ബീഫ് കറിവച്ചു നല്കാത്തതിന്റെ ദേഷ്യത്തില് ഹൃദ്രോഗിയായ അമ്മയ്ക്ക് ക്രൂരമര്ദ്ദനം
ബീഫ് കറിവച്ചു നല്കാത്തതിന്റെ ദേഷ്യത്തില് ഹൃദ്രോഗിയായ അമ്മയെ മകന് തല്ലിച്ചതച്ചു. എറണാകുളം നഗരമദ്ധ്യത്തിലെ വീട്ടിലാണ് സംഭവം. മാധവ ഫാര്മസിക് സമീപം അമൂല്യ സ്ട്രീറ്റ് ചെലിപ്പിള്ളി വീട്ടില് ജൂണി കോശി (76) തലയ്ക്കും നെഞ്ചിനും പരിക്കേറ്റ് ചികിത്സതേടി. മനുഷ്യാവകാശ പ്രവര്ത്തകരുടെ ഇടപെടലിലൂടെ ജൂണി നല്കിയ പരാതിയില് മകന് എല്വിന് കോശിയെ (47) എറണാകുളം സെന്ട്രല് പൊലീസ് അറസ്റ്റ് ചെയ്തു.
25ന് രാവിലെയായിരുന്നു സംഭവം. രണ്ട് മക്കള്ക്കൊപ്പമാണ് ജൂണി കോശി കഴിയുന്നത്. സംഭവദിവസം മൂത്ത മകനും കുടുംബവും വീട്ടിലുണ്ടായിരുന്നില്ല. രാവിലെ സ്വകാര്യ ബാങ്കിലെ കളക്ഷന് ഏജന്റായ എല്വിന് ബീഫുമായി വീട്ടിലെത്തി. അമിത മദ്യലഹരിയിലായിരുന്ന ഇയാള്. ഉടന് ബീഫ് കറിവച്ചു നല്കണമെന്ന് അമ്മയോട് ആവശ്യപ്പെട്ടു. എന്നാല് ഇപ്പോള് കറിവച്ചു നല്കാനാവില്ലെന്ന് പറഞ്ഞതിന്റെ ദേഷ്യത്തില് ജൂണിയെ മകന് തലയ്ക്കിടിച്ച് വീഴ്ത്തിയ ശേഷം നെഞ്ചില് ചവിട്ടുകയായിരുന്നു. പ്രാണരക്ഷാര്ത്ഥം വീടിന് പുറത്തേയ്ക്ക് ഓടിയ ഇവര് സമീപത്തെ വനിതാ ഹോസ്റ്റലില് അഭയംതേടി.
പിന്തുടര്ന്നെത്തിയ മകന്, ചപ്പാത്തി പരത്തുന്ന കോലുകൊണ്ട് ഹോസ്റ്റലിലിട്ടും മൃഗീയമായി മര്ദ്ദിച്ചു. ഇവിടെ നിന്ന് ഓടി രക്ഷപ്പെടാന് ശ്രമിച്ചെങ്കിലും തടഞ്ഞു നിറുത്തിയും മര്ദ്ദനം തുടര്ന്നു. ഹോസ്റ്റല് അന്തേവാസികളാണ് ജൂണിയെ രക്ഷപ്പെടുത്തിയത്. അമ്മയെ മകന് മര്ദ്ദിക്കുന്ന രംഗങ്ങള് ഹോസ്റ്റല് അന്തേവാസികള് പകര്ത്തിയിരുന്നു. ഇത് മനുഷ്യാവകാശ പ്രവര്ത്തകരുടെ കൈയിലെത്തിയതോടെയാണ് വിവരം പൊലീസറിയുന്നത്. എല്വിന് മുമ്പും അമ്മയെ മര്ദ്ദിച്ചതിന് പൊലീസ് പിടിയിലായിട്ടുണ്ട്. അന്ന് അമ്മ പരാതി നല്കാന് കൂട്ടാക്കിയിരുന്നില്ല.പേസ്മേക്കറിന്റെ സഹായത്തോടെയാണ് ജൂണി ജീവന് നിലനിറുത്തുന്നത്. നെഞ്ചിലടക്കം ക്രൂരമര്ദ്ദനമേറ്റെങ്കിലും പേസ്മേക്കറിന് തകരാറില്ലെന്ന് പൊലീസ് പറഞ്ഞു. എല്വിനെ രാത്രിയോടെ സ്റ്റേഷന് ജാമ്യത്തില് വിട്ടു.
https://www.facebook.com/Malayalivartha