ഡ്രൈവിങ് ടെസ്റ്റ് പരിഷ്‌കരണത്തില്‍ ഇളവുമായി ഗതാഗത വകുപ്പ്. പ്രതിദിന ലൈസന്‍സ് 40 ആക്കും. ഇന്നലെ പുറത്തിറക്കിയ കരട് സര്‍ക്കുലറിലാണ് ഇക്കാര്യം പറയുന്നത്. 15 വര്‍ഷം പഴക്കമുള്ള വാഹനങ്ങള്‍ മാറ്റാന്‍ ആറ് മാസത്തെ സാവകാശം നല്‍കും.

അതേസമയം െ്രെഡവിങ് ടെസ്റ്റ് പരിഷ്‌കരണം സ്‌റ്റേ ചെയ്യണമെന്ന് ഹര്‍ജി ഇന്നലെ ഹൈക്കോടതി തള്ളിയിരുന്നു. ഗതാഗത കമ്മീഷണറുടെ സര്‍ക്കുലര്‍ അടിയന്തരമായി സ്‌റ്റേ ചെയ്ത് ഇടക്കാല ഉത്തരവ് പുറപ്പെടുവിക്കാനുള്ള സാഹചര്യം കാണുന്നില്ലെന്ന് വ്യക്തമാക്കി കോടതി.


കേസില്‍ വിശദമായ വാദം പിന്നീട് കേള്‍ക്കും. െ്രെഡവിങ് സ്‌കൂള്‍ ഉടമകള്‍, ജീവനക്കാര്‍, യൂണിയന്‍ പ്രതിനിധികള്‍ തുടങ്ങിയവര്‍ കോടതിയെ സമീപിച്ചത്. നാലു ഹര്‍ജികളാണ് ജസ്റ്റിസ് കൈസര്‍ എടപ്പഗത്തിന്റെ ബെഞ്ച് പരിഗണിച്ചത്. 

അതേസമയം പ്രതിദിന ലൈസന്‍സ് 40 ആക്കും. ഇതില്‍ 25 പുതുതായി വരുന്നവര്‍ക്കാകും. 10 എണ്ണം റീ ടെസ്റ്റ് ആയിരിക്കും. വിദേശത്തേക്ക് അടിയന്തിരമായി പോകേണ്ട അഞ്ച് പേരെയും ഇക്കാര്യത്തില്‍ പരിഗണിക്കുകയും ചെയ്യും. ഈ വിഭാഗത്തില്‍ അപേക്ഷകര്‍ ഇല്ലെങ്കില്‍ ലേണേഴ്‌സ് ലൈസന്‍സിന്റെ കാലാവധി തീരാനുള്ള അഞ്ച് പേരെയാകും പരിഗണിക്കുക.

15 വര്‍ഷം പഴക്കമുള്ള വാഹനം മാറ്റണമെന്ന നിര്‍ദ്ദേശത്തോടായിരുന്നു യൂണിയനുകളുടെ ശക്തമായ എതിര്‍പ്പ്. അതിന് 6 മാസത്തെ സാവകാശം നല്‍കിയാകും പുതിയ സര്‍ക്കുലര്‍ ഇറങ്ങുക. ആദ്യം റോഡ് ടെസ്റ്റാകും നടത്തുക. ഇതിന് ശേഷമാകും എച്ച് എടുക്കേണ്ടി വരിക. പുതിയ രീതിയില്‍ ഗ്രൗണ്ട് സജ്ജമാക്കാന്‍ 3 മാസത്തെ സമയം നല്‍കുകയും ചെയ്യും. വാഹനങ്ങളില്‍ ക്യാമറ വെക്കാനും 3 മാസത്തെ സാവകാശം ഉണ്ടാകും. എന്നാല്‍ പുതിയ നിര്‍ദ്ദേശത്തോട് സി ഐ ടി യുവിന് പൂര്‍ണ്ണയോജിപ്പില്ലെന്നാണ് സൂചനകള്‍.

പ്രതിദിന ലൈസന്‍സുകളുടെ എണ്ണം ഇനിയും കൂട്ടണമെന്നാണ് ആവശ്യം. പക്ഷെ ഗതാഗതവകുപ്പ് അയഞ്ഞ സാഹചര്യത്തില്‍ തല്‍ക്കാലം സമരം നിര്‍ത്താനിടയുണ്ടായേക്കും