വ്യാജ ദൃശ്യങ്ങള്‍ നിര്‍മ്മിച്ച് പ്രചരിപ്പിച്ച യുവാവ് അറസ്റ്റില്‍
വയനാട്ടില്‍ അപകടം നടന്നെന്ന പേരില്‍ വ്യാജ ദൃശ്യങ്ങള്‍ നിര്‍മ്മിച്ച യുവാവിനെ സൈബര്‍ പൊലീസ് പിടികൂടി. ആലപ്പുഴ തിരുവമ്പാടി സ്വദേശി അഷ്‌കര്‍ അലിയെയാണ് വയനാട് സൈബര്‍ പൊലീസ് അറസ്റ്റുചെയ്തത്. ആലപ്പുഴയില്‍ നാലു കേസുകളില്‍ ഇയാള്‍ പ്രതിയാണെന്നാണ് പൊലീസ് വ്യക്തമാക്കുന്നത്. നിലവില്‍ വ്യാജ വീഡിയോ നിര്‍മ്മിച്ച കേസിലാണ് ഇയാളെ പിടികൂടിയത്.
വയനാട് ജില്ലയിലെ ഒരു വിനോദ സഞ്ചാര കേന്ദ്രത്തിലെ സിപ്പ് ലൈനില്‍ അപകടമുണ്ടായെന്ന പേരിലാണ് പ്രതി വ്യാജ വീഡിയോ എഐ വഴി നിര്‍മ്മിച്ച് വിവിധ സോഷ്യല്‍ മീഡിയ പ്ലാറ്റ്‌ഫോമുകളിലൂടെ പ്രചരിപ്പിച്ചിരുന്നത്. കുഞ്ഞിനെയും എടുത്ത് ഒരു അമ്മ സിപ്പ് ലൈനില്‍ കയറാന്‍ ഒരുങ്ങുന്നതും അതിന് ശേഷം പെട്ടെന്ന് സിപ്പ് ലൈന്‍ പൊട്ടി ഓപ്പറേറ്റര്‍ അടക്കം താഴ്ചയിലേക്ക് വീഴുന്നതുമാണ് വ്യാജവീഡിയോയില്‍ കാണിച്ചിരുന്നത്.
പിന്നീട് അന്വേഷണത്തിനൊടുവില്‍ സ്ഥലത്ത് അങ്ങനെയൊരു അപകടം നടന്നിട്ടില്ലെന്ന് പൊലീസ് സ്ഥിരീകരിക്കുകയും വീഡിയോ വ്യാജമാണെന്ന് തെളിയുകയുമായിരുന്നു. അതിനു ശേഷം നടന്ന സൈബര്‍ പൊലീസിന്റെ വിശദമായ അന്വേഷണത്തിലാണ് പ്രതിയെ ഇപ്പോള്‍ പിടികൂടാനായത്.
https://www.facebook.com/Malayalivartha
