നാല് ദിവസത്തെ പൊലീസുകാരുടെ ശ്രമം കാറ്റില് പറത്തി സമീന 'തൊണ്ടിമുതല്' ക്ലോസറ്റില് ഒഴുക്കി
നിലമ്പൂരില് കുട്ടിയുടെ കഴുത്തില്നിന്ന് തട്ടിപ്പറിച്ച സ്വര്ണമാല പുറത്തെടുക്കാനായി എനിമയടക്കം നല്കി കാത്തിരുന്ന പൊലീസിനെ കബളിപ്പിച്ച് പ്രതി, മാല ക്ലോസറ്റിലേക്ക് ഒഴുക്കിക്കളഞ്ഞു. പ്രതി സമീന പൊലീസിന്റെ പിടിയിലായി കോഴിക്കോട് മെഡിക്കല് കോളജ് ആശുപത്രിയില് നിരീക്ഷണത്തിലിരിക്കെയാണ് സംഭവം. നാല് ദിവസമായി സ്വര്ണം വീണ്ടെടുക്കാനുള്ള ശ്രമത്തിനിടെയാണ് ഇന്ന് രാത്രിയോടെ നാടകീയ സംഭവം ഉണ്ടായത്. സമീന ശുചിമുറിയില് പോയപ്പോള് മാല പുറത്തു വന്നു. എന്നാല് പെട്ടെന്ന് തന്നെ പൊലീസുകാരെ കബളിപ്പിച്ച ഇവര് മാല ക്ലോസറ്റിലേക്ക് ഒഴുക്കുകയായിരുന്നു. ഇതോടെ തൊണ്ടി മുതല് വീണ്ടെടുക്കല് അവതാളത്തിലായി. അതിനിടെ പ്രതി സമീനയെ റിമാന്ഡ് ചെയ്തു. പൊലീസുകാരുടെ കൃത്യ നിര്വഹണം തടസ്സപ്പെടുത്തി എന്ന കുറ്റം കൂടി ചുമത്തിയാണ് റിമാന്ഡ് ചെയ്തത്.
നാല് ദിവസം മുന്നെയാണ് നിലമ്പൂരിലെ ക്ലിനിക്കില് ഡോക്ടറെ കാണിക്കാനെത്തിയ കുട്ടിയുടെ 3.5 ഗ്രാം തൂക്കമുള്ള സ്വര്ണമാല തട്ടിപ്പറിച്ച് പാലേമാട് കല്ലന്കുന്നന് സമീന വിഴുങ്ങിത്. പിന്നാലെ പിടിയിലായ സമീനയെ കഴിഞ്ഞ ദിവസമാണ് മെഡിക്കല് കോളജില് പ്രവേശിപ്പിച്ചത്. നിലമ്പൂര് ജില്ല ആശുപത്രിയില് നടത്തിയ എക്സ്റേ പരിശോധനയില് യുവതിയുടെ വയറ്റില് ആഭരണം കണ്ടെത്തിയിരുന്നു. വയറ്റില്നിന്ന് മാല പുറത്തെടുക്കാനായി എനിമ നല്കിയെങ്കിലും കാര്യമുണ്ടായിരുന്നില്ല.
പ്രതിയെ കോടതിയില് ഹാജരാക്കിയ ശേഷം കസ്റ്റഡിയില് വാങ്ങി പൊലീസ് വീണ്ടും എനിമ നല്കിയിട്ടും തൊണ്ടിമുതല് പുറത്ത് വരാത്തതിനെ തുടര്ന്ന് മഞ്ചേരി മെഡിക്കല് കോളജിലും, പിന്നീട് കോഴിക്കോട് മെഡിക്കല് കോളജിലെ സര്ജറി വാര്ഡിലേക്കും മാറ്റുകയായിരുന്നു. എനിമ നല്കി അഞ്ച് ദിവസം കാത്തിരിക്കാനാണ് ഡോക്ടര്മാര് നല്കിയ നിര്ദേശം. മെഡിക്കല് കോളജ് ആശുപത്രിയില് രണ്ട് വനിത സി പി ഒ മാരുടെ കാവലിലായിരുന്നു പ്രതി. ഇതിനിടയിലാണ് ഇന്ന് രാത്രിയോടെ മാല പുറത്തുവന്നതും പൊലീസുകാരെ കബളിപ്പിച്ച് സമീന അത് ക്ലോസറ്റിലേക്ക് ഒഴുക്കിയത്.
https://www.facebook.com/Malayalivartha
