ചെങ്ങന്നൂരില് പി.സി വിഷ്ണുനാഥിന് പകരം സോണിയയുടെയും രാഹുലിന്റെയും പ്രസംഗം പരിഭാഷപ്പെടുത്തിയ ജ്യോതിയെ കളത്തിലിറക്കാന് ഐ ഗ്രൂപ്പ് നീക്കം
ചെങ്ങന്നൂര് നിമസഭാ ഉപതെരഞ്ഞെടുപ്പില് കഴിഞ്ഞ തവണ മല്സരിച്ച പി.സി വിഷ്ണുനാഥിനെ ഇത്തവണ ഒഴിവാക്കാന് ഐ ഗ്രൂപ്പ് നീക്കം. രാഹുല് ഗാന്ധിയെ സ്വാധീനിച്ച് കോണ്ഗ്രസ് നേതാവായ ജ്യോതി രാധിക വിജയകുമാറിനെ മല്സരിപ്പിക്കാനാണ് ശ്രമം നടക്കുന്നത്. ഇതിനെതിരെ കോണ്ഗ്രസ് പ്രവര്ത്തകര് പാര്ട്ടിയിലും സമൂഹമാധ്യമങ്ങളിലും വ്യാപക പ്രചരണം നടത്തുകയാണ്. സോണിയ ഗാന്ധിയുടെ പ്രസംഗം മലയാളത്തിലേക്ക് പരിഭാഷ ചെയ്ത് അവരുടെ പ്രശംസ ഏറ്റുവാങ്ങിയ യുവതിയാണ് ജ്യോതി രാധിക വിജയകുമാര്. തിരുവനന്തപുരം ടെക്നോപാര്ക്കില് ജോലി ചെയ്യുന്ന ജ്യോതി മാര് ഈവാനിയോസ് കോളേജിലെ ആദ്യ വനിത ചെയര്പേഴ്സണ് കൂടിയാണ്.
ജ്യോതി നിയമ ബിരുദവും നേടിയിട്ടുണ്ട്. കെ.പി.സി.സി പ്രസിഡന്റായിരുന്ന വി.എം സുധീരന്റെ നിര്ദേശപ്രകാരമാണ് സോണിയ ഗാന്ധിയുടെ പ്രസംഗം പരിഭാഷ ചെയ്യാന് ജ്യോതിക്ക് അവസരം ലഭിച്ചത്. അന്ന് ആ പ്രസംഗത്തിനു ശേഷം ജ്യോതിയെ സോണിയ ഗാന്ധി അഭിനന്ദിച്ചിരുന്നു. രാഹുല് ഗാന്ധി ചെങ്ങന്നൂരിലെത്തിയപ്പോഴും ജ്യോതിയാണ് പ്രസംഗം പരിഭാഷപെടുത്തിയത്. കെ. കരുണാകരന്റെ കാലത്ത് ഐ ഗ്രൂപ്പിന്റെ സീറ്റായിരുന്നു ചെങ്ങന്നൂര് ശോഭനാ ജോര്ജ് ഒന്നിലധികം തവണ ഇവിടെ നിന്ന് വിജയിച്ചിട്ടുണ്ട്. ശോഭന വ്യാജരേഖ കേസില് അകപ്പെട്ടതോടെയാണ് എ ഗ്രൂപ്പ് സീറ്റ് തട്ടിയെടുത്തതെന്ന് ഐ ഗ്രൂപ്പ് ആക്ഷേപിക്കുന്നു.
ജ്യോതിയെ മുന്നിര്ത്തി സീറ്റ് പിടിച്ചെടുക്കുകയാണ് ഐ ഗ്രൂപ്പിന്റെ ലക്ഷ്യം. വനിതയായതിനാല് കൂടുതല് പ്രാധാന്യം ലഭിക്കുമെന്ന് അവര് വിശ്വസിക്കുന്നു. സോണിയാ ഗാന്ധിക്കും രാഹുല് ഗാന്ധിക്കും നേരിട്ട് പരിചയമുള്ള ജ്യോതിയെ കളത്തിലിറക്കിയാല് അവര് എതിര്ക്കില്ലെന്നും ഐ ഗ്രൂപ്പിലെ പ്രാദേശിക നേതാക്കള് പറയുന്നു. പി.സി വിഷ്ണുനാഥിനെ മാത്രമല്ല ഉമ്മന്ചാണ്ടിയെ കൂടെ ഒതുക്കാനുള്ള തന്ത്രമാണിതെന്ന് എ ഗ്രൂപ്പ് ആരോപിക്കുന്നു. പി.സി തന്നെ ചെങ്ങന്നൂരില് മല്സരിക്കണമെന്ന് ആവശ്യപ്പെട്ട് ഇവര് സോഷ്യല് മീഡിയയില് ക്യാമ്പയിന് തുടങ്ങിക്കഴിഞ്ഞു. കഴിഞ്ഞ തവണ ശോഭനാ ജോര്ജ് വിമത സ്ഥാനാര്ത്ഥിയായി മല്സരിച്ചത് കൊണ്ടാണ് പി.സി വിഷ്ണുനാഥ് പരാജയപ്പെടാന് കാരണമെന്ന് ഇവര് പറയുന്നു. എം.എല്.എയായിരുന്ന ആര്. രാമചന്ദ്രന് നായര് അന്തരിച്ചതോടെയാണ് ഇവിടെ ഉപതെരഞ്ഞെടുപ്പിന് കളമൊരുങ്ങിയത്.
https://www.facebook.com/Malayalivartha
