും തമ്മിലുള്ള തര്‍ക്കം മറ്റൊരു തലത്തിലേക്ക്. സിസിടിവി ദൃശ്യം വന്നതോടെ ചാനലുകള്‍ മേയര്‍ക്കെതിരെ തിരിഞ്ഞ് ചര്‍ച്ച ചെയ്തു. ഏഷ്യാനെറ്റ് പ്രൈം ടൈം ചര്‍ച്ച നടത്തി. വിനു വി ജോണ്‍ ചര്‍ച്ച കൊഴുപ്പിച്ച് മേയര്‍ക്കെതിരെ ആഞ്ഞടിച്ചു.

തിരുവനന്തപുരം മേയര്‍ ആര്യാ രാജേന്ദ്രന്‍ സഞ്ചരിച്ച കാര്‍ കെഎസ്ആര്‍ടിസി ബസിനെ തടയുകയും ഗതാഗത തടസം ഉണ്ടാക്കുകയും ചെയ്തതിന്റെ സിസിടിവി ദൃശ്യങ്ങള്‍ പുറത്ത് വന്നിട്ടും കേസ് എടുത്തില്ല എന്ന പരാതിയാണ് ഉയരുന്നത്. ഡ്രൈവര്‍ യദു നല്‍കിയ പരാതിയില്‍ കന്റോണ്‍മെന്റ് പൊലീസ് ഇതുവരെ കേസ് എടുത്തിട്ടില്ല. മേയറുടെ പരാതി പ്രതിരോധിക്കാനാണ് ഡ്രൈവറുടെ പരാതിയെന്നായിരുന്നു പൊലിസിന്റെ ന്യായം.

യദുവിനെതിരെ അന്വേഷണം നടത്തുന്ന കെഎസ്ആര്‍ടിസി എംഡി ഇന്ന് മന്ത്രിക്ക് റിപ്പോര്‍ട്ട് നല്‍കും. യദുവിനെ ജോലിയില്‍ നിന്ന് പിരിച്ചുവിടേണ്ടെന്നും തല്‍ക്കാലത്തേക്ക് മാറ്റി നിര്‍ത്താനുമാണ് ഗതാഗത വകുപ്പിന്റെ തീരുമാനം. പിരിച്ചുവിട്ടാല്‍ ജീവനക്കാര്‍ക്കിടയില്‍ വ്യാപക പ്രതിഷേധം ഉണ്ടാകുമെന്നാണ് വകുപ്പിന്റെ നിഗമനം. പൊലീസിന്റെ നടപടിയില്‍ പ്രതിഷേധിച്ച് ടിഡിഎഫ്, കെഎസ്ആര്‍ടിസി ചീഫ് ഓഫീസിലേക്കും യൂത്ത് കോണ്‍ഗ്രസ് പ്രവര്‍ത്തകര്‍ കന്റോണ്‍മെന്റ് സ്റ്റേഷനിലേക്കും ഇന്ന് മാര്‍ച്ച് നടത്തും.

സമൂഹത്തില്‍ സ്ത്രീകള്‍ക്ക് ഇറങ്ങിനടക്കാന്‍വേണ്ടിയാണ് താന്‍ കെ.എസ്.ആര്‍.ടി.സി ഡ്രൈവര്‍ക്കെതിരെ പ്രതികരിച്ചതെന്ന് മേയര്‍ ആര്യാ രാജേന്ദ്രന്‍ പറഞ്ഞു. സംഭവത്തില്‍ ഡ്രൈവര്‍ മാപ്പുപറഞ്ഞെങ്കിലും നിയമപരമായി നേരിടാന്‍തന്നെ തീരുമാനിക്കുകയായിരുന്നെന്നും മേയര്‍ മാധ്യമപ്രവര്‍ത്തകരോട് പറഞ്ഞു.

അപകടകരമായി വാഹനം ഓടിച്ചതിന് ഇതിനുമുമ്പും ഈ ഡ്രൈവര്‍ക്കെതിരെ കേസെടുത്തിട്ടുണ്ട്. അന്ന് അദ്ദേഹം സ്വകാര്യ ബസ് ഡ്രൈവറായിരുന്നു. കെ.എസ്.ആര്‍.ടി.സി ബസിനെയാണ് അദ്ദേഹം ഇടിച്ചത്. ഒരു സ്ത്രീതന്നെ അദ്ദേഹത്തിനെതിരെ പരാതി കൊടുത്തിട്ടുണ്ട്. പേരൂര്‍ക്കട സ്റ്റേഷനിലും ഈ ഡ്രൈവര്‍ക്കെതിരെ ഒരു പരാതിയുണ്ട്. നിരന്തരമായി അയാള്‍ അപകടകരമായി വാഹനം ഓടിക്കുന്ന ആളാണ്. സൂപ്പര്‍ ഫാസ്റ്റ് ബസ് സൈഡ് തന്നില്ലെന്ന് പറഞ്ഞ് പ്രശ്‌നമുണ്ടാക്കാന്‍ ഞങ്ങള്‍ അത്ര കോമണ്‍ സെന്‍സില്ലാത്തവരല്ല.

രാത്രി ഫോണില്‍ വിളിച്ച് ക്ഷമ ചോദിച്ചപ്പോഴും കെ.എസ്.ആര്‍.ടി.സി ഡ്രൈവറെ താന്‍ സഹോദരായെന്നാണ് വിളിച്ചത്. ഞങ്ങളാരും അസഭ്യം പറയുന്ന കുടുംബത്തില്‍നിന്ന് വന്നതല്ല. അപ്പുറത്ത് രണ്ട് ജനപ്രതിനിധികള്‍ ആയതുകൊണ്ട് ബോധപൂര്‍വം കരിവാരി തേയ്ക്കുകയാണ്. ബസ് തങ്ങള്‍ തടഞ്ഞിട്ടില്ലെന്നും മേയര്‍ പറഞ്ഞു.

അതേസമയം മേയറോട് മാപ്പ് ചോദിച്ചത് പൊലീസ് നിര്‍ബന്ധിച്ചത് പ്രകാരമാണെന്ന് കെ.എസ്.ആര്‍.ടി.സി ബസ് ഡ്രൈവര്‍ യദു മാധ്യമങ്ങളോട് പറഞ്ഞു. കന്റോണ്‍മെന്റ് പൊലീസ് എത്തിയാണ് രാത്രി 10.30ഓടെ സ്റ്റേഷനിലേക്ക് കൊണ്ടുപോയത്. അവിടെയെത്തിയപ്പോള്‍ ഒരു വനിതാ പൊലീസുകാരിയാണ് 'നീ മുഖ്യമന്ത്രിയൊന്നും അല്ലല്ലോ, വെറുതെ വാശിപിടിക്കാന്‍ നില്‍ക്കാതെ മാപ്പ് പറഞ്ഞ് കേസില്‍നിന്ന് ഊരിപ്പോകാന്‍' ഉപദേശിച്ചത്.

താല്‍ക്കാലിക ജീവനക്കാരനായ എനിക്ക് അതുകേള്‍ക്കാനേ നിവൃത്തിയുണ്ടായിരുന്നുള്ളൂ. ഫോണില്‍ വിളിച്ച് എന്റെ ഭാഗത്തുനിന്ന് എന്തെങ്കിലും തെറ്റ് സംഭവിച്ചിട്ടുണ്ടെങ്കില്‍ മാപ്പെന്ന് പറഞ്ഞു. തെറ്റു സംഭവിച്ചിട്ടുണ്ടെങ്കില്‍ എന്നല്ല, 'തെറ്റുസംഭവിച്ചു മാപ്പു തരണം' എന്ന് പറയണമെന്നായിരുന്നു മേയറുടെ ആവശ്യം. ഇതിന് തയാറാകാതെ വന്നതോടെയാണ് അറസ്റ്റ് രേഖപ്പെടുത്തിയത്. നീതി ലഭിക്കുംവരെ നിയമപരമായി പോരാടുമെന്നും അദ്ദേഹം പറഞ്ഞു.