ലോക പാരാ  അത്‌ലറ്റിക്‌സ് ചാമ്പ്യന്‍ഷിപ്പില്‍ വനിതകളുടെ 400 മീറ്റര്‍ ടി20 വിഭാഗത്തില്‍ ലോക റെക്കോഡോടെ സ്വര്‍ണം നേടി ഇന്ത്യയുടെ ദീപ്തി ജീവന്‍ജി.

55.07 സെക്കന്‍ഡുകള്‍ കൊണ്ട്  ദീപ്തി ഫിനിഷ് ചെയ്തു. തുര്‍ക്കിയുടെ ഐസല്‍ ഒന്‍ഡര്‍ രണ്ടാമതും (55.19 സെക്കന്‍ഡ്സ്) എക്വഡോറിന്റെ ലിസന്‍ഷെല ആങ്കുലോ മൂന്നാമതും (56.68 സെക്കന്‍ഡ്സ്) ഫിനിഷ് ചെയ്തു. ടി20 വിഭാഗമെന്നത് ബുദ്ധിപരമായ വെല്ലുവിളി നേരിടുന്ന ആളുകള്‍ക്കുവേണ്ടി നടത്തുന്ന മത്സരമാണ്.

അമേരിക്കയുടെ ബ്രിയന്ന ക്ലാര്‍ക്കിന്റെ പേരിലായിരുന്നു ടി20 വിഭാഗം 400 മീറ്ററില്‍ ഇതുവരെ നിലനിന്ന റെക്കോഡ് (55.12 സെക്കന്‍ഡ്സ്). കഴിഞ്ഞ വര്‍ഷം പാരീസില്‍ നടന്ന ചാമ്പ്യന്‍ഷിപ്പിലായിരുന്നു ഈ നേട്ടം. ഈ ഇനത്തിലെ പുതിയ ലോക റെക്കോഡ് ഇന്ത്യന്‍ താരത്തിനൊപ്പം നില്‍ക്കും.


ഞായറാഴ്ച 56.18 സെക്കന്‍ഡില്‍ ഫിനിഷ് ചെയ്ത് ഏഷ്യന്‍ റെക്കോഡോടെയാണ് ഫൈനലില്‍ പ്രവേശിച്ചിരുന്നത്. അതേസമയം പുരുഷന്മാരുടെ എഫ്56 വിഭാഗം ഡിസ്‌കസ് ത്രോയില്‍ യോഗേഷ് കാത്തുനിയ വെള്ളി നേടി. നിലവില്‍ ഒരു സ്വര്‍ണവും ഒരു വെള്ളിയും രണ്ട് വെങ്കലവുമാണ് ഇന്ത്യക്കുള്ളത്. ഞായറാഴ്ച ടി47 ഹൈജമ്പില്‍ നിഷാദ് കുമാറും ടി35 200 മീറ്ററില്‍ പ്രീതി പാലും യഥാക്രമം വെള്ളിയും വെങ്കലവും നേടിയിരുന്നു. ചാമ്പ്യന്‍ഷിപ്പ് മേയ് 25 വരെയുണ്ടാകും.