തോമസ് ചാണ്ടിയുടെ മണ്ഡലമായ കുട്ടനാട് തിരിച്ചുപിടിക്കുമെന്ന്  സിപിഎം ആലപ്പുഴ ജില്ലാ സെക്രട്ടറി സജി ചെറിയാന്‍ വ്യക്തമാക്കി. പാര്‍ട്ടി സീറ്റ് എന്‍.സി.പിക്ക് വിട്ടുകൊടുത്തത് മണ്ടത്തരമായിപ്പോയി. പാര്‍ട്ടിക്ക് ഏറെ വൈകാരിക ബന്ധമുള്ള സ്ഥലമാണ് കുട്ടനട്. എന്തു വിലകൊടുത്തും മണ്ഡലം തിരിച്ചെടുക്കുമെന്നും സജി ചെറിയാന്‍ ആലപ്പുഴയില്‍ ആവര്‍ത്തിച്ചു. തോമസ് ചാണ്ടിയുടെ മാര്‍ത്താണ്ഡം കായല്‍ കയ്യേറ്റവും നെല്‍വയല്‍ തണ്ണീര്‍ത്തടനിയമം ലംഘിച്ച് ലേക്ക് പാലസ് റോഡിലേക്ക് റോഡ് നിര്‍മിച്ചതും വിവാദമായതോടെ സര്‍ക്കാരിനും മുന്നണിക്കും വലിയ നാണക്കേടാണ് സംഭവിച്ചത്. ഇതോടെയാണ് പാര്‍ട്ടിയില്‍ സീറ്റ് തിരിച്ച് പിടിക്കണമെന്ന ആവശ്യം ഉയര്‍ന്ന് വന്നത്.

സി.പി.എം ഒരുപാട് കര്‍ഷകസമരങ്ങള്‍ നടത്തിയ മണ്ണാണ് കുട്ടനാട്. പ്രത്യേകസാഹചര്യത്തിലാണ് അത് എന്‍.സി.പിക്ക് കൈമാറിയത്. അന്ന് മുതല്‍ പലതരത്തിലുള്ള വിവാദങ്ങളാണ് തോമസ് ചാണ്ടി ഉണ്ടാക്കുന്നത്. പാര്‍ട്ടിപ്രവര്‍ത്തകരിലും അണികളിലും ഇത് അവമതിപ്പുണ്ടാക്കുന്നു. പലപ്പോഴും മുന്നണിയെയും സര്‍ക്കാരിനെയും വിവാദങ്ങളിലേക്ക് വലിച്ചിഴയ്ക്കുകയാണ് തോമസ് ചാണ്ടി. മാത്രമല്ല മണ്ഡലത്തില്‍ മുഴുവന്‍ സമയം സജീവമല്ല. മന്ത്രിയായപ്പോള്‍ സ്വന്തക്കാരെയും ബന്ധുക്കളെയും വഴിവിട്ട് സഹായിച്ചു. അടുത്തബന്ധുക്കളില്‍ ചിലരെ മന്ത്രിയുടെ പഴ്‌സണല്‍ സ്റ്റാഫാക്കി. അങ്ങനെ നിരവധി ആക്ഷേപങ്ങള്‍ ബ്രാഞ്ച് സമ്മേളനങ്ങളിലും ലോക്കല്‍ സമ്മേളനങ്ങളിലും ചര്‍ച്ചയായിരുന്നു. ജില്ലാ സമ്മേളനത്തില്‍ രൂക്ഷവിമര്‍ശനം ഉണ്ടാകുമെന്ന് മുന്‍കൂട്ടി കണ്ടാണ് സജിചെറിയാന്‍ നിലപാട് പരസ്യമാക്കിയതെന്ന് അറിയുന്നു.