മുക്കത്ത് പത്ത് ലക്ഷത്തി അമ്പതിനായിരം രൂപയുടെ കള്ളനോട്ട് വേട്ട. തമിഴ്‌നാട് സേലം സ്വദേശികളായ സുരേഷ്‌കുമാര്‍ (35) നിര്‍മ്മല (35) എന്നിവരെയാണ് അറസ്റ്റ് ചെയ്തത്. മുക്കത്തുനിന്നും സേലത്തു നിന്നുമായാണ് ഇവരെ പിടികൂടിയത്. മുക്കത്ത് ഒരു ലോഡ്ജില്‍ വെച്ച് കള്ളനോട്ട് കൈമാറാന്‍ ശ്രമിക്കുന്നതായി കോഴിക്കോട് റൂറല്‍ എസ്.പി കെ.പുഷ്‌കരന് കിട്ടിയ രഹസ്യ വിവരത്തിന്റെ അടിസ്ഥാനത്തില്‍ സുരേഷ് കുമാറിനെ ചൊവ്വാഴ്ച രാവിലെ ഇവിടെ വെച്ച് പിടികൂടുകയായിരുന്നു.

ഇയാളില്‍ നിന്ന് 500 ന്റെ നൂറ് നോട്ടുകള്‍ പിടിച്ചെടുക്കുകയും ചെയ്തു. തുടര്‍ന്ന് നടത്തിയ അന്വേഷണത്തില്‍ കള്ളനോട്ട് കോഴിക്കോട് ഭാഗത്ത് വിതരണം ചെയ്യാന്‍ കൊണ്ടുവന്നതാണെന്നും സേലം സ്വദേശിയായ നിര്‍മ്മലയും മറ്റൊരാളും ചേര്‍ന്നാണ് നിര്‍മ്മിച്ച് വിതരണം ചെയ്യുന്നതെന്നും മനസ്സിലായി. നിര്‍മ്മല കിഴഞ്ഞവര്‍ഷം തൃശ്ശൂര്‍ ജില്ലയിലെ മണ്ണൂത്തി പോലീസ് സ്‌റ്റേഷനില്‍ അഞ്ച് ലക്ഷം രൂപയുടെ കള്ളനോട്ടുമായി പിടിയിലായിരുന്നെന്നും ആ കേസില്‍ ജാമ്യത്തിലിറങ്ങിയാണ് വീണ്ടും കള്ളനോട്ട് നിര്‍മ്മാണം നടത്തുന്നതെന്നും പ്രതി സുരേഷില്‍ അറിയാനായി. തുടര്‍ന്ന് അന്വേഷണ സംഘം നിര്‍മ്മലയെ സേലത്ത് വെച്ചും അറസ്റ്റ് ചെയ്യുകയായിരുന്നു. നിര്‍മ്മലയെ പിടികൂടുമ്പോള്‍ ഇവരുടെ കൈവശം 2000 ,500 ,200 ,100 എന്നിവയുടെ 10 ലക്ഷത്തോളം കള്ളനോട്ടുകള്‍ ഉണ്ടായിരുന്നുവെന്നും പൊലീസ് പറഞ്ഞു.

2017 മെയ് മാസത്തില്‍ 5 ലക്ഷം രൂപയുടെ കള്ളനോട്ടുമായി നിര്‍മ്മല ഉള്‍പ്പട്ട തമിഴ്‌നാട്ടുകാരായ നാലംഗ സംഘത്തെ സ്‌കോര്‍പിയോ കാര്‍ സഹിതം മണ്ണുത്തി പോലീസ് പിടികൂടിയിരുന്നു. അന്ന് നിര്‍മ്മലയുടെ വീട്ടില്‍ നിന്ന് കള്ളനോട്ട് സാമഗ്രികള്‍ കണ്ടെടുത്തിരുന്നു. മൂന്ന് മാസത്തിന് ശേഷം ആ കേസില്‍ ജാമ്യത്തിലിറങ്ങിയ നിര്‍മ്മല വീണ്ടു കള്ളനോട്ടു നിര്‍മ്മാണവും വിതരണവും നടത്തി വരുന്നതിനിടയിലാണ് ഇപ്പോള്‍ പിടിയിലായത്. കോഴിക്കോട് റൂറല്‍ എസ്.പിയുടെ കീഴില്‍ കഴിഞ്ഞ മൂന്ന് മാസത്തിനിടെ ഇത് മൂന്നാം തവണയാണ് കള്ളനോട്ടുസംഘങ്ങളെ പിടികൂടുന്നത്. 2017 നവംബറില്‍ കൊടുവള്ളി പോലീസ് സ്‌റ്റേഷനില്‍ 50 ലക്ഷത്തോളം രൂപയുടെ കള്ളനോട്ടും നിര്‍മ്മാണ സാമഗ്രികളുമായി കോട്ടയം, കോഴി ക്കോട് സ്വദേശികളായ ഏഴു പേരേ അറസ്റ്റ് ചെയ്തിരുന്നു. ഈ കേസിന് അന്താരാഷ്ട്ര ബന്ധം സംശയിക്കുന്നതി നാല്‍ എന്‍.ഐ.എ അന്വേഷണം നടത്തുകയാണ്. കഴിഞ്ഞ മാസം വടകര പോലീസ് സ്‌റ്റേഷനില്‍ 3 ലക്ഷം രൂപയുടെ കളള നോട്ടു നിര്‍മ്മാണ സാമഗ്രികളുമായി രണ്ട്‌പേരെ പോലീസ് അറസ്റ്റ് ചെയ്തിരുന്നു.

ഈ കേസുകളിലെ പ്രതികള്‍ക്കെല്ലാം തമ്മില്‍ പരസ്പര ബന്ധമുണ്ടോയെന്നും ഈ കേസില്‍ കൂടുതല്‍ ആളുകള്‍ പെട്ടിട്ടുണ്ടോയെന്നും അന്വേഷ്ണ സംഘം പരിശോധിച്ച് വരികയാണ്. പ്രതിയായ നിര്‍മ്മല സേലത്ത് വന്‍ ചിട്ടികള്‍ നടത്തി ആളുകളെ കബളിപ്പിച്ചിട്ടുണ്ട്. എത്രത്തോളം കള്ളനോട്ട് അടിച്ചിട്ടുണ്ടെന്നും വിപണിയിലെത്ര ഇറക്കിയിട്ടുണ്ടെന്നും ഇവരുടെ സാമ്പത്തിക സ്രോതസ്സുകളെ കുറിച്ചും അന്വേഷിച്ചുവരികയാണ്. താമരശ്ശേരി ഡി.വൈ.എസ്.പി പി.സി.സജീവന്‍, മുക്കം എസ്.ഐ കെ.പി അഭിലാഷ് ,െ്രെകം സ്വാഡ് അംഗങ്ങളായ എ.എസ്.ഐ രാജീവ് ബാബു, ഷിബില്‍ ജോസഫ്, ഹരിദാസന്‍ ,എ.എസ്.ഐ സതിഷ് കുമാര്‍, ബേബി മാത്യു , ജസ്സി മാത്യു, ഷഫീഖ് , സൈബര്‍ സെല്‍ എ.എസ്.ഐ. സത്യന്‍ എന്നിവരടങ്ങിയ സംഘമാണ് കേസന്വേഷണം നടത്തി പ്രതികളെ പിടികൂടിയത്.