ഒരു വിനയകുമാര്‍ നിന്നെ അന്വേഷിച്ചെന്നും ഫോണ്‍ നമ്പര്‍ ചോദിച്ചെന്നും ഫോണ്‍ നമ്പര്‍ കൊടുക്കുന്നതിനു മുന്‍പ് ആദ്യം നീ വിനയകുമാറിനെ കണ്ടു നോക്ക്' എന്നു പറഞ്ഞാണ് കോട്ടയം സ്വദേശിനി തന്റെ സുഹൃത്തിനു മെസ്സേജ് അയച്ചത്. വാട്‌സാപ്പില്‍ തമാശക്കു പ്രചരിക്കുന്ന വിനയകുമാറിന്റെ ചിത്രമായിരുന്നു തന്റെ സുഹൃത്തിനു അയച്ചു കൊടുത്തതും. ഉഗാണ്ട സ്വദേശിയെന്ന് തോന്നിക്കുന്ന പ്രായമായ ഒരാള്‍ ചിരിക്കുന്ന ചിത്രമാണ് വീട്ടമ്മയ്ക്കു കൂട്ടുകാരി വാട്‌സാപിലൂടെ അയച്ചു കൊടുത്തത്. ചിത്രം കിട്ടിയത് ആകട്ടെ സുഹൃത്തിന്റെ ഭര്‍ത്താവിനാണ്.

രണ്ടു ദിവസം മുന്‍പാണ് നാടകീയ സംഭവങ്ങളുടെ തുടക്കം. കൂട്ടുകാരി തനിക്ക് ലഭിക്കുന്ന കൗതുക ചിത്രങ്ങള്‍ വീട്ടമ്മയ്ക്കും അയയ്ക്കാറുണ്ടായിരുന്നു. ഇത്തരത്തില്‍ ലഭിച്ച കൗതുകമുള്ള ചിത്രമാണ് കഴിഞ്ഞ ദിവസം കൂട്ടുകാരി വീട്ടമ്മയ്ക്ക് അയച്ചത്. ഭാര്യയുടെ സുഹൃത്ത് അയച്ച ഫോട്ടോ കണ്ടതോടെ ഫോട്ടോയിലെ ആള്‍ തന്റെ ഭാര്യയുടെ ജാരനാണെന്ന് തെറ്റിദ്ധരിച്ച ഭര്‍ത്താവ് മദ്യപിച്ചെത്തി ഭാര്യയെ ക്രൂരമായി മര്‍ദ്ദിച്ചു.

യാഥാര്‍ഥ്യം മനസിലാവാതെ ചിത്രത്തിലേത് ഭാര്യയുടെ ജാരനെന്നു തന്നെ ഉറപ്പിച്ച് ചിത്രം വീട്ടമ്മയുടെ പിതാവിനെ കാണിച്ച് കൊടുക്കുകയും നാട്ടുകാരനോട് ഭാര്യയുടെ ജാരന്റെ ചിത്രം മൊബൈലില്‍ താന്‍ കണ്ടതായി പറയുകയും ചെയ്തു. ഇതറിഞ്ഞ ഭാര്യ അപമാന ഭാരത്തോടെ വീട് വിട്ട് ഇറങ്ങി ഗാന്ധിനഗറിലെ സ്ത്രീ-ശിശു സംരക്ഷണ കേന്ദ്രത്തില്‍ അഭയം തേടി. എന്നിട്ടും ഭര്‍ത്താവ് വിട്ടില്ല ഫോണിലൂടെ ഭര്‍ത്താവിന്റെ ഭീഷണി തുടര്‍ന്നതോടെ ഇന്നലെ വനിതാ പൊലീസ് സ്റ്റേഷനിലെത്തി പരാതി നല്‍കി.

മോണകാട്ടി ചിരിക്കുന്ന കറുത്ത മനുഷ്യനാണ് ചിത്രത്തിലുള്ളത്. ഇയാളുടെ ചിത്രത്തിനടിയില്‍ വിനയകുമാര്‍ എന്നും രേഖപ്പെടുത്തിയിട്ടുണ്ട്. എന്നാല്‍ ഇതു കണ്ട് സംശയ രോഗിയായ ഭര്‍ത്താവ് വിശദീകരണം പോലും ചോദിക്കാതെ മര്‍ദ്ദിക്കുകയായിരുന്നെന്നും വീട്ടമ്മ പറയുന്നു. സത്യാവസ്ഥ ബോധ്യപ്പെടുത്തുന്നതിനും കൗണ്‍സലിങ്ങിനുമായി വീട്ടമ്മയുടെ ഭര്‍ത്താവിനെ സാമൂഹിക പ്രവര്‍ത്തകര്‍ ഫോണ്‍ വിളിച്ചെങ്കിലും മറുപടിപോലും പറയാതെ ഇവരെ അസഭ്യം പറഞ്ഞതായും പരാതിയുണ്ട്. രണ്ടു കുട്ടികളുടെ മാതാവാണ് വീട്ടമ്മ.