അതിര്‍ത്തിയില്‍ വീണ്ടും പാക് പ്രകോപനം. ഒരു ദിവസത്തെ ശാന്തതയ്ക്കു ശേഷം എല്ലാം അവസാനിപ്പിച്ചു എന്നു വരുത്തി തീര്‍ത്തിട്ട് വീണ്ടും പാക് സേന അക്രമത്തിനു മുതിര്‍ന്നിരിക്കുകയാണ്. ഇന്ന് ഉച്ചയോടെയാണ് വീണ്ടും വെടിവയ്പ് നടന്നത്. രാജ്യാന്തര അതിര്‍ത്തിയിലെ പൂഞ്ച് സെക്ടറിലെ നാല് ബിഎസ്എഫ് ഔട്ട്‌പോസ്റ്റുകള്‍ക്കു നേരെയാണ് വെടി ഉതിര്‍ത്തത്.
അതിര്‍ത്തിയിലെ ഗ്രാമങ്ങളിലേക്കും ആക്രമണം നടന്നു. ചെറിയ തോതില്‍ ഷെല്ലാക്രമണവും നടക്കുന്നുണ്ട്.
കഴിഞ്ഞ ഒരാഴ്ചയ്ക്കുള്ളില്‍ പാകിസ്ഥാനില്‍ നിന്നുണ്ടായ ആക്രമണത്തില്‍ എട്ട് ഗ്രാമീണര്‍ കൊല്ലപ്പെടുകയും അറുപതിലേറെ പേര്‍ക്ക് പരുക്കേല്‍ക്കുകയും ചെയ്തിരുന്നു. ഗ്രാമങ്ങളില്‍ ഷെല്ലുകള്‍ പതിച്ച് വ്യാപക നാശനഷ്ടവും ഉണ്ടായിട്ടുണ്ട്. ആയിരക്കണക്ക് പേരാണ് ഈ പ്രദേശങ്ങളില്‍ നിന്ന് പലായനം ചെയ്തു കൊണ്ടിരിക്കുന്നത്.
ഒരു ദിവസത്തെ ശാന്തത വന്നപ്പോള്‍ മറ്റു ഗ്രാമങ്ങളില്‍ അഭയാര്‍ഥികളായി കഴിഞ്ഞിരുന്നവര്‍ തിരികെ വരാന്‍ തുടങ്ങുമ്പോഴാണ് വീണ്ടും വെടിവയ്പ് നടന്നത്. യുദ്ധ സാധ്യത നിലനില്‍ക്കുന്നുവെന്ന് അഭ്യൂഹം പരന്നതിനെ തുടര്‍ന്ന് അതിര്‍ത്തി ഗ്രാമങ്ങളിലെ ജനങ്ങള്‍ ഭീതിയിലാണ്.
പാകിസ്ഥാന്‍ പ്രധാനമന്ത്രി നവാസ് ഷെരീഫിന്റെ അധ്യക്ഷതയില്‍ ഇന്നലെ ചേര്‍ന്ന അവലോകന യോഗത്തിനു ശേഷം പാക് സൈന്യത്തില്‍ നിന്നും പ്രകോപനം ഉണ്ടായിരുന്നില്ല. യുദ്ധം ഒന്നിനും പരിഹാരമല്ലെന്നായിരുന്നു ഷെരീഫിന്റെ വിലയിരുത്തല്‍. പാക് സൈന്യത്തിന് വ്യാഴാഴ്ച ഇന്ത്യന്‍ പ്രതിരോധമന്ത്രി അരുണ്‍ ജെയ്റ്റ്‌ലി ശക്തമായ താക്കീതും നല്‍കിയിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha