ചാനലുകാരുടെ പാരാക്രമം നടുറോഡില്‍. ഇന്നലത്തെ ദിവസം മാത്രം സൂപ്പര്‍ സ്റ്റാറായിരുന്ന ഭാഗ്യലക്ഷ്മിയെ അന്തിചര്‍ച്ചയില്‍ പങ്കെടുപ്പിക്കാന്‍ വേണ്ടി ചാനല്‍ പ്രവര്‍ത്തകര്‍ തമ്മിലടിച്ചു. മാതൃഭൂമി ന്യൂസിന്റെ ഓഫീസില്‍ നിന്നിറങ്ങി റിപ്പോര്‍ട്ടര്‍ ചാനലിന്റെ ചര്‍ച്ചയില്‍ പങ്കെടുക്കാന്‍ പോയ ഭാഗ്യലക്ഷ്മിയെ വഴിയില്‍ വാഹനം തടഞ്ഞ് ഏഷ്യാനെറ്റ് ന്യൂസ് സംഘം കടത്തിക്കൊണ്ടു പോയി.
ഇന്നലെ രാത്രി 7.45 ന് എം.സി റോഡില്‍ കൊട്ടാരക്കരയിലെ മാതൃഭൂമി ചാനല്‍ ഓഫീസിന് മുന്നിലായിരുന്നു സംഭവം. മൂന്നു ചാനലുകള്‍ക്കാണ് അന്തിചര്‍ച്ചയ്ക്ക് ഭാഗ്യലക്ഷ്മി സമയം നല്‍കിയിരുന്നത്. മാതൃഭൂമി, റിപ്പോര്‍ട്ടര്‍, ഏഷ്യാനെറ്റ് എന്ന ക്രമത്തില്‍ ചെല്ലാമെന്നും താരം ഏറ്റു. യാത്രയില്‍ ആയതിനാല്‍ കൊട്ടാരക്കര വച്ച് കാണാമെന്നാണ് അറിയിച്ചിരുന്നത്. റിപ്പോര്‍ട്ടര്‍ ചാനലിന് കൊട്ടാരക്കര ഓഫീസ് ഇല്ലാത്തതിനാല്‍ തിരുവനന്തപുരത്തുനിന്നു ഡിഎസ്എന്‍ജി എത്തിച്ച് ഇവിടെ അടുത്തു തന്നെ താല്‍കാലിക സ്റ്റുഡിയോയും ഒരുക്കി.
മാതൃഭൂമിയിലെ ചര്‍ച്ച കഴിഞ്ഞ് ഇറങ്ങുന്ന ഭാഗ്യലക്ഷ്മിയെ തങ്ങളുടെ താല്‍കാലിക സ്റ്റുഡിയോയിലേക്ക് കൊണ്ടുപോകാന്‍ ക്യാമറാമാന്‍ ശ്രീലാല്‍, കൊല്ലം റിപ്പോര്‍ട്ടര്‍ ഷെമീര്‍ എന്നിവര്‍ പുറത്തു കാത്തുനിന്നിരുന്നു. എന്നാല്‍, പുറത്തിറങ്ങി സ്വന്തം വാഹനത്തിലേക്ക് കയറിയ ഭാഗ്യലക്ഷ്മിയുടെ വാഹനം അവിടെയെത്തിയ ഏഷ്യാനെറ്റ് സംഘം തടഞ്ഞ്് തങ്ങളോടൊപ്പം വരണമെന്ന് ആവശ്യപ്പെട്ടു. 8.15 മുതല്‍ 8.45വരെ താന്‍ റിപ്പോര്‍ട്ടറിന് സമയം നല്‍കിയിരിക്കുകയാണെന്നും അതു കഴിഞ്ഞ വരാമെന്നും ഭാഗ്യലക്ഷ്മി അറിയിച്ചു.
ഏഷ്യാനെറ്റ് റിപ്പോര്‍ട്ടര്‍ ഒരു വിധ വിട്ടുവീഴ്ചയ്ക്കും തയാറായിരുന്നില്ല. താന്‍ നികേഷിന് വാക്കു കൊടുത്തതാണെന്നും ആ സമയത്ത് അവിടെ ചെല്ലണമെന്നും ഭാഗ്യലക്ഷ്മി നിര്‍ബന്ധം പിടിച്ചു. ഏഷ്യാനെറ്റ് സംഘം വഴങ്ങിയില്ല. ഇതിനിടെയാണ് റിപ്പോര്‍ട്ടര്‍ ക്യാമറാമാന്‍ ശ്രീലാലും മുജീബുമായി വാക്കേറ്റവും ഉന്തും തള്ളുമുണ്ടായത്.
ഒടുക്കം ഏഷ്യാനെറ്റ് സംഘം ഭാഗ്യലക്ഷ്മിയുമായി പോയി. 8.45 നാണ് ഏഷ്യാനെറ്റിന്റെ പരിപാടി അവസാനിച്ചത്. അതിന് ശേഷം ഭാഗ്യലക്ഷ്മി റിപ്പോര്‍ട്ടര്‍ ചര്‍ച്ചയിലും പങ്കെടുത്തു. ചാനലുകാരുടെ തമ്മിലടിക്ക് നാട്ടുകാരും സാക്ഷികളായി. വടക്കാഞ്ചേരിയില്‍ യുവതിയെ കൂട്ടബലാല്‍സംഗം ചെയ്ത സംഭവത്തിന്റെ ചര്‍ച്ചയ്ക്ക് വേണ്ടിയാണ് ഭാഗ്യലക്ഷ്മിയെ ചാനലുകള്‍ ക്ഷണിച്ചത്.