കെ.എം.ഷാജിയുടെ വീട് ആക്രമിച്ച കേസില് ലീഗ് പഞ്ചായത്തംഗം ഉള്പ്പടെ മൂന്ന് പേര് അറസ്റ്റില്
മുസ്ലിം ലീഗ് നേതാവും അഴീക്കോട് എംഎല്എയുമായ കെ.എം.ഷാജിയുടെ വീട് ആക്രമിച്ച കേസില് പഞ്ചായത്ത് മെന്പര് ഉള്പ്പെടെ മൂന്ന് മുസ്ലിം ലീഗ് പ്രവര്ത്തകരെ വളപട്ടണം പോലീസ് അറസ്റ്റ് ചെയ്തു. അഴീക്കോട് ഗ്രാമപഞ്ചായത്ത് ഒന്നാം വാര്ഡ് മെന്പറും കടപ്പുറം റോഡ് സ്വദേശിയുമായ ഫസല് (29), യൂത്ത് ലീഗ് പ്രവര്ത്തകരും പൊയ്ത്തുംകടവ് സ്വദേശികളുമായ ജംഷീര് (29), വി.പി. റംസീര് (28) എന്നിവരെയാണ് വളപട്ടണം എസ്ഐ ശ്രീജിത്ത് കൊടേരിയുടെ നേതൃത്വത്തിലുള്ള പോലീസ് സംഘം അറസ്റ്റ് ചെയ്തത്. വീട്ടില് അതിക്രമിച്ച കയറുക, വീടിന് നാശനഷ്ടം വരുത്തുക തുടങ്ങിയ വകുപ്പുകള് ചേര്ത്താണ് കേസെടുത്തത്. ഇവരെ ഇന്ന് കോടതിയില് ഹാജരാക്കും.
പാര്ട്ടിയിലെ ആഭ്യന്തരപ്രശ്നങ്ങളും എംഎല്എയോടും അദ്ദേഹത്തിന്റെ സ്റ്റാഫിനോടുമുള്ള വിരോധവുമാണ് അക്രമത്തില് കലാശിച്ചതെന്ന് പോലീസ് പറഞ്ഞു. ബുധനാഴ്ച അഴീക്കലില് മണല്വാരലുമായി ബന്ധപ്പെട്ട് സമരപ്പന്തല് സന്ദര്ശിക്കാന് എത്തിയ എംഎല്എയും പ്രതികളുമായി വാക്കുതര്ക്കം ഉണ്ടായെന്നും ലീഗ് പ്രവര്ത്തകര് പറഞ്ഞു.
എംഎല്എയുടെ ചാലാട് മണലിലുള്ള വീടിനുനേരേ ബുധനാഴ്ച ഉച്ചയോടെയാണ് അക്രമം ഉണ്ടായത്. ബൈക്കിലെത്തിയ പ്രതികള് വീടിന്റെ താഴെത്തെ നിലയിലെ ഗ്ലാസുകള് അടിച്ചുതകര്ത്തശേഷം രക്ഷപ്പെടുകയായിരുന്നു. അക്രമം നടന്ന് മണിക്കൂറുകള്ക്കുള്ളില് പ്രതികളെ പിടികൂടാന് വളപട്ടണം പോലീസിന് സാധിച്ചു. സംഭവ സമയത്ത് എംഎല്എ വീട്ടില് ഉണ്ടായിരുന്നില്ല.
വളപട്ടണം സിഐ കൃഷ്ണന്, എസ്ഐ ശ്രീജിത്ത് കൊടേരി തുടങ്ങിയവര് സ്ഥലത്തെത്തി പരിശോധന നടത്തി. കോണ്ഗ്രസ് നേതാവ് കെ.സുധാകരന്, ലീഗ് നേതാക്കളായ വി.കെ. അബ്ദുള്ഖാദര് മൗലവി, പി. കുഞ്ഞിമുഹമ്മദ്, വി.പി.വന്പന് എന്നിവര് ഷാജിയുടെ വീട് സന്ദര്ശിച്ചു.
https://www.facebook.com/Malayalivartha
