ചോറ്റാനിക്കരയില്‍ പതിനാറുകാരി ആത്മഹത്യ ചെയ്ത സംഭവത്തില്‍ വന്‍ ദുരൂഹതയുണ്ടെന്ന ആരോപണവുമായി കുടുംബം. മകള്‍ക്ക് കൊറിയയില്‍ സുഹൃത്തുണ്ടായിരുന്നു എന്ന പ്രചാരണം വിശ്വസിക്കുന്നില്ലെന്നും, നാട്ടിലുള്ള ആരോ മകളെ കെണിയില്‍ പെടുത്തിയതാണെന്നും പിതാവ് മഹേഷ് ആരോപിച്ചു. പെണ്‍കുട്ടിയുടെ കൊറിയന്‍ ഭാഷയോടുള്ള താല്‍പ്പര്യം ആരെങ്കിലും മുതലെടുത്തതാകാം എന്നാണ് കുടുംബത്തിന്റെ സംശയം.

എട്ടാം ക്ലാസ് മുതല്‍ മകള്‍ക്ക് കൊറിയന്‍ ഭാഷയോടും സംസ്‌കാരത്തോടും കടുത്ത താല്‍പ്പര്യമുണ്ടായിരുന്നുവെന്ന് പിതാവ് പറയുന്നു. ഇതിനായി എല്ലാ സൗകര്യങ്ങളും താന്‍ തന്നെ ഒരുക്കിക്കൊടുത്തിരുന്നു. എന്നാല്‍ കൊറിയയില്‍ ഉണ്ടെന്ന് പറയുന്ന സുഹൃത്ത് വാഹനാപകടത്തില്‍ മരിച്ച വിവരം മകള്‍ എങ്ങനെ അറിഞ്ഞു എന്നതില്‍ വ്യക്തതയില്ല. ഈ വിവരങ്ങള്‍ മകള്‍ക്ക് നല്‍കിയത് മറ്റാരോ ആണെന്നാണ് കുടുംബം വിശ്വസിക്കുന്നത്.

പെണ്‍കുട്ടി എഴുതിയതെന്ന് പറയുന്ന ആത്മഹത്യ കുറിപ്പിലെ കാര്യങ്ങള്‍ വിശ്വസിക്കാന്‍ സാധിക്കുന്നില്ലെന്ന് പിതാവ് മഹേഷ് പറഞ്ഞു. മകളുടെ സ്വഭാവത്തിലോ രീതികളിലോ സംശയകരമായി ഒന്നും തോന്നിയിരുന്നില്ല. പുറത്തുനിന്നുള്ള ആരോ പെണ്‍കുട്ടിയെ മാനസികമായി സ്വാധീനിച്ചിരുന്നതായി സംശയമുണ്ട്. മകളുടെ മരണത്തിന് പിന്നിലുള്ള യഥാര്‍ത്ഥ കാരണങ്ങള്‍ പുറത്തുകൊണ്ടുവരണമെന്ന് കുടുംബം ആവശ്യപ്പെടുന്നു.