സ്വര്‍ണം കള്ളന്റെ ശ്രദ്ധയില്‍ പെടാതിരിക്കാന്‍ ഭദ്രമല്ലാത്ത പല സ്ഥലങ്ങളില്‍ സൂക്ഷിക്കുകയാണ് പതിവ്. എന്നാല്‍ അത് തെരഞ്ഞ് പിടിച്ച് കള്ളന്‍ കൊണ്ടുപോയിരിക്കുകയാണ്. മരടിലാണ് സംഭവം നടന്നത്.

സ്‌റ്റോര്‍ റൂമില്‍ പ്രവര്‍ത്തിപ്പിക്കാതെ വച്ചിരുന്ന ഫ്രിഡ്ജിനകത്ത് പാത്രത്തില്‍ തുണിയില്‍ പൊതിഞ്ഞു സൂക്ഷിച്ചിരുന്ന നാലു മോതിരങ്ങളും മാലയും മുഖംമൂടി മോഷ്ടാവ് ഒറ്റയ്ക്ക് താമസിക്കുന്ന സ്ത്രീയെ ആക്രമിച്ചാണ് കൊണ്ടുപോയത്. ഇന്നലെ പുലര്‍ച്ചെ നാലരയോടെ കുണ്ടന്നൂര്‍ മുനിസിപ്പാലിറ്റി റോഡിന് സമീപം കുമ്പളാറ വീട്ടില്‍ മോളി (52)യെയാണ് ആക്രമിച്ച ശേഷം ഏഴു പവന്‍ സ്വര്‍ണവും രണ്ടായിരം രൂപയുമായി മോഷ്ടാവ് രക്ഷപ്പെട്ടത്. മോഷ്ടാവിന്റെ ആക്രമണത്തില്‍ മോളിയുടെ കഴുത്തിനും ചുണ്ടിലും മുറിവേറ്റു.

വെളുപ്പിനു നാലരയോടെ തന്റെ കിടപ്പുമുറിയില്‍ ലൈറ്റ് കണ്ടു നോക്കിയപ്പോള്‍ മുഖം തുണികൊണ്ടു മറച്ചു ഒരാള്‍ മുന്നില്‍ നില്‍ക്കുന്നതു കണ്ടു. എഴുന്നേറ്റു ഒച്ച വയ്ക്കാന്‍ ശ്രമിച്ച മോളിയുടെ കഴുത്തിനു കുത്തിപ്പിടിച്ചു മുഖത്തടിച്ചശേഷം മോളിയുടെ കഴുത്തില്‍ കിടന്ന ഒരു പവന്റെ മാല മോഷ്ടാവ് പൊട്ടിച്ചെടുത്തു. ഇതിനിടെ മാലയില്‍ മോളിയും പിടിച്ചതിനാല്‍ മാലയുടെ പകുതിയെ മോഷ്ടാവിന് ലഭിച്ചുള്ളൂ. തുടര്‍ന്ന് അടുക്കള വാതിലിലൂടെ പുറത്തു കടന്ന മോഷ്ടാവ് സമീപത്തെ ഒഴിഞ്ഞ പറമ്പിലൂടെ ദേശീയ പാതയിലേക്ക് ഓടി രക്ഷപ്പെട്ടു.

സ്‌റ്റോര്‍ റൂമില്‍ പ്രവര്‍ത്തിപ്പിക്കാതെ വച്ചിരുന്ന ഫ്രിഡ്ജിനകത്ത് പാത്രത്തില്‍ തുണിയില്‍ പൊതിഞ്ഞു സൂക്ഷിച്ചിരുന്ന കാല്‍ പവന്‍ വീതമുള്ള നാലു മോതിരങ്ങളും നാലരപവന്റെ മാലയും നഷ്ടപ്പെട്ടതായും പരിശോധനയില്‍ കണ്ടെത്തി. ബര്‍മൂഡ മാത്രം ധരിച്ച് രണ്ടു കറുത്ത ചെരിപ്പുകള്‍ പിന്‍വശത്ത് ബര്‍മുഡക്കിടയിലൂടെ തിരുകി വച്ചിട്ടുണ്ടായിരുന്നതായും മോളി പറയുന്നു. അകത്ത് കിടന്നിരുന്ന ചുരിദാറിന്റെ ടോപ്പ് എടുത്താണു മോഷ്ടാവ് മുഖം മറച്ചിരുന്നതെന്നും മോളി പറഞ്ഞു.

മരട് പോലീസ്, ഡോഗ് സ്‌ക്വാഡ്, വിരലടയാള വിദഗ്ധര്‍ എന്നിവര്‍ സ്ഥലത്തെത്തി വിവരങ്ങള്‍ ശേഖരിച്ചു. മോളിയുടെ ഭര്‍ത്താവ് മരപ്പണിക്കാരനായ സേവ്യര്‍ അഞ്ചു വര്‍ഷം മുമ്പ് അപകടത്തില്‍ മരണപ്പെടുകയായിരുന്നു. ഒരു വര്‍ഷം മുമ്പ് ഏകമകള്‍ സിയയെ വിവാഹം കഴിച്ചയച്ചതോടെ മോളി ഒറ്റയ്ക്കാണ് വിട്ടില്‍ താമസിച്ചിരുന്നത്. ഇന്നലെ മകളെ വിട്ടിലേക്കു കൂട്ടിക്കൊണ്ടുവരല്‍ ചടങ്ങ് നടത്താനിരിക്കുകയായിരുന്ന ദിവസമാണ് ആക്രമണം നടന്നത്. അഞ്ചടി നാലിഞ്ച് ഉയരവും ഇരുനിറവും ഒത്തവണ്ണമുണ്ട് മോഷ്ടാവിന്.

സമീപത്തുള്ള സ്വകാര്യ സ്ഥാപനത്തിലെ സിസിടിവി ക്യാമറ പരിശോധിച്ചാല്‍ മോഷ്ടാവിന്റെ എന്തെങ്കിലും വിവരങ്ങള്‍ കിട്ടാന്‍ സാധ്യതയുണ്ടെന്നു വീട്ടുകാര്‍ പറഞ്ഞു. മോഷ്ടാവ് പോയെന്നുറപ്പുവരുത്തിയ ശേഷം മോളി തന്റെ മൊെബെല്‍ ഫോണില്‍ മരടില്‍ താമസിക്കുന്ന മകളെ വിവരമറിയിച്ചു. ഉടന്‍ തന്നെ വിവരമറിഞ്ഞു മരട് പോലീസും സ്ഥലത്തെത്തി. തുടര്‍ന്ന് നടത്തിയ പരിശോധനയിലാണ് ആറര പവന്‍ സ്വര്‍ണവും മേശപ്പുറത്തെ പഴ്‌സില്‍ വച്ചിരുന്ന രണ്ടായിരം രൂപയും നഷ്ടപ്പെട്ടതായും അറിയുന്നത്.