കുഴിബോംബുകള്‍ കണ്ടെത്തിയതിന് പിന്നാലെ കുറ്റിപ്പുറം പാലത്തിന് സമീപത്ത് നിന്ന് എസ്.എല്‍.ആര്‍ തോക്കുകളില്‍ ഉപയോഗിക്കുന്ന വന്‍ വെടിയുണ്ട ശേഖരം കണ്ടെത്തി. 7.62 തോക്കുകളില്‍ ഉപയോഗിക്കുന്ന അഞ്ഞൂറോളം വെടിയുണ്ടകള്‍, ആറ് പള്‍സ് ജനറേറ്റര്‍, രണ്ട് ട്യൂബ് ലോഞ്ചര്‍, നാല് കേബിള്‍ കണക്ടര്‍, ഉപയോഗിച്ച 45ഓളം വെടിയുണ്ടകളുടെ ഭാഗം എന്നിവയാണ് വ്യാഴാഴ്ച ഉച്ചയോടെ കണ്ടെത്തിയത്.
പാലത്തിന് താഴെനിന്ന് കുഴിബോംബ് കണ്ടെത്തിയതിന്റെ അന്വേഷണം പുരോഗമിക്കുന്നതിനിടെ വെള്ളത്തിനടിയില്‍ കനമുള്ള ചാക്ക് കണ്ടെത്തിയതായി പ്രദേശവാസികള്‍ നല്‍കിയ വിവരത്തെ തുടര്‍ന്നാണ് പൊലീസ് പരിശോധന നടത്തിയത്. ഇതോടെയാണ് വെടിയുണ്ട ശേഖരം കണ്ടെത്തിയത്.

പാലക്കാട് എസ്.പി പ്രതീഷ് കുമാര്‍, സ്‌പെഷല്‍ ബ്രാഞ്ച് എസ്.പി ശശിധരന്‍, ഡിവൈ.എസ്.പിമാരായ ഉല്ലാസ് കുമാര്‍ (സ്‌പെഷല്‍ ബ്രാഞ്ച്), ബാബുരാജ് (ഇന്‍േറണല്‍ സെക്യൂരിറ്റി, തൃശൂര്‍), ഉല്ലാസ്, തിരൂര്‍ തഹസില്‍ദാര്‍ വര്‍ഗീസ് മംഗലം, കുറ്റിപ്പുറം എസ്.എച്ച്.ഒ നിപുണ്‍ ശങ്കര്‍ എന്നിവരാണ് പരിശോധനക്ക് നേതൃത്വം നല്‍കിയത്. വെടിയുണ്ടകള്‍ ലഭിച്ച സ്ഥലം അടുത്തദിവസം വെള്ളം വറ്റിച്ച് പരിശോധന നടത്തുമെന്ന് എസ്.പി പറഞ്ഞു.
മലപ്പുറത്ത് നിന്നെത്തിയ ബോംബ് സ്‌ക്വാഡ് പരിശോധന നടത്തി. വെടിയുണ്ടകളും അനുബന്ധ സാമഗ്രികളും വെള്ളിയാഴ്ച കോടതിയില്‍ ഹാജരാക്കും. സൈനിക ടാങ്ക് ചതുപ്പില്‍ താഴാതിരിക്കാനുപയോഗിക്കുന്ന പ്രത്യേക തരം ഷീറ്റും നേരത്തെ കുഴിബോംബുകളോടൊപ്പം കണ്ടെത്തിയിരുന്നു.